2

¹ ایتَه مردای جی لاوی قبیله خو قبیله جَه زن بوبورد. ² اونِ زن حامله بوبُست و ایتَه پسر بودونیا بأورد. وختی اونِ مار فَأندِرِست و بیدِه کی زَأی، قشنگِ زَأیی ایسِه، اونَ سه ماه جیگا بدَه و وَأنَأشت کسی زَأیَ بیدینِه. ³ ولی چون نِتَأنِسته ویشتر جی اَن زَأیَ جیگا بده، جی لوله ایتَه سبد چَأکود، و اونِ پوشت و پَألیَه قیر وَسِه تا آب اونِ بودورون نیشِه، بازن او زَأیَ اونِ دورون بنَه و بوبورد رودخانه کنار لوله کله دورون بنَه. ⁴ او زَأیِ خَأخور جی دور ایسَه بو و فَأندِرِستِه کی زَأیِ سر چی اَیِه. ⁵ هَ موقع فرعونِ دختر بأمو رودخانه کنار تا خو جانَ آب بزنه، و اونِ کنیزانم خوشَأنِ رِه رودخانه کِنار گردستِد کی سبدَ لوله کلِه دورون بیدِد، فرعونِ دخترم خو ایتَه جی کنیزانَ اوسِه کود تا سبدَ بأوره اونِ ورجَه. ⁶ وختی سبدِ درَ وَأکود، پسر زَأیَ بیدِه کی گریِه کودَأن دوبو، پس اونِ دیل او زَأیِ رِه بوسوخت و بوگوفت:«اَ زَأی، عبرانیانِ زَأکانِ جَه یِه»7 ⁷ هَ موقع زَأیِ خَأخور بوشو فرعونِ دخترِ ورجَه بوگوفت:«خَأئید بوشوم ایتَه جی عِبرانیان شیرده زنَأکانَ شیمی ورجَه بَأورم تا زَأیَ شمرِه شیر بده؟» ⁸ فرعونِ دختر اونَ بوگوفت:«بوشو بأور». پس اون دخترم بوشو او زَأیِ مارَ بأورد. ⁹ فرعونِ دختر او زنَ بوگوفت:«اَ زَأیَ بوبور و شیر بدن و مرَن پیلَه کون، من تی مُزدَ ترَه فَأدم». پس اون زنم زَأیَ اوسَأد و بوبورد و اونَ شیر دَأئِه. ¹⁰ وختی زَأی پیلِه ترَه بوست، اونِ مار اونَ بوبورد فرعونِ دخترِ ورجَه و اونم اونَ خو زَأیِ مَأنستَأن قبول بوکود، و اونِ نامَ بنَه «موسی»، چره کی بوگوفت:«اونَ جی آب بیگیفتم»

موسی فرار

¹¹ وختی موسی پیلَه بوست بوشو کی خو قؤمَ بیدینه، و فَأندِرِست بیدِه کی خیلی دُشوار کار کودَأن دِرِد، هَه موقع بیدِه کی ایتَه مصری ایتَه عِبرانیَه کی موسی برَأرَأنِ جَه بویَ زَئَن دِرِه. ¹² خُب همه طرفَ فَأندِرِست، وختی بیدِه کسی نِئسَه، اون مصریَ بوکوشت و اونِ جنازه یَه فورشِ جیر جیگا بدَه. ¹³ فردایی موسی بازم بوشو عِبرانیانِ ورجَه و بیدِه کی دو نفر عبرانی دعوا گیفتَن دِرد، موسی جولو بوشو و اونی کی اوی تَه یَ زَئَن دوبویَ بوگوفت:«چره تی برَأرَ زَئَن دری؟» ¹⁴ اون مردای جواب بدَه:«کی ترَه اَمی میَأن قاضی بوکوده؟ نوکونه خَأیی مرَم بوکوشی؟ هوطو کی اون مصریَ بوکوشتی» موسی اَ حرفَ کی بیشتَأوست بترسِه و خو مرَه بوگوفت:«حتماً اَ خبر چو دکفته و همه بفهمسته دَأرد» ¹⁵ وختی اَ خبر فرعونِ گوش فَأرِسِه، بخَأست کی موسی یَ بوکوشه. ولی موسی فرعونِ دسِ جَه فرار بوکود و بوشو «مِدیانِ» سرزمینِ دورون سامان بیگیفت. ایروز اویَ ایتَه چاه سر نیشتِه بو، ¹⁶ کی مدیانِ کاهن، یعنی «یِترونِ» هفتَ دخترَأن بأمود اویَ، و چاه جَه آب فَأکشد و آبخورأنَ پورَه کودد تا خوشَأنِ پئرِ گله یَ آب بدد. ¹⁷ ولی بعضی جی چوپانان جولو بأمود و یِترونِ دخترانَ دورَ کودد تا خوشَأنِ گله یَأنَ آب بدد. اونموقع موسی ویریشت و چوپانانِ جولویَ بیگیفت، بازن دخترانَ کمک بوکود تا خوشَأنِ پئرِ گله یَ آب بدد. ¹⁸ وختی دخترَأن خوشَأنِ پئر یِترونِ ورجَه وَأگردستد، اون بوگوفت: «چره ایمروز اَقدر زود وَأگردستید؟» ¹⁹ اوشَأن جواب بدَأد:«ایتَه مصری مردای اَمرَه کمک بوکود و چوپانانِ جولویَ بیگیفت، و اَمرِه چاه جَه آبَم فَأکشِه و گله یَ آب بدَه» ²⁰ اون خو دخترانَ بوگوفت: «اون کَ یَ ایسَه؟ چره اونَ شیمی مرَه نَأوردید؟ بیشید اونَ دعوت بوکونید بَأیِه اَیَه و اَمی اَمرَه غذا بوخوره» ²¹ موسی اونِ دعوتَ قبول بوکود و اوشَأنِ ورجَه سامان بیگیفت، یِترونم خو دختر «صفوره» یَ موسی رِه عقد بوکود. ²² و اون زن، موسی جَه حامله بوبسُت و پسری بودونیا بأورد و موسی اونَ «جِرشون» یعنی غریب، نام بنَه، چره کی بوگوفت:«غریب سرزمینِ دورون سامان بیگفتم» ^{23 24} چن سال بوگوذشت و مصرِ فرعون بِمرد، ولی بنی اسرائیل هوطو سابقِ مَأنستَأن برده بود، و همیشه ظلمی وَسی کی اوشَأنَ بوسته رِه نالِستِد و خدا جَه یاری خَأستِد. خدا اوشَأنِ آه و ناله یَ بیشتَأوست و عهدی یَ کی اوشَأنِ اَجداد، یعنی ابراهیم و اسحاق و یعقوبِ مرَه دوَسته بویَ بخاطر بأورد. ²⁵ پس خدا هم جی رویِ لطف اوشَأنَ فَأندِرِست و تصمیم بیگیفت کی اوشَأنَ جی اَسیری و بردگی نجات بده.