¹ Ka heka rybe Haeli mahãdu bededyynana rare Deuxu Amos dee riwahinyre, budoeni-di loredumy Tekoa hãwãludu. Kiahe tuu rutyynyre inatxi wyramy suu ramytatare koki, Uzia Juda Iòlòmy raremyhy bedeu, Jeroboaõ Joas riore tahe Haeli Iòlòmy aremyhy. ² Amos rarybere: — “Siaõ hawalo Jerusalẽ-ki, Deuxu tarurumy narybemyhyde irybe wodyy biumyta wesemy. Bederoasi raytenymyhyre, ihare ibutumy rarubumyhyre Karmelo Hawalo bedeki”. ³ Deuxu weduhuky rarybere: — Damasy (Damasco) mahadu, sõemy oraruna riwinymyhyrenyre, sõetyhymy, taiki aõhykymy arisynyrenykre. Tiiboho Gileade mahadumy raryynyrenyre ityrereny aririradyynykre rurawona womatimy jurá ⁴ Taiki tahe ariworonykre heotydi Hazael Iòlò heto, kaa iwo lê risõkre tule ijõ heto Benhadade Iòlò horõ. ⁵ Arotynykre Damasy hawarotena tobona-ò ibutumy arahukre Biqueate-Avem tule Bete-Eden, riwedumy ryimyhyre mahadu. Siria mahãdu aritaataamy aridyrenykre Quir suo. Diary wedutyhy rarybereri. ⁶ Deuxu weduhuky rarybere: — Gasa mahãdu sõemy oraruna riwinyrenyre, taiki kynyhe aõhykymy arisynyrenykre. Tiiboho ridyrenyre taataanamy ihawaludu mahãdu ridyrenyre tule idi rohonyrenyre Edom mahãdu wetxumy. ⁷ Tai tahe heotydi ariwosinykre Gasa wotena, rahukre ihawaludu mahãdu tyhyna. ⁸ Arikõdyynykre Asdoke Iòlò boho Ecrom hãwãarahukre ijõ filisteu mahãdu tule arihukre Diary weduhuky rarybereri: ⁹ Deuxu weduhuky rarybere: -Tiro mahãdu sõemy oraruna riwinyrenyre sõereki kynyhe aõhykymy arisynyrenykre ridyrenyre taataamy Edom bede-ò hãwãwitxira mahãdu tiiboho wana widee biowamy roirekremy raryberenyre harele. ¹⁰ Taiki Tirohãwãwotena aritokonykre tii heotyle ihãwãtyhyna ritoonykre. ¹¹ Deuxu weduhuky rarybere: — Edom hawaludu mahãdu oraruna riwinyrenyre sõemy, sõetyhyreki tahe diary aõhykymy arisynyrenykre. Taseriore boho deehekyle woumy rekoarenyre, Haeli mahãdu taiki tamyreny ratoenyõtyhy. Edonita mahãdu debure ixawiõhykyre, kiemy roludumy roiremyhy ¹² Taitahe Temy hãwãheotydi ariwosinykre, kaa iheotyle Bosra ruruterena riwosinykre ¹³ Deuxu weduhuky rarybere: — Amon hãwãludu mahãdu oraruna sõemy riwinyrenyre,sõetyhyreki, diary aõhykymy arisynyrenykre. Wou rohonykre bedeu timahadubo Gileade hãwãtahawamy rimyrenykremy, ibedeu tahe tiiboho hawyy botomy ryimyhy mahady weryri ritxuarenyre. ¹⁴ Tai tahe, Raba hãwãrotena heotydi arisõkre iheotyle iahãwãruruterena riwosinykre. Sõemy wou rohonykre, habu ryrymy raaõbinanyrenykre. ¹⁵ Iòlò wedu mahãdu wana taataamy rirahukre. Diary wedutyhy rarybereri.