4
عیسی آزمایش
1
اونموقع روحْ عیسی یَ بوبورد بیابانْ تا اِبلیس اونَ وسوسه بوکونه.
2
عیسی چهل شبانه روز روزه دَأشته، و آخرسر اونَ ویشتا بوبُست.
3
اونموقع وسوسه گر اونِ ورجَه بأمو و بوگوفت:«اگر تو خدا پسری، بوگو تا اَ سنگانْ نان بوبود»
4
عیسی جواب بدَه:«بینیویشته بوبُسته؛ انسانْ فقط نانِ اَمرَه زنده نییه، بلکی هر کلامی اَمرَهْ کی خدا دَهَنِ جَه صادر بِه.»
5
بعدْ ابلیس اونَ بوبورد اورشلیمْ و پیلدانه معبدِ بامِ جُر اونَ بپا بداشت،
6
و بوگوفت:«اگر تو خدا پسری، خودتَ تَأوَأد بیجیر، چون بینیویشته بوبُسته، خدا خو فرشته یانَ دربارۀ تو فرمان دِهه تا ترَه خوشَأنِ دسَأنِ رو بیگیرد، نوکونه تی پا سنگی یَ بوخوره.»
7
عیسی اونَ بوگوفت:«بله، ولی هون کیتابِ میَأن بینیویشته بوبُسته؛ تی خداوند خدایَ امتحان نوکون»
8
بعد ابلیسْ اونَ بوبورد ایتَه بلندِ کوه جُر و همۀ جهانِ ممالکَ، و اوشَأنِ شکوه و جلالَ اونَ نیشان بدَه،
9
و اونَ بوگوفت:«اگر بکفی و مرَه سُجده بوکونی، همۀ اَشَأنَ ترَه بخشم.»
10
عیسی اونَ بوگوفت:«دورَ بون ای شیطان، چون بینیویشته بوبُسته؛ فقط تی خداوند خدایَ پرستش بوکون و فقط اونَ عبادت بوکون.»
11
اونموقع ابلیس دورَ بوست و فرشته یان بأمود و اونَ خدمت بوکودد.
عیسی جلیلِ جَه خو خدمت شروع کونه
12
وختی عیسی بیشتَأوست کی یحیی بازداشت بوبُسته وَأگردست جلیل.
13
بعدْ ناصره یَ ترکَ کود و بوشو کفرناحومْ و اویَ ساکن بوبُست. کفرناحومْ دریایِ جلیلِ کنارْ و زِبولون و نَفتالی نزدیکی نَهه.
14
اَ اتفاق دکفت تا اِشعیایِ نبی پیشگویی انجام بیگیره کی بوگوفته بو:
15
«زِبولون و نَفتالی سرزمین، سرزمینهایی کی دریا مسیرِ میَأن قرار دَأرد، و رودِ اُردنِ اوطرف، و جلیلِ بیگانه یانْ.
16
قؤمی کی تاریکی میَأن زندگی کوندْ نوری عظیم بیدد، و اوشَأنی رو کی مرگِ سرزمینِ سایه دورون زندگی کوند نوری بتَأوست.»
17
عیسی از اون روز به بعد شروع بوکود موعظه کودَأن و بوگوفت:«توبه بوکونید چون آسمانِ ملکوت نزدیکه.»
عیسی اولین شاگردان
18
وختی عیسی دریایِ جلیلِ ساحلِ دورون قدم زَئه، دو تَه برأرْ یعنی شمعونِ معروف به پطرسْ و اونِ برأر آندریاسَ بیده که دریا میَأن دام تَأوَأدد، چون اوشَأن مالا بود.
19
عیسی اوشَأنَ دخَأد و بوگوفت:«می دونبال بَأئید تا شمرَه مردمِ صیاد چَأکونم.»
20
اون دو نفر هو لحظه خوشَأنِ دامانَ ولَ کودد و اونِ دونبال راه دکفتد.
21
عیسی اویِ جَه ایبچه دورَ بوست و دو تَه برأرِ دیگر، یعنی یعقوب زِبِدی پسرْ و اونِ برأرْ یوحنایَ بیده کی قایقِ دورون نیشته بود و خوشَأنِ دامانَ تعمیر کودد، عیسی اوشَأنم دعوت بوکود.
22
اوشَأنم هو لحظه قایقْ و خوشَأنِ پئرَ ولَ کودد و اونِ دونبال راه دکفتد.
مریضانِ شفا
23
عیسی همۀ جلیلَ گردسته و کنیسه یانِ دورون اوشَأنَ تعلیم دَئه و هر جا فأرسه یه خدا ملکوتِ مژده یَ موعظه کوده، و مردمِ هر درد و مرضَ شفا دَئه.
24
پس اونِ نامْ همۀ سوریه میَأن مشهور بوبُست، و همۀ کسانی کی انواعِ مرضانَ مبتلا بودْ و دیوانه یانَ و غشی یانَ و فَلجانَ اونِ ورجَه اَوردد و اونْ اوشَأنَ شفا دَئه.
25
پس جمعیتِ زیادی کی جلیل و دِکاپولیس و اورشلیم و یهودیه و رودِ اُردنِ اوطرفِ شین بودْ اونِ دونبال راه دکفتد.