2

¹ ای برأرأن، دربارۀ اَمی خداوند عیسی مسیحِ وَأگردستَأنِ موضوع، و اَمی جمعَ بوستَأن اونِ دؤر و وَر، شیمی جَه خواهشی دَأرم ² شیمی آرامشَ جی دس ندید و وَأنألید اَ حرفأن شمرَه مضطرب بوکونه، حتی اگر بوگوید پیام نبوّتی ایی دریافت بوکودد، یا پیغامِ خاصی خدا جَه بیگیفته دَأرد، یا حتی اِدعا بوکوند اَمی جَه نامه ایی دریافت بوکوده دَأرد با اَ مضمون کی خداوندِ روز فَأرسه دَأره، شمرَه گفتَأن درم کی مُطلقاً باور نوکونید. ³ وَأنألید هیچ کس هیچ جور شمرَه گول بزنه، چون اون روز فَأنرسه مگر اَنکی اول ایتَه پیلدانه شورش بر علیه خدا اتفاق دکفه و اون هلاکتِ زأک، یعنی اون بی دینِ مردَأی ظهور بوکونه، و بازن اون روز فَأرسه. ⁴ اون هر چی اَمرَه کی خدا دخَأده بیبه یا پرستش بیبه مخالفت کونه و خودشَ بوجُرتر جی همه قرار دِهه، تا جایی کی خدا معبدِ دورون نیشینه و اِدعا کونه کی خودش خدایه. ⁵ شمرَه به خاطر نَأیه کی وختی شیمی ورجَه ایسَه بؤم همۀ اَشَأنَ شمرَه بوگوفتم؟ ⁶ خودتان دَأنید کی چی باعث بِه اون الان ظهور نوکونه، چون اون فقط زمانی ظهور کونه کی اونِ وخت برسه بِه. ⁷ هَسَه هم شرارت کار کودَأن دره، ولی هر موقع قدرتی کی اونِ کارِ مانع بِه جی میَأن اوسَأده بیبه، اون شرارت آشکارا کار کونه، ⁸ اونموقع اون بی دین ظاهر بِه و عیسایِ خداوند خو ظهورِ درخشندگی مرَه اونَ کوشه، و خو ظهورِ پورشکوهِ اَمرَه اونَ نابودَه کونه. ⁹ اونْ بی دینْ شیطانِ قدرتِ اَمرَه ظهور کونه و کارهایِ عجیب و مُعجزاتِ اَمرَه همه یَ فریب دِهه. ¹⁰ کسانی کی اونِ گولَ خورد اوشَأنی ایسد کی راهِ راستَ گومَه کوده دَأرد و هلاکتِ راه میَأن ایسَد. اوشأنْ اَن وَسی هلاکَ بود کی نخَأستِد حقیقتَ دوس بدَأرد تا نجات پیدا کوند. ¹¹ پس خدا هم اوشَأنَ تَوَهمَ دوچارَ کونه تا اَ دُروغانَ باور بوکوند. ¹² و چون راستی و حقیقتَ قبول نوکودد بلکی شرارتِ جَه خوشحالَ بوستد، مَحکوم بوبود.

استوار بِئسید

¹³ اما ای برأرأن و ای خداوندِ عزیزان، اَمَأن وَأستی همیشه خدایَ شیمی وجودِ وَسی شُکر بوکونیم، چون خدا شمرَه جی هون اول انتخاب بوکود تا بواسطۀ روح القدسِ قدرتْ و اون ایمانی کی راستی یَ دَأرید تقدیس بوکونه و نجات بده. ¹⁴ هَنه وَسی اون نجاتِ مژده یَ از طریقِ اَمَأن شمرَه برسَأنی و شمرَه دعوت بوکود تا اَمی خداوندْ عیسی مسیحِ جلالِ دورون شریک بیبید. ¹⁵ پس ای برأرأن اُستوار بِئسید، و اون تعالیمی کی چی شفاهاً، چی نامه نیویشتنِ مرَه شمرَه یاد بدَأئیمَ مُحکم بدَأرید. ¹⁶ اَمی خداوند عیسی مسیح خودشْ، و اَمی پئر خدا کی اَمرَه محبت بوکود و خو فیضِ وَسی اَمرَه آرامشْ و اُمیدِ جاودانی ببخشه، ¹⁷ خودش شیمی دیلانَ آرامش عَطا بوکونه و هر کارِ دوروست و گفتارِ دوروستِ دورون شمرَه اُستوار بوکونه.