¹ Sombi iki kyalifichishe Yona kumuchima kabili alifichilwe sana. ² Kanshi Yona alitembele kuli ba Yawe kabili ne kulabila, '' A, ba Yawe, ifi tefi nalabile lukoso ilyo nabwekele ne kuba mu kyalo kyangi ne mwine? Emulandu nakichile pakutendeka kabili ne kubutukila ku Tashishi _pakuchi nalishibile achi muli ba Lesa abakikuku, inkumbu, bakokola ukufitwa kabili abali mu butemwe bwakikupu, kabili mulakokola ukutuma ifi nkunkuma. ³ Fyopelefyo pano, ba Yawe, namipapateni, fumyeni ubumi wangi muli nemo, pakuchi kyangwa mina ukufwa ukukila ukwikala ne bumi. ⁴ Ba awe balilabile, ''bushe kyawama achi webo ufitwe sana?'' ⁵ Penka Yona alifuminemo mu mushi kabili ne kwikala ku kabanga ka mushi. Kulya alipangile ikya kwi kalamo ne kwikala munshi yakyo mu kantelele pakuchi engamona ikyakumumonka mumushi. ⁶ Ba Yawe ba Lesa bali teyenye ikilimwa ne kukilenga ukukula peulu pali pakuchi kingaba kantelelwe pamutwi wakwe kuku kefyako kupelelwe kwakwe. Yona alisekele pamulandu wa kilimwa. ⁷ Sombi ba Lesa baliteyenye umwambo pa kufuma kwa kasuba ku makya ubushiku ubwa konkelepo. Alilukukile kilimwa kabili ne kilimwa kyalilelele. ⁸ Kyalishile ne kubachi ili kasuba kafumine ubushiku ubwakonkelepo kumakya, ba Lesa baliteyenye ikipupu ikikabile ikya ku kabanga. Kabili, ne kasuba kalipumine pashi pa mutwi wakwa Yona kabili alipungile. Penka Yona alilangulukile achi kanshi nga afwa. Alabila kumwine, ''Kyabapo na bwino kuli nemo ukufwa ukukila ukwikala ne bumi. ⁹ Penka ba Lesa bali labile kuli Yona, ''bushe kyawama achi webo wafitwa pa mulandu wakilimwa? Penka Yona alilabile, ''Kilifye bwino achi fitwe, nangu lukoso ne kufwa.'' ¹⁰ Ba Yawe balilabile,'' Waba ne nkumbu ya kilimwa, iki tawabombelepo nkito, nangu webo ukukilenga ukukula. Kyalikulile ubushiku kabili ne kufwa ubushiku. ¹¹ Kanshi kuli nemo, tekuchi mbe ne nkumbu pa Ninive, ulyo mushi umukulu, umo umuli abantu ukukila pa 12,000 abo tabeshibilepo ubupusano ubuli pakachi ka kuboko kwabo ukwa kulyo ne kuboko kwabo ukwa kukuso, kabili ne namaiingi.