¹ Amango Yesu ayandagal'oku ntondo, chigusho chinene ch'abantu cha mukulikira. ² Haboneka omu benzibenzi amushimba, afukam'embere zage anamubwira: Nahano, akabw'olonzeze, wakanjira mwerukweru.

³ Yesu alambul'efune, amuhumako, aderha: Ndonzez'obe mweru kweru. Hanaho afum'ebibenzi byage. ⁴ Yesu ashubi mubwira: Ntay'obwirage, s'alik'ojichiyerekan'emo mugula w'eshengero, onahan'entulo yawe nk'oku Musa abarhegekaga, libuba buhamirizi bw'okufuma kwawe.

⁵ Eri Yesu aj'e Kapernaumu, mukulu muguma w'enfola miherho amuj'eburhambi, ⁶ amuyinginga n'oku mubwira: Nahano omwambali wani alyamir'omu mwani, aly'alibuzwa bwenene n'endwala y'okuhorhol'ebirumbu.

⁷ Yesu amubwira: njinayinja nana mufumya.

⁸ Oyo mukulu w'enfola miherho amushuza: Mani, Nahano, nta kwanene mp'oje omu mwani, si woy'oderhe mwazi muguma gonyine n'omukozi wani afuma. ⁹ Bulala nani, ntegekwa na b'abakulu, eri na njira nani abasirika ntegeka, nkambwir'oyu mpu: Genda, anagenda. Nkabwira n'owindi, mpu: yinja, anayinja. Na nkabwir'omukozi wani mpw'ajire hilebe! Ana hijira.

¹⁰ Eri Yesu ayunva ntyo, asomerwa, abwir'abamukulikire mpu: Mbabwirir'okuli, ntasagi bona bwemere bunganaha omu Israeli. ¹¹ Nku bwirire, banene njiba yinja barheng'ebushoshokero bw'ezuba na bandi emunda lizikira, n'okulya haguma n'Abrahamu, Isaka na Yakobo omu bwami bw'empingu. ¹² Aliko abana bw'omwami bowe nji bakabulirw'omu mwizimya ndunduli, omo nji kwaba kulaka n'oku hekeny'amenyo. ¹³ Okuhandi, Yesu abwira oyo mukulu w'enfola miherho: Gendaga! Bikubere nk'oku wa yemerere! Mwako kachanji konako, oyo mukozi wage afuma.

¹⁴ Eri Yesu ahik'aha mwa Petero, ashigana Nazala wa Petero alyamire, eri alwer'eshushira. ¹⁵ Amuhuma oku kuboko, n'eshushira lya mulika, ab'azuka, anabakolera. ¹⁶ Byabere golo bamulerher'abantu banene bagwarhirwe n'abazimu; alibisy'abazimu n'omwazi gwage, anafumya abalilwere boshi, ¹⁷ mpu ly'omwazi gw'omulebi Isaya guhikirira, bulal'aderhagw'oku: Arholer'obuzamba bwerhu an'abarhul'endwala zerhu.

¹⁸ Lero eri Yesu abon'abantu banene banene bamuzungulukire, arhegeka mpu bashabukir'oku chindi chishabuko. ¹⁹ Mwigiriza muguma amuj'ahaburhambi amubwira mpu: Nahano, na kushimb'aha wankaja hoshi.

²⁰ Yesu amushubiza: Banyambwe bajir'olukunda, n'enyunyi z'emalunga zijir'enyogo; s'aliko mwene- muntu yewe arhajir'ahakaheb'erhwe.

²¹ Owindi w'omu begirizwa bage amubwira mpu: Ondike ntange njihamba darha.

²² Aliko Yesu amushubiza amubwira: Onkulikire, olek'abafu bahamb'emifu yabo.

²³ Yesu aja omu nkuge, abegirizwa bage bamukulikira. ²⁴ Hanaho, omulaba gw'azuk'omu nyanja, kuger'ah'enkuge yabwiraga ya zika. Yewe eyali ero. ²⁵ Abegirizwa bage bamu shegerera, bamuchula bamubwira, mpu: Nahano, gufa kuno, orhurhabale!

²⁶ Nay'ababwira, mpu: Chichi chirhumire mwayubaha, bantu bw'obuyemere bugeke? Av'azuka, akalihir'empusi n'enyanja, n'omurhula gw'aba.

²⁷ Abantu basomerwa baderha: Oyu alinde baza, chiro n'empusi n'omulaba bimukengere?

²⁸ Eri Yesu ahik'oku chishabuko ch'enyanja omu chihugo ch'e Wagerasi, bantu babiri bazimuhirwe babugana naye, barhenga oku mashinda, b'akalihire bwenene, chiro na ntamuntu wakachihandir'okugera mw'eyo njira. ²⁹ Bamubwene, barhondera bayama n'omulenge gunene baderha: Bichi warhushondako, Mwene Nyamuzinda? Oyinjire hano mpu ly'oba warhulibuz'embere z'ebichanji?

³⁰ Hale nabo, halir'obuso bw'engulube zalemaga zalya. ³¹ Abo bazimu bamushigirira bamubwira; oka rhulibisya, orhurhegeke rhuje mw'obu buso bw'engulube.

³² Yesu ababwira, mujemo. Boshi barhenga mwabo bantu baja mw'obwo buso; na ntyo ezo ngulube zalibirhir'omu nyanja, zoshi za zika mw'ago menji. ³³ Abangere balemaga baziyabula balibirha, baja eka, babala engani yoshi, chi bwenen'engani yabo bantu balizimuhirwe. ³⁴ Nantyo abantu boshi ba mw'echo chihugo bashimba Yesu, bamushigirira achichunde hale n'echihugo chabo.