¹ Mẽ save la deiẽ ju-la,i ke hive tã ki malize. ² Pu ha wom-iela kele pãse sélmã la ie ko,mun ki bãddji ke xahadeu,mun pa ke obei ho papa i ho mamã,mun pa ke humiasiu ha ki ufe pu li,mun ki pa ka hespete bagaj phóp dji Bõdje, ³ a mun ki pa gãiẽ kõtatmã pu wát mun-iela,ki pa ka padonẽu,mun ki le vo pase wát mun-iela,a mun ka sutxi kate nuvél dji un mun ki i fe bagaj ki pa jis mẽ i save ki ha mun-la pa fe ãiẽ,ie pa dominẽ ie phóp ko,ie ke bat fam ie ke gãiẽ pi boku élmĩ dji biẽ, ⁴ i ke gãiẽ wom ke deie wát fam,mun ki pa gãiẽ ãtãsio ke ho ko,mun kõtã vãte ki pa mele ke wát mun -iela,ki kõtã pi boku tã-la dji ki kõtã Bõdje. ⁵ Gãiẽ viaz dji lapen,mẽ hepãtxi dji u puvwa.Hale u ko dji ie. ⁶ Un dji ha de wom-iela ka ãthe la kaz-iela pu txẽbe fam ki pa bõ,ki plẽ ke pexe ie vinĩ ke tut plezi dji ie ko. ⁷ Ha fam-iela sãhãtã ie ka ãphan,mẽ ie pa jẽ gãiẽ kapasite dji hive la un konétmã dji lavehite. ⁸ Dji mãiẽ ki Janes e Jambres ie pa obei Moisés,a kõhã osi methés ki ka kuienẽ mun ie pa obei lavehite; a mun ki ka fe pexe la ho lesphwi,ie fie a pa lavehite. ⁹ Mẽ ie pa ke ale thop lwẽ,pu ha ki pa gãiẽ konétmã-iela i akle pu ie tut,ã ke ha ki pa gãiẽ konétmã-iela dji ha de wom-iela. ¹⁰ Mẽ u gãiẽ pu maxe la ha ki mo mõtheu,kõpohta u ko, ha ki u save, fie,ãtan, kõtatmã, ke paxãs; ¹¹ I maxe, sufhui, ha ki fet ke mo la Antióquia , Icônio e Listra. Mo sepote mun ki te ka maxe deie mo, i Sẽié sase mo, i txihe mo dji ie. ¹² Ẽbe tut ha ki le viv dji un mãiẽ ke lapen la Jezi khi ie ke u le maxe deie. ¹³ Mun ki ka dji ki sa wát mun , mẽ i pa ha mun-la ie ke tonẽ pimal, ie ke kuienẽ wát ie ke Kuienẽ ie osi. ¹⁴ U mem, hete la ki u ãphan i phã ke fie; u save ke ki mun u ãphan. ¹⁵ Dji pi kã u te pitxit u konét pahól Bõdje haki puve feu konét salvasiõ dji fie ki la no Sẽié Jezi Khi. ¹⁶ Tut Pahól ekhi a pu Bõdje,i ĩpohtã pu mõthe , pu hete un mun, pu hãje i pu mõthe la lwa; ¹⁷ Dji mãiẽ dji un wom dji Bõdje puve gãiẽ abilite i Kapasite pu fe un bõ thavai.