¹ Deuxumy rabire xiwena bire-ki. Tii rarybere: — Hetoti bihetenykre butumy heto raukỹkremy. Ixinamy mobo iwomy rỹireri tai tyre rejuxunykre. Mobo rahenykre tahe aõbinamy rakreu arirubunykre; inyõ heka rahenyõtyhy, moõ iruõtyhy. ² Suu wowo-txi rexirutàke hãrele rubu mahãdu hãwa-txi, iribile aritakre; biu-ò raòwynykre, iribile ariatàkre. ³ Iòludu mahãdu ròtenamy ridàrenykre wana, tuureny bede raywikre, butumy rexihurenykre. Idireny aretehekre, arimykremy aõkõ, arihurenykremy. ⁴ Iòlò wedu nihikỹ butu ratyre, suu-ò terita, ramytatara, butumy tuhãwadu mahãdu rasỹbinare rabedewomy. Nilo bero wese heka suu biu-txi rare bede-txi. ^{5 6} Deuxu aheto biu-ki, rỹimyhỹre suu tahe biu rawetykynawo-ki roimyhỹre. Berohokỹ-ò tahe tanymyhỹte Tahe sutyre rejuxunymyhỹre . Iòlòhe kai awire! ⁷ Iòlò tahe rarybere: Israel mahãdu. Etiòpia mahãduy heka aweserenyle rerinanymyhỹre. Egito ribi atararenyre wesemy. Iwese tahe filisteu mahãdu retare uha kreta-ribi arameu mahãdu. Kir-ribi retare. ⁸ Israel mahãdu-di tahe retehereri, aõkõre ihãwa bina, suu tyre ribi tahe arihurenykre; Butuhukỹmy aõkõ tahe israelita mahãdu arahukre. Jiarỹ iòlò, tuu rarybereri. ⁹ Tuu relekre arihitxinykre Israel mahãdu kyribi awi ibina mahãdu, iwese (trigo) rauatymyhỹre wesemy, ijõ rabinake deramy. ¹⁰ Butumy rexihukre tibo waijoi iaõtaòta sõe aõbina-ki, tii mahãdu narybemy nỹimyhỹde: “Deuxu deewimy tahe tiu aõbina ijoi dee releõtyhy”. Sõemy deysana takotxi Israel mahãdu dee. ¹¹ Iòlòwedu nihikỹ rarybere: — Tiu txumybo tahe, ixybyle ariwinykre Davi ryna tyby, heto tyby wesemy rejuxunyre heto weti tahe ariywinykre arilamadỹỹnykre ibinamy roire ribi, juhu roire wesemy roikre. ¹² Waijoi tahe Edõ sumy aõbo rỹira butumy ritakre ihãre hãwa hãwamy rỹira ribi tule. Tuu heka ariwonyrenykre relekremy. Jiarỹ, iòlò, wedu nihikỹ tuu rarybereri. ¹³ Itxu tahe ioholemy rareri kiau tahe (trigo) aõwesele raymynykre aõwesele rahekre, uva tahe sõemy reotekre aõwesele rasonykre rahekre raruỹdỹỹkre. Sõemy tahe reotekre uva-ò, iruỹ tahe ixidee wilemy reakre, bero wesemy. ¹⁴ Waijoi tahe ròtena ribi aritaka tasureny-ò ariwebuaresedỹỹnykre. Tii mahãdu tahe ixyby hãwa riywinyrenykre ibinamy noimy rare ribi tai rahãwanyrenykremy. Uva tahe rioworunyrenykre ibemy riõmy roirekremy; iraty riherenykre tatòbòrenymy. ¹⁵ Waijoi retòbrònyre tamyreny suu rewahinyreki, tiu tahe tii mahãdu iribi rohonyõtyhy. Jiarỹ, iòlò awedureny, tuu rarybereri.