1 Ba Yawe, bombeleni pali babo ababombela pali nemo; lweni nababo abalwa na nemo. 2 Pokeni ikisolelo ikinini ne kikulu; imeni ne kungafwa nemo. 3 Bofyeni umusumbo wenu ne tupasa twankondo kuli babo abakombutusha; labileni ku mweo wangi, ''Ninemo ikya kupusha kyenu.'' 4 Lekeni abo aba fwaya ubumi bwangi balengeshiwe isoni nekusulwa. Lekeni nababo abapingila ukusomesha ba bwelele kunuma nekubafulunganya. 5 Lekeni babe kwati misungu na kabesha, ngefyo malaika waba Yawe abantafya. 6 Lekeni inshila shabo shifite ne kuteshima, ili malaika waba Yawe ali kubatamfya. 7 Kwakubulaumulandu banteya ubukonde bwabo; kwakubula mulandu balisepele ikilinji kyabumi bwangi. 8 Lekeni ubonaushi bubatangilile mukukumya. Lekeni ubukonde balya bateya bubakwati abene. Lekeni baponenemo abene, kukubonaula. 9 Lomba nkaba uwakusangalala muli ba Yawe kabili nekusekela mukupusuka kwakwe. 10 Onse amafupa angi akalabila, ''Ba Yawe, ninani ulikwati ni mwebo, upokolola abamanikilwe kuli babo aba kwatishe amakosa palibo kabili neba landa nebalekabila kuli babo abali kufwaya ukubebila?'' 11 Imboni ishitashilungeme shaima; nekushinina ifyabufi. 12 Bali kumbwesesha ikibi pakiweme. Ndi ne bulanda. 13 Lomba, ili balwele, nalifwele amasaka; nalishikilwe ne nsala mukuba lombelela ne mutwi ka kunamina pakibi yangi. 14 Nalile ne kinkonko pa mukwasu; nali konkomene mpashi mukulilakwati nikuli ba mama. 15 Lomba ili nali ntuntwile, kabasangalala ne kubungana pamo mukungimina, kabili nkambakumya kabampasaula ukwakubula ukuleka. 16 Ukwabubula umukinshi kabantupika; kabasumanya ne meno yabo pali nemo mubukali. 17 Ba Shikulu, nimpindi inga iyo mwakunkeba? Mpulusheni umweo wangi ukufuma kukwingililwa kwabonaushi, kwabumi bwangi kumabokwe. 18 Kabili nkamisachileni pakulonga ukukulu; nekumitoteni pwbumba ilikulu. 19 Mwileka abalwani bangi abakungongola basangala pali nemo; Mwibaleka bapinte imilanguluko yaba ibipile. 20 Pantu tabalabilapo ifya mutende, lelo balantika amashiwi aya kongola kuli babo abekala mu kyalo kyesu mutende. 21 Balashinkula utunwa twabo apakula mukungimakanina; balilabile, ''Aha,Aha, amenso esu akimona.'' 22 Mwakimona, ba Yawe mwiikala kelele; ba Shikulu, mwiba ukutali ukufuma kuli nemo. 23 Bukaima wemwine kubukingo bwangi; ba Lesa bangi kabili ba Shikulu bangi, fimbileni ne mikichile yangi. 24 Mpokololeni, ba Yawe ba Lesa bangi, pa mulandu wabulungami bweni; mwibaleka basangalale pali nemo. 25 Mwibaleka balabile mu mitima yabo, ''Aha, twapoka iki twali kufwaya, ''Mwibaleka balabile, ''ati twamulya.'' 26 Balengeshiwe insoni kabili basulwe abo abasangalala ili na fikilwa nefya malwa. Lekeni abo abalitota abene pali nemo ba fwikwe ne insoni ne kusebana. 27 Lekeni abo abafwaya ukufimbilwa babilike nensansa kabili ne kutemwa; lekeni ba labile lyonse, ''Ba Yawe batotwe, uyo usangalala mumibele yamu bomfi wakwe.'' 28 Lelo nkalabila ifyololokele kabili neku mitoteni akasuba konse.