koussoube-marc-lee_1ti_text

Kǝ̀kàl-fwɛ̀lɛ̀ 1

¹ Wɔ́ àmyɛ́ Pwǝǝ, nǝ́ zwennǝ Yi ǹdǝ́ Yezu Kristǝ mó nǝ́ zhí mú, pɔ nɛ ŋwɔ̀nɔ́ a jǐrh Yezu Kristǝ tùntúm. ² Timote, wɔ́ àmyɛ́ à n'â kɛ̃ sɛ́bɛ́ rɛ́ tɛ̀bɛ́ à la mɔ́ pɔ. Ǹ wɔ́ à byǐ zhǝ̀n zhǝ̀nà Yi-ni-zhú mú wẽ́. Nǝ́ Da Yi ǹdǝ́ nǝ́ Cǐnnǝ Yezu Kristǝ m'a cĩ́ bwǝl ǹ yó, sǝ bǝ dùr ǹ nɔ̀nɔ̀, bǝ pɔ̃́ yǝ̀-zùlǝ́. ³ À n'â lwǝ̀l mó bǝ̀ ǹ mɛ̃ mɛ̃ Efɛɛzɛ nɛ, ǹdǝ à gǝ pɔ mɔ́ nyí a m'a zhǐr a vò Masɛdwaanɛ nɛ́ mɔ́, mùnì ga ń cǝ̀r lyì bí byɛ̀bɛ́ bǝ̀ ŋwɛ́nɛ́ gàà bǝ̀ n'ê byili kɔn dɛ̀bɛ́ rǝ̀myɛ́ ǹdǝ́ Yezu Kristǝ yò-ècɔ̀nɔ̀ nyí rí dǝ̀ rǝ̀dù mú. ⁴ Byili bi bǝ̀ bǝ̀ yẽ̌ kɔma bɛ́ ǹdǝ́ nǝ́ nàmbala bɛ́ nyǝ̀ná nǝ́ t'â zhɛ̀ bɔ́ nyú w mú ni, bǝ̀ nǝ̀ n'ê twí ǹdǝ́ nyǝ̀-pǎr. E nyì-pǎr rɛ́ t'â la ce Yi tum rí vò yé. ⁵ Nyí rí tɛ̀bɛ́ à pɔ mɔ́ èta mɔ́, wɔ́ mùnì ga sónó w kɔ̀bɔ́ ò n'ô shí wu kɔ̀bɔ́ ò bǝ dóó zhe, ǹdǝ́ Yi-ni-zhú páá wẽ́ mó yǝ̀ nɛ́. ⁶ Lyì jàlà ywǝ̀r bǝ yẽ̌ sɔ́á y èmyɛ́ nɛ, bǝ k'â n'ê zɔ̀m zɔ̀mà nyɛ̀bɛ́ nǝ̀ bǝ kùr zhe. ⁷ Bǝ̀ n'ê yǎl bǝ yǝ̀ Muyiisi nyǝ́ né byilnǝ, bǝ̀ j'à yǝ̀l nǝ̀ kùrǝ̀ yé. Bǝ̀ n'ê zɔ̀m ǹdǝ́ bǝ̀ jàn gakó, bǝ j'à yǝ̀l tɛ̀bɛ́ bǝ̀ n'ê zɔ̀m mɔ́ mye kùr yé. ⁸ Nǝ́ yě bǝ̀ nǝ́ gǝ n'é zǝ nyǝ́ né nǝ́ kwe nǝ́ sɔ́má, nǝ̀ càn. ⁹ Nǝ́ mǝ̌ sǝ nǝ́ lwar bǝ̀ Yi yǝ̀ nǝ́ nyǝ́ né pɛ wu-cángá cìnǝ́ yil yé. rǝ̀ pɔ nɛ byɛ̀bɛ́ bǝ̀ t'â zwẽ rǝ́ nyí ni mú, ǹdǝ́ byɛ̀bɛ́ bǝ̀ t'â nyàm rɛ mɔ́, ǹdǝ́ lyì-bǝlwǎlsɛ́ ǹdǝ́ yǝ̀-bǝlwàálɛ́ cìnǝ́ yilǝ, e súlí byɛ̀bɛ́ bǝ̀ t'â dùr rǝ̀myɛ́ ǹdǝ́ kɔn dɛ̀bɛ́ rǝ̀ wɔ́ rǝ̀myɛ́ nyǎn mɔ́, ǹdǝ́ byɛ̀bɛ́ bǝ̀ n'ê gwi bǝ̀ dabá ǹdǝ́ bǝ̀ nábá mɔ́, ǹdǝ́ lyì-gurnǝ bé gakó yilǝ. ¹⁰ Yi pɔ rǝ̀ nyǝ́ né byɛ̀bɛ́ bǝ̀ n'ê fwǝ̌l mó ǹdǝ́ bala bɛ́ byɛ̀bɛ́ bǝ̀ n'ê jí ǹdǝ bǝ̀ gǝ́ y'a jí kɛ̃ nɛ́ mɔ́ ǹdǝ́ byɛ̀bɛ́ bǝ̀ n'ê zal bǝ̀ dwã bɛ́ bǝ̀ yè mó, ǹdǝ́ byɛ̀bɛ́ bǝ̀ n'ê gòm kɔma mɔ́ yilǝ, e súlí byɛ̀bɛ́ bǝ̀ y'a bwǝl nyí bǝ j'à t'â pyìrh re mó, ǹdǝ́ byɛ̀bɛ́ gakó bǝ̀ tùntwǝ̃̀ǝ̃̀ né t'â tó kàrmɔ́ mɔ̀bɔ́ mǝ̀ wɔ́ zhǝ̀n mɔ́ yilǝ. ¹¹ Kàrmɔ́ mǝ̀myɛ́ mɔ́ n'ê shí yò-ècɔ̀nɔ̀ nyí rí rǝ̀ ce nǝ́ lwar Yi zùwǝ́ y pár mɔ́ wẽ́. Wɔ́ Yi rí tɛ̀bɛ́ rǝ̀ ce à n'â bwǝ̀l yò-ècɔ̀nɔ̀ nyí rí mú sõ wu-nyɔ̃̀ w ò bǝ dõ zhe mó n'ê shí ní. ¹² À n'â ce nǝ́ Cǐnnǝ Yezu Kristǝ nǝ̀báná, ń pɔ nɛ jàn, n jà n nyǐ ni, n bù b'à wɔ̌ ń tum rí à la tũ̌, n kwè re n pɛ̃ mɔ́ yilǝ. ¹³ E jà shãã ga, à y'à n'â fulsi mu, à n'â tùrh mo, à n'â nwɛ̀nɛ̀ ń kwã-lyì bí. À gǝ́ y'à gwẽ̌ yǝ̀ mɔ́ zwì mú ce à y'à yǝ̀l tɛ̀bɛ́ à n'â wɛ̀rhɛ́ mɔ́ kùr yé, sǝ nǝ́ Cǐnnǝ mó dùr à nɔ̀nɔ̀. ¹⁴ Ń yò-ècɔ̀nɔ̀ w já dɛ̃́dɛ̃́ ǹdǝ́ nɛ, ń ce a zhí mu, n jà n pɛ̃ sónó kɔ̀bɔ́ ò n'ô shí Yezu Kristǝ wẽ́. ¹⁵ Bǝ̀ n'ê byili bǝ̀ Yezu Kristǝ tú lũ w wẽ́, mùnì n vwǎrh yǝ̀-bǝlwàálɛ́ cìnǝ́. Sǝ zɔ̀mɛ̀ rɛ́ rǝ̀myɛ́ wɔ́ zhǝ̀n cìcì. Lyì bí gakó mǝ̌ sǝ bǝ zwẽ re. Wɔ́ àmyɛ́ à yǝ̀-bǝlwàá lɛ́ já du. ¹⁶ Sǝ Yi gǝ́ dùr àmyɛ́ mɔ̀bɔ́ à yǝ̀-bǝlwàálɛ́ já mɔ́ nɔ̀nɔ̀ mɔ́, wɔ́ mùnì ga Yezu Kristǝ jɛ̀rɛ̀ n tó àmyɛ́ dɛnnɛ n byili ń wu-bɔ̀nɔ̀ wá. Èta, amyɛ́ jǐrh myɔrhɔ lyì bí byɛ̀bɛ́ bǝ̀ bàn mɔ́ zú bǝ nǝ nyǔ mǝ̀ t'â la zhɔ̌ mɔ́ yilǝ. ¹⁷ Yi nǝ còrhó! Rǝ̀ wɔ́ pyɔ̌ mɔ̀bɔ́ ń pyɛ̀lɛ̀ rɛ́ bǝ zhɔ̌ zhe, n jà ń tá ń cì yé. Wɔ́ ńmyɛ̌ dúdú ń wɔ́ Yi, ń mǝ̌ ǹdǝ́ còrhó ǹdǝ́ zùwǝ́, byilǝ nǝ̀ bǝ zhɔ̌ zhe yilǝ! Amɛn! ¹⁸ À byǐ Timote, kɔn rɛ́ tɛ̀bɛ́ à la mɔ́ byilu mú wɔ́ ǹdǝ tɛ̀bɛ́ Yi nyì-zwennǝ bé y'à jɛ̀rɛ̀ bǝ byili ǹ shò-kwã nɛ́ mɔ́ nɛ. Rǝ̀ b'a sɛ̃ mɔ́ ń bú búlǝ́ nyɛ̀bɛ́ nǝ̀ càn ¹⁹ ǹdǝ́ Yi-ni-zhú ǹdǝ́ wu kɔ̀bɔ́ ò wɔ́ wárhgáá. Lyì jàlà t'â wɛ̀rhɛ́ kɔn dɛ̀bɛ́ bǝ̀ n'ê bùl bǝ̀ wẽ́ bǝ̀ rǝ̀ càn mɔ́ yé, bǝ̀ Yi-ni-zhú mú j'a tó gàà mǝ zhìlì. ²⁰ Yimene ǹdǝ́ Alɛsãdǝrɛ ŋwɛ́nɛ́ lyì bí bǝ̀myɛ́ mɔ́ wẽ́, sǝ à co be Shǝtana jɔ̃̀ wa, munì ga bǝ lwar bǝ̀ bǝ̀ bǝ mǝ̌ sǝ bǝ tùrh Yi yé.