¹ Inatxina wyramy bede Nabuodonosoru Babilonia iòlòmy ratximyhỹ, tii rarasinyre kia tahe inihikỹmy ritõhõtiyrenyre, kia rõrõõhyyre. ² Taita rarariowyre bedeery mahãdu deereny, urerarudu mahãdu deereny, hàri mahãdu deereny kia biu bede-di erydỹỹdu mahãdu deereny, kia tii boho riòbitinyrenykremy irasi. Ritehemynyrenyreu kia iòlò dee rexideòsinyreny. ³ Kia tii tamyreny rarybere: — Rarasinyre kia sõemy riwanohõtiyrenyre kiata tiu ywimy aratxiõtyhy kia arierykõmy aõmybo rarybereri. ⁴ Tii boho raryberenyre iòlò dee aramaico rybemy: — Kia iòlò ikiehyymy ratximyhỹre! Rexitòenyrenyreri adee wakoreny belyykremy arasimy irahudi tahe diarỹ boho arelyyrenykre ako aõmybo tarasinytemy. ⁵ Ka iòlòta rirawyònyre: — Diarỹ tuu reywinyra kai boho wako belyybenykremy kia tule biòbitinybenykre aõmybo rarybereri. Txibo tuu wako belyybenyõbenykre-wana, kai boho mayreyremy makròkròbenykre, kia ahetoreny rexihurenykre. ⁶ Ka txibo wako beleyybenykeki warasimy kia biòbitinybenyke aõmybo rarybereri, diarỹ ariwahinyke aõnaõna wiwihikỹ sõemy. Kiaremyta, tuu wadee manarybedenyke aõmybo rarasinyra kia aõmybo warasi rarybereri. ⁷ Kia ibutumy bedeery mahãdu ixyby raryberenyre: — Bedelyyke arasimy, kia tahe diarỹ boho adee tuu araryberenykre aõmybo arasi rarybererimy. ⁸ Ka iòlò tahe rõhõtiõre: — Diarỹ araeryrenyreri aõbo tewinytenyterimy. Kia bede raroorehenykemy tesỹnytenyteri kiemy dori bede teerytenyte aõbo ariwinykremy watxireri, ⁹ kia txibo kai boho wako beleyyõbenykreki warasimy, kia ibutumy adeereny rarytxyna wiwesetyhyle ariwahinykre. Kai boho bede widee teywinytenyta biwabònybenykremy roi bòdỹỹna òtaòta-di, kia bededỹỹnana raixawidỹỹkemy. Wako warasimy bedelyydenyke, taita diarỹ arierykre kia tule ariòbitinykre aõmybo rarybere. ¹⁰ Bedeery mahãdu rirawyònyrenyre iòlò myỹ: — Tiu inyõ bede bede-my ratxire ibedeerymy riwinyõtyhy aõmybo teateri. Tiu iòlòõ tuõhyyre, iruruteretyhymy ibedeerytyhymy ratxire, tuu rexitòenyke aõkõre kawese bededỹỹnanamy tabedeeryrenydee, taurerarudurenydee yda biu-di aõmysỹdỹỹdurenydeereny. ¹¹ Aõmybo kai teateri heka isiratyhyre. Kia inyõ ihoõre mobo aixitòedỹỹna riòbitinykemy, aõhebo tahe ỹnyxiwe, urile tahe wawanareny rasỹnyõmyhỹre kaki su-ki. ¹² Iòlò sõetyhymy reburere, kia ibutumy bedeery mahãdu Babilonia ludu rirubunyrenykremy rarybere. ¹³ Rybe tuu ibutumy raritidỹỹmy relere, taita ròirenyre Danieli òrysymy kia iijoireny òrysymy kia tii boho rururenylekremy. ¹⁴ Danieli rare Arioque itxesemy, iòlò sodadu wedu, kia rybe rimyre dee bedeery mahãdu Babilonia ludu ibutumy rururenykremy. Rexiòhãrunymy ywimy ¹⁵ -Danieli rỹỹraxire Arioque dee: — Aõherekibo iòlò tarybe iutxietyhymy kawesemy riwahinyra? Arioque riòbitinyre aõhebo rutỹỹnyremy. ¹⁶ Taita Danieli rare iòlò dee rybemy, kia tahe tamy reobyre riraõkremy, kia Danieli riòbitinykemy irasi. ¹⁷ Irahudita Danieli rare taheto-ò kia relyyre ibutumy tabiòwareny-ko Ananias, Misael kia Azarias. ¹⁸ Danieli rarybere kia rexitòenyrenykremy Deuxu biu ludu-ò, idireny rawobrurenykremy kia tamyreny ritỹnynynykremy aõmybo kua rasi ieryõnahãkỹ rarybereri, tai Danieli tabiòwareny boho-wana rururenyõrenykremy ibutumy Babilonia bedeery mahãdureny-wana. ¹⁹ Kua ruu Danieli rarasinymy retehemyhỹ taita Deuxu tamy riteòsinyre aõmybo rasi raremy. Taita Danieli Deuxumy reàlàre ²⁰ myỹ rarybemy: “Kia Deuxuni-my ikiemy turybewihikỹ rỹimy rarekre, kiemy dori tai bedeeryhykỹ kia ruruterehekỹ ijõdire. ²¹ Kia tii heka riwiuròwiurònymyhỹre bede aõnaõna; kia tii heka iòlò mahãdu dee ruruterehekỹ ritidimyhỹre kia tii ririòwydỹỹnymyhỹre; kia tii heka aõeryna riwahinymyhỹre aõerydu mahãdureny-ò kia bedeery bedeeryrenydureny-ò. ²² Tii riòbitinymyhỹre aõ iwasimy itỹnyõmy rỹimyhỹre kia rierymyhỹre aõbo iwasimy roimyhỹre bedeluruki, kiemy dori tii-wana bede loosona rasỹnymyhỹre. ²³ Wahỹỹnareny Deuxu, diarỹ umy reàlàre kia umy awihikỹmy rarybereri, kiemy dori wadee tewahinyte bedeery kia ruruterehekỹ. Kai terawyònyte waixitòedỹỹnareny, wadeereny teteòsinymy aõbo iòlò rierykemyreri.” ²⁴ Tai Danieli rare Arioque itxesemy, iòlò deòdu rybe rimyre iòlò-ribi Babilonia bedeery mahãdu rururenykremy. Danieli rarybere: — Arioque, uritre bedeery mahãdu rubudỹỹõmykre. Biwadyke iòlò dee ararybekremy, kia diarỹ tamy ariòbitinykre tii rarasinyremy. ²⁵ Arioque wytyhylemy Danieli ridyre tibedekibo iòlò ratximyhỹ-ò kia tamy rarybere: — Kaa wawana ratxireri judeu mahãduõ iny boho brejumy didydenyde, kia tii adee riòbitinykre rasimy tarasinyte. ²⁶ Iòlò rỹỹraxire Danieli dee, kia tule Beltezasar-my raninilere: — Kai aõbo wako belyykre warasimy kia biòbitinykre aõmybo tii rarybereri? ²⁷ Danieli rirawyònyre: — Bedeery mahãdu ihoõre, urerarudu mahãdu, hàri mahãdu kia biu bededỹỹnana-di aõmysỹdỹỹdu ihoõrenyre adee riòbitinyrenyke tuu kai teaterimy. ²⁸ Ka Deuxu biuki ratximyhỹre tahe aõnaõna iwasimy rỹimyhỹre riòbitinymyhỹre. Kia rasi-ribi tii araerynanyre aõhebo bede rutỹỹnykre ijõ wyra wyra bede bedemy. Ka tahe Iòlò, diarỹ ariòbitinykre arasi kia tuu tabitemy tarõmyhỹ wana-wana. ²⁹ –Kai aherinatyreki taimyhỹ kia tahe taraykynymy aõbo ijõ wyra bede bedemy rỹikremy. Kia kua aõwasi wasi riòbitinymyhỹre adee riteòsinyre aõhebo bede rutỹỹnykremy ijõ wyra bedeu. ³⁰ Kia diarỹ reeryre iwasimy rỹimyhỹre ariòbitinykremy, kia diarỹ wabedeerytyhyrerimy aõkõ ibutumy hãbu mahãdureny-ribi, ka kai bierykremy aõmybo tarasinyte kia aõmybo taraykynymy taimyhỹ Iòlò. ³¹ Kai aõmamy tabite ritxoo nihikỹ làmamy rỹimyhỹmy, kia akoki rỹimyhỹ. Ritxoo rarỹsỹnymy rỹimyhỹ, kiata ilau taberute. ³² Irati heka mana rỹsỹhỹkỹtyhy re, ibreti tera tahe mana rỹsỹ òtaòta rare, iwe irooti tahe iwitxira mana rỹsỹ òtaòtaõle rare, ³³ iti tahe womati rare, kia iwa tahe iweeremy womati rare, kia ijõ weere tahe suu rare. ³⁴ Kia kai idi tetehemyhỹ wana-wana, manaõ nariòwymy nade hãwalò rarie-ribi, kia inyõ ritorunyrerimy aõkõ. Mana rariowyre ritxoo làmamy rỹireri watyre kiata riyreyrenyre. ³⁵ Kia aõtamaõkõ womati, suu, mana rỹsỹtyhyhykỹ suỹnysi wesemy relerenyre, kia iwese suỹnysimy tabimyhỹtenyte wesemy maini tehãtemyhỹtenyte wesemy iti-ribi rahitxidỹỹmyhỹre wesemy. Yhy ibutumy ridyrenyre, kia tai aõ rariõhyymy. Ka mana tahe ranihikỹre kia tahe hãwalò nihikỹmy relere, kia ibutumy bede bede ratyremy ròhònyre. ³⁶ Kaa heka arasi rare, ka tahe wiji adee ariòbitinykre. ³⁷ Iòlò kai heka abedeerymy aruruteretyhymy tahònyte iòlò mahãdu ratyre-ribi, kia Deuxu biuludu heka iòlòmy arasỹnyre; tii adee riwahinyre bedeery nihikỹ, wedu nihikỹ tyhydỹỹnamy mabekremy. ³⁸ Tii adee riwahinyre ibutumy bimykremy iny mahãdu, iròdu iròdu, kia nawii nawii. Kai heka arati mana rỹsỹhỹkỹ-di telemy atximyhỹte. ³⁹ Iòlòmy atximyhỹte-ribi ixyby iòlòõ ijõdikre kia iruruteretyhyke tahe aõkõre awesemy; kia ka iòlò hewomy ixyby iòlòõ ijõdikre, iwitxira mana rỹsỹ òtaòta iòlò kia ibutumy bede bede rimykre. ⁴⁰ Irahudita inaubiòwana iòlò kanakre, kia tii tahe iruruteretyhykre womati wesemy, kia rikròmy ibutumy riyreyrenymy, kaa iòlò heka ibutumy iwitxira iòlò mahãdu bede bedemy rỹimyhỹrenyre rahurenykre. ⁴¹ Ritxoomy tabite, iwamy iwajuhumy iweeremy womatimy ijõdire, ijõ weere su-my. Kia heka kaa iòlò boho rawirarearenykre tuu rikeitxenyre, kia tahe ijõdikre womati ruruyreõ; kia tuu tabitemy, womati raurimy roimyhỹ su-wana. ⁴² Kia iwa juhu weere womati ijõdire, ijõ weribi iruruterekre, ijõ weribi iruru iyjakre. ⁴³ Kai Iòlò tabite, womati raurimy roimyhỹ su-wana, kia heka tuu rikeitxenyre, iòlò mahãdu ributunyrenykemyreri hãwyy-my heri-ribi. Ka womati tahe widee rabutuõmyhỹre su-wana, iwese tahe iòlò mahãdu widee rabuturenyõkre. ⁴⁴ Ka mahãdu iòlò bedeu Deuxu biuludu kiditỹnynynykre iòlòõ kia tiu rexihuõtyhy kia tiu ijõ iòlò rimyõtyhy. Kia iribiòtumy, kaa iòlò rahukre ibutumy iwitxira mahãdu iòlòreny kiata ikiemy rarekre. ⁴⁵ Kia heka tuu rikeitxenyre iòlò mana-my tabite hãwalò rarie-ribi nariowyde inyõ ritorunyrerimy aõkõ, kia ribòhòbòhònyre ritxoo womati-di relere, iwitxira mana rỹsỹ òtaòta-di relere su-di relere kia mana rỹsỹhỹkỹ-di relere. Deuxu Nihikỹ adee ritỹnynynyreri aõhebo bede rutỹỹnykre ijõ wyra bedeu. Kamy heka tarasinyte, kaa heka iòbitidỹỹna òbitityhy rare. ⁴⁶ Taita iòlò Nabuodonosoru tatiòhumy resere Danieli koki kiata taòsỹny su-ò ritidire, irahudita rarybere Danieli dee xiwena relekremy. ⁴⁷ Kia tii rarybere Danieli dee: — Deuxu-my kai boho terinanymyhỹtenyte inatyhymy ibedeerytyhyre ibutumy ỹnyxiwe mahãdu-ribi, kia tii heka ibutumy iòlò mahãdu tyhydỹỹna rare. Diarỹ reeryre tii riòbitinymyhỹremy aõ iwasimy rỹimyhỹre, kia kai wadee teòbitinyte kaa rasi ieryõnana. ⁴⁸ Ilemyta iòlò risỹnyre Danieli wedu rarie nihikỹmy kia tule sõemy tamy aõnaõna òwyhykỹ riwahinyre. Tii risỹnyre Danieli Babilonia wedumy kia risỹnyre ibutumy bedeery mahãdu hãwãhãwamy rỹimyhỹrenyre wedurenymy. ⁴⁹ Danieli ixitòedỹỹna-ki, iòlò risỹnyrenyre Sadrai, Mesai kia Abede-Nego Babilonia aõmysỹdỹỹdu wedurenymy; Danieli tahe iratyrerenyki irariemy runyre iaõmysỹdỹỹna.