¹ Nine Jakobo, nemupyungishi waba Lesa, kabili ne waba Shikulu Yesu Kilishitu, ndukusekela imkoka ya bantu ba ba Lesa ikumi naibili ipalanganine pakyalo konse kyapanshi: Mitende mwane! ² Mwebakwasu, pakuponena mufyakwesha ifingi kumufyebati, lishuko. ³ Pakuti mulishi ati, ukweshiwa kwakuketekela kwenu kulalenga kuteke mitima. ⁴ Popele umutimanteka wenu ngaupyunge imilimo yaaabo, iwaminine, ati, namwebo mukalukuli bawaminine, abakubulo kupengelapo neli kantu. ⁵ Sombi kani pali mwebo umbi takwete mano, ngaalombe kuli ba Lesa, popele bakamupela, pakuti balabapela bonse nebupe ne luse. ⁶ Sombi webo, ngo ketekele ili ulukutembela, nekubulo kukanika mumutima neli panini. ⁷ Uyo ukanika ali koti linkapa ilyapeshiba, ilitwalwa kukipupu. ⁸ Lomba umuntu uwakubefyo uwamitima ibili ulukukanika, elangukukati nkapoka akantu kuli ba Shikulu. ⁹ Sombi umukwasu upengele ngasangalale ili ba Lesa bamusuntula, ¹⁰ kabili nemukwasu umubile, ngasangalale ili ba Lesa bakamukefya. Pakuti umubile akapitilila koti liluba ilyamumpanga. ¹¹ Pakuti akasuba kalukutula nekukalipo kwakuti nekokele mbuto, nemaliba alapona panshi, lomba bulombe bwalilyo bwashila. Fyepepefyo efili nemubile akonalwa pampindi alukulyanshika pamilimo yakwe. ¹² Alishukile uyo muntu ulamo kuketekela ili esa amapesho pali ye, pakuti ili apita mukweshiwa, akapoke kilambu kyamweo, ubalaile ba Lesa ukubapela abo abalukutemwa. ¹³ Abantu bonse pakweshiwa, tekulabila ati, ''Ni ba Lesa ebalukungesha koku.'' Pakuti ba Lesa tabeshiwa kufibipile, nabo abene tababeshapo abantu nrli umo. ¹⁴ Sombi abantu bonse baleshiwa pakutwala ne kwikatwa ukukumbwa kwabo ukubipile abene. ¹⁵ Popele ukukumbwa kwabo ukubipile kulu kwimita, nekufyalo kubifya, nekubifya, nako pakukula kulafyala mfwa. ¹⁶ Tekutumpaikwa mwebakwasu, mwentemenwe. ¹⁷ Ifiweme fyonse nefintu ifiwaminine fyonse ifitupoka, filafuma kwiulu, filafuma kuli ba Lesa, abalengeshi bakutuba kwa kwiulu abatabaluka, neli kwaluka konse, neli kulengeshe mfinshi pakusholokabo ¹⁸ Abene koti kufwaya kwabo bali tufyele kwishiwi lyabukine, ati tukabe bakutanga pafilengelwe fyonse.'' ¹⁹ Langulukenifyo, mwebakwasu mwentemenwe! Abantu bonse ngababe bakumfwa bwangu, sombi balukuli bakukokola pakulabila, kabili balukuli bakubule kufitwa bwangu. ²⁰ Pakuti abantu abafitwa tabakito kulungama kwaba Lesa. ²¹ Pakuti pali fyefyo muleke ukubifya konse, nefyakukita fyonse ifibipile ifimukita. Musumine kuli ba Lesa nekupokeshiwa ili babyala mumitima yenu, ilikwete amakosa akupulusha myeo yenu. ²² Sombi mwebo mube bakukita ifyo ifibalukulabila, tekuba bakumfwa lukoso abalukuli tumaika koku. ²³ Pakuti ulukumfwa lukoso ishiwi nekubulo kulikita ali koti muntu ulukulitamba mwikalashi, nekulukulibwene ifyali umwine. ²⁴ Pakushilo kulitamba umwine, penka alilubako nafyefyo ifi ali. ²⁵ Sombi uyo utamba mwifunde ili waminine, ilikakulula bantu nekulukulikutika utali wakumfwa lukoso nekulubako, koku, Sombi alukulikita, uyo ba Lesa bakashukishe milimo yakwe. ²⁶ Pali mwebo kani umuntu alukulyebati nebo ndakindika ba Lesa lomba nekubulo kukanyo lumini lwakwe, uyo alukulitumpaika mumutima wakwe, nekukinda kwakwe, kwalukoso. ²⁷ Ifya ifi ba Lesa ba wishifwe babona ati kukindika ukuswetele ukwakine nikuku, ukulama bana banshiwa nabamukamfwilwa pakupenga kwabo, nekuli lama ukulukuli wakubule fibipile ifya mukyalo kyapanshi.