¹ Yi zɔ̀mà nɛ́, nyì-zwennə Abəjaasɛ zɔ̀m mɔ́. Nyǐ Cǐnnə, Bə-zhɔ-zhe zɔ̀mà nɛ́ ń zɔ̀m Edɔmɛ yil mó, zɔ̀mà nɛ́ zɔ̀m nə wɔ̀ : Nə́ nyɛ̀ɛ̀ Bə-zhɔ-zhe twĩ̀ ń tùmtúm n bə̀ ń nə̀ ń zɔ̀m tənèsé wẽ́ ń zhe : Zɛ̃̀-na dɛ̃̌ á vò á bú ǹdə́ Edɔmɛ. ² Bə̀ nyǐ à m’a ce Edɔm jǐrh námpɔ́lɛ́ tənèsé cəcəl wə, ǹ mà n yə̀ kɔn bə̀ la pɔ̀ɔ́sɛ dɛ̃́dɛ̃́. ³ Bə̀ ǹ cìn-byilu mú ǹ wẽ́ mó dwĩ̀ mú, ǹmyɛ́ mɔ̀bɔ́ ǹ jě nə́kuulí bwə̌l mó w mó. Ǹ jě dɛ̃̌ pyàr rɛ́ yó mó, ń zɛ̃̀ ǹ tə̀ rə̀myɛ́ yil ǹ nə́ ǹ zɔ̀m ǹ wẽ́ ǹ zhe : Wɔ́ mɔ̌ ń mà cìrh ne n ji tɛ̃́ cɛ y yó mó ? ⁴ Bá ǹ gə zɛ̃̀ n vò ń cĩ́ ǹ jǎl dɛ̃̌dɛ̃̌ ǹdə́ zúm ta myɛ, bá ǹ gə zhə̀l ń cĩ́ ri dɛ̃̌ càmmə́sɔ̌sɛ́ yó myɛ, À m’a cìrh mó a ji tɛ̃́, wɔ́ àmyɛ́ Bə-zhɔ-zhe à zɔ̀m rɛ. ⁵ Sə, ŋwɔ̀là ráá lyì byɛ̀bɛ́ bə̀ n’ê bubu wẽ̀, gə tu ǹ sono cəcɛ̃ nɛ, wɔ́ ǹ yò zhìlì ! Bə̀ nə wàr ǹ jɛ̃̀ kɔn rɛ́ nánzhəzhɔ̌ bə̀ m’a pwà dɛ̃́dɛ̃́ nà ? Sə lyì bí byɛ̀bɛ́ bə̀ n’ê vùr də̀vɛ̃́, də̀vɛ̃́ cǒ byǎ wẽ́ mó gə tú ǹ sono, È nə də̀ cèmé né byǎ bɛ́ pur rí dúdú ni bə̀ la yõ̌ tɛ̃́ nà ?… ⁶ kɔn nyɛ̌ ǹdə bə̀ gə́ zɔ Ezəyu bə kɔkɔlɛ nɛ́ mɔ́ ta ! Kɔn nyɛ̌ ǹdə bə̀ gə́ nɔ ń nə̀cɛ̀ndɛ́ jàà y shò né mó ta ! ⁷ Byɛ̀bɛ́ ǹmyɛ́ ǹdə́ bə̀myɛ́ y’à co dwã yó mó, nyǐ bə̀ zɛ̃̀ bə nyáásɛ ǹ yó bə jì mú bə ce swɛ̃́ rɛ́ nɛ, ń dɔwabá yú ǹ yó, bə wɛ̀rhɛ́ mɔ́ bə̀ gə́ n’ê yǎl nɛ́, Byɛ̀bɛ́ bə̀ y’à n’ê tó mó bə̀ jí mú, zɛ̃̀ bə cĩ́ pɔ̀mɔ̀ tɛ̃́ ǹ yé né, sə ǹ yə̀ ò nyí ni lwar yé ! ⁸ È nə də̀ dɛ̃ rɛ́ rə̀myɛ́ mɔ́ yùwə̀, Bə-zhɔ-zhe wə̀l bə̀, À m’a ce Edɔmɛ surhə cìnə́ bé jé tɛ̃́, a ce lárma cìnə́ bé Ezəyu pyɔ̀ w yó mó jé tɛ̃́ mɔ́ nà ? ⁹ Ǎ Təmanɛ, wu-zɛ̃̀ɛ̃́ m’a zə ǹ búlə́ kàndar rɛ́, bə̀ byɛ̀bɛ́ bə̀ ŋwɛ́nɛ́ Ezəyu pyɔ̀ w yó mó gakó b’a cì bə bɔ́bɔ̀rɛ́. ¹⁰ Wɔ́ ǹ jàn tumə né ǹ nə́ ǹ twĩ̀ ǹdə́ ǹ da-byǐ Zhakɔbɛ mɔ́ yilə, Cìzhìl b’a pú mú, Ǹ b’a jé cɛ y yó byinə nə̀ bə zhɔ̌ zhe yilə. ¹¹ Bə̀ dɛ̃ rɛ́ tɛ̀bɛ́ zhələ bé tú bə zə ń shə̀dɛ́ɛ́sɛ́ bə vò yóm ré jè mó, Dɛ̃ rɛ́ tɛ̀bɛ́ zhələ bé tú bə zù ń cɔ w w mɔ́, bə kə́ Zhərəzalɛm bùrsí mú, Lwar bə̀ ǹmyɛ yà ǹ tó ǹ wɔ́ ǹdə bə̀ ta. ¹² Zwini gə tú rə̀ zhe ǹ da-byǐ dɛ̃, sə ǹ bə̀ká swéné rə̀ yil yé, ǹ bə̀ká fùù Zhidə byǎ bɛ́ yò zhìlú mú dɛ̃ rɛ́ yù w yé, Sə ǹ bə̀ká wə̌rh ǹ nyí nã́-ewòrhó bə̀ zúzúnú dɛ̃ rɛ́ yù w yé. ¹³ Ǹ bə̀ká tó à dwi rí cɔ w bwə̀rsé ń zù rə zúzúnú dɛ̃ yù w yé, ǹ bə̀ká fùù dɛ̃ tɛ̀bɛ́ rə̀ yò zhìlì mú yù w yé, ǹ bə̀ká zə ǹ jɛ̃̀ ń dwə̀rh rə̀ jɛ̃̀-kɔn nɛ rə̀ yò zhìlù dɛ̃ rɛ́ yù w yé ! ¹⁴ Ǹ bə̀ká vò ń zhì sə-jar yó ń gu byɛ̀bɛ́ bə̀ dùr mó yé, sə ǹ bə̀ká zə byɛ̀bɛ́ bə̀ dùr bə lú ń pə zúzúnú dɛ̃ yù w yé ! ¹⁵ Lwar bə̀ Bə-zhɔ-zhe dɛ̃ rɛ́ bwəlse, tənèsé gakó yilə, Bə̀ m’a wɛ̀rhɛ́ ǹdə ǹmyɛ gə́ wɛ̀rhɛ́ nɛ́ ta ; Ǹ tũ̀-twə̃̀ə̃̀ né b’a jòm ǹ yó wə. ¹⁶ Ǹdə á gə́ nyɔ̀ à pyɔ̀ w náàcɔ̀nɔ̀ w yó né, Wɔ́ èta tənèsé gakó la b’e nyɔ̀ nɛ́ twéé twéé ; Sə b’a nyɔ̀ sə lyì, Sə j’à j’â zhǐ ǹdə sə̀ yə̀ lũ ní yàl gaga ta. ¹⁷ Sə Vwǎrh mɔ́ b’a yə̀ Sənyɔ̃ pyɔ̀ w yó, ò b’a yə̀ náàcɔ̀nɔ̀, Zhakɔbɛ kɛ̀lɛ́ b’a k’a kwè è jààsɛ́ nyí rí. ¹⁸ Zhakɔbɛ kɛ̀lɛ́ b’a yə̀ myǐn, sə Zozɛfu kɛ̀lɛ́ y b’a yə̀ myìn-zhù ; Ezəyu kɛ̀lɛ́ y b’a yə̀ gɔ ò n’ô ji ǹdə́ ò n’ô jí myǐn ; sə kaka t’â la Ezəyu kɛ̀lɛ́ kùr yó yál yé, bə̀ wɔ́ Bə-zhɔ-zhe ń zɔ̀m. ¹⁹ Sə wɔ́ byɛ̀bɛ́ bə̀ ŋwɛ́nɛ́ Nəgɛvɛ nɛ́ mɔ́ bə̀ b’a cìní Ezəyu pyɔ̀ wa, byɛ̀bɛ́ bə̀ ŋwɛ́nɛ́ vɔ̀lɔ̀ w mɔ́ b’a cìní Fələsətɛ̃bá tənà yá ; bə̀myɛ́ bə̀ m’a cìní Efərəyimi ǹdə́ Samarɛ nyí rí ; Sə wɔ́ Bɛ̃zhamɛ ń bà n cìní Galadɛ. ²⁰ Esərayɛl byǎ bɛ́ byɛ̀bɛ́ bə̀ zɔ yóm ré mú b’a cìní tənà y kɛ̀bɛ́ Kanaã lyì bí jě è wẽ́ e m’e vò Sarəpəta, Sə Zhərəzalɛm lyì bí byɛ̀bɛ́ bə̀ ŋwɛ́nɛ́ Səfaradɛ nɛ́ mɔ́ b’a cìní Nəgɛvɛ cɛmɛ nɛ́. ²¹ Zwennə b’a vò Sənyɔ̃ pyɔ̀ w yó, bə kə́ Ezəyu pyɔ̀ w bùrsi ; Bə̀ wɔ́ Bə-zhɔ-zhe ń cǐ pyɛ̀lɛ̀ rɛ́.