¹ Kwa sababu hiyo, wandugu zangu, ninyi ambao mumeitwa na Mungu na kuwa watu wake kama vile sisi, mufikiri sana juu ya Yesu, anayekuwa mutume na Kuhani Mkubwa wa imani tunayotangaza. ² Yeye alikuwa mwaminifu mbele ya Mungu aliyemusimika kwa kazi ile, sawa vile Musa alivyokuwa mtumishi mwaminifu katika kazi ya nyumba yote ya Mungu. ³ Mujengaji wa nyumba anaheshimiwa zaidi kuliko nyumba yenyewe. Hivi vilevile Yesu anastahili kupewa heshima kubwa zaidi kuliko Musa. ⁴ Ni kweli kila nyumba inajengwa na mtu, lakini Mungu ndiye aliyejenga vitu vyote. ⁵ Musa alikuwa mtumishi mwaminifu katika nyumba yote ya Mungu, kusudi ashuhudie maneno ambayo Mungu angesema nyuma. ⁶ Lakini Kristo ni mwaminifu kama Mwana anayesimamia nyumba ya Mungu. Na sisi ndio nyumba ile, kama tukiendelea kuwa na uhodari na kuaminia kupata mambo tunayotumainia. Mapumziko Mungu anayotayarishia watu wake ⁷ Kwa hiyo, kama vile Roho Mtakatifu anavyosema: «Leo ikiwa munasikiliza sauti ya Mungu, ⁸ musifanye mioyo yenu kuwa migumu kama babu zenu walivyofanya wakati walipomuasi Mungu, sawa siku ile walipomupima katika jangwa. ⁹ Kule babu zenu walinipima na kunijaribia, ingawa walikuwa wameona yote niliyotenda kwa muda wa miaka makumi ine. ¹⁰ Kwa sababu ile nilikasirikia kizazi chao, na kusema: Watu hao wanapotoka mioyo siku zote. Nao hawafuati njia zangu. ¹¹ Basi nikaapa kwa kasirani kwamba hawataingia kwenye mapumziko niliyowatayarishia!» ¹² Basi wandugu zangu, muangalie vizuri, kati yenu kusikuwe mtu mmoja mwenye moyo mubaya wa kutokuamini, aliyefikia hata kujitenga mbali na Mungu Mwenye Uzima. ¹³ Lakini muonyane kila siku kwa muda wote ambao lile neno leo linalotajwa lingali linatuelekea kusudi hata mmoja wenu asikuwe mugumu kwa kudanganywa na zambi. ¹⁴ Kwa maana sisi wote tunaishi katika ushirika na Kristo ikiwa tunachunga mpaka mwisho lile tumaini tulilopata kwa mwanzo. ¹⁵ Maandiko Matakatifu yanasema: «Leo ikiwa munasikiliza sauti ya Mungu, musifanye mioyo yenu kuwa migumu kama babu zenu walivyofanya wakati walipomuasi Mungu.» ¹⁶ Ni watu gani waliosikia maneno ya Mungu na kumwasi? Si wale wote walioongozwa na Musa toka katika inchi ya Misri? ¹⁷ Tena, ni watu gani waliomukasirisha Mungu kwa muda wa miaka makumi ine? Si wale wote waliofanya zambi wakaanguka na kufa katika jangwa? ¹⁸ Tena ni watu gani Mungu aliowaapia kwamba hawataingia kwenye mapumziko aliyowatayarishia? Si wale waliokataa kumutii? ¹⁹ Basi tunaona kwamba hawakuweza kuingia kwenye mapumziko yale kwa sababu ya kutokuamini kwao.