¹ Jesus sai di ki lugar i bai pa rezion di Juda na utru ladu di riu Jurdon, manga di djintis bai si traz utru bias. I nsina eles suma ki kustuma fasi. ² Farizeus tchiga e puntal: ´´Sta diritu pa omi kaba ku si mindjer?'' ³ I ruspundi: '''Kal orden ku Moises da bos?'' ⁴ E fala: Moises seta pa alguin skirbi karta di kaba kasamenti i kaba ku si mindjer''. ⁵ Jesus fala elis: ''I pabia di bo risu korson ku Moises skirbi e lei. ⁶ Ma, na kumsada, 'Deus fasi elis macthu ku femia'. ⁷ 'Pabia di es ku omi ta disa si pape ku mame i junta ku si mindjer ⁸ elis dus e ta bida un kurpu son'. ⁹ Pabia des, kil ku Deus junta alguin ka pudi kaba elis kasamentu''. ¹⁰ Otcha e sta ba na kasa, disipulus torna puntaL mas un bias sobri es asuntu. ¹¹ I fala elis: ''Tudu kil ku serka si mindjer i kasa ku utru, i kai-tchai. ¹² Si el i kaba ku si omi i kasa ku utru, i kai-tchai''. ¹³ E tisiL ba mininus pa i pudi pui si mon riba delis, ma disipulus tudji elis. ¹⁴ Otcha Jesus oja kila, i panha raiba, i fala elis: ''Bo disa mininus bin pa mi ka bo tudji elis, pabia reinu di Deus i pa djintis ku parsi ku elis. ¹⁵ Na bardadi na konta bos: tudu kil ku ka risibi renu di Deus suma mininu, di nin um manera i ka pudi entra nel''. ¹⁶ Nton, I risibi mininus i pui mon riba delis i bensua elis. ¹⁷ Otcha I na bai si kaminhu, un omi kuri si traz, i finka djudju Si dianti i punta: ''Bom Mestre, ke ku na fasi pa yarda vida ku kata kaba?`` ¹⁸ Jesus puntal: '' Pa ke ku tchumam bom? Ninguin ka bon si ka son Deus. ¹⁹ Bu kunsi mandamentus: Ka bu mata, ka bu fasi adulteriu, ka bu furta, ka bu konta mintida pa alguin, ka bu ngana alguin, rispita bu pape ku bu mame'''. ²⁰ Omi fala: ''n´kumpri tudu es kusas desdi odjan rapas''. ²¹ Jesus djubil i amal, I falal: ''Un kusa faltau; bai, bindi tudu ku tene bu da pa koitadis, bu na tene rikesa garandi na seu. De la, bu ta bin bu siguin''. ²² Ma omi, koitanda ku es palavra, i sai tristi i bai pabia i tene manga di rikesas. ²³ Jesus djubi pa ladu i fala Si disipulus: ''Kuma ki difisil pa rikus entra na reino di Deus!''. ²⁴ Disipulus adimira ku Si palavras. Ma, Jesus torna fala elis mas: ''Fidjus, kuma ki difisil entra reinu di Deus! ²⁵ I mas fasil pa un kamelu fura na buraku di gudja, di ki un riku entra na Reinu di Deus''. ²⁶ E sta ba tarpadjadu e papia ku nhutru: ''Nton, kin ku pudi salva?'' ²⁷ Jesus djubi elis I fala: ''Pa omis i ka pudi sedu, ma i ka pa Deus''. ²⁸ Pedru falaL: Anos ku disa tudu pa tras no siguiu''. ²⁹ Jesus fala: ''Na bardadi na konta bos, i ka ten kinki disa kasa, ermons matchu ku femias, mame, pape, fidjus o eransa pabia di Mi i pabia di Evangeliu ³⁰ ki ka na risibi sem bias mas, gosi nes mundu, kasas, irmons matchu, irmons femia, mames, eransas, ku pirsiguisons; ku mundu ku na bin, vida ku ka ta kaba. ³¹ Ma manga delis ku sedu purmeru na bin sedu ultimu, kilis ku sedu ultimu na bin sedu purmeru''. ³² E sta ba na kaminhu, subida pa Jerusalem, Jesus na bai ba se dianti. Kilis ku na siguiL ba panta e staba ku medu. Jesus utru bias tchoma dozi aparti, I kumsa na fala elis kusa ku na sedu ku El ku ka na tarda: ³³ ''Ali no sta na subi pa Jerusalem Fidju di Omi na ntregadu pa chefis di saserdotis ku skribas. E na kondenaL pa mortu e na ntregaL pa djintius. ³⁴ E na fasiL trosa, e na kuspiL, e na sutaL i e na mataL. Ma dipus di tris dia, I na lanta di mortu''. ³⁵ Tiagu ku Jon, fidjus di Zebedeu, bin pa El e falaL: Mestri, no misti pa bu seta pididu ku no na fasiU''. ³⁶ I fala elis: ''Ke ku bo misti pa nfasi bos?''. ³⁷ E ruspundi: ''Setanu sinta ku Bo na Bu gloria, un na Bu direita utru na Bu skerda''. ³⁸ Ma Jesus fala elis: ´ ''Bo ka sibi ke ku bo na pidi. Bo pudi bibi kalis suma kil ku Na bibi, o bo pudi guenta batismu suma kil ku Na batizadu nel?''. ³⁹ E rupundiL: ''No pudi''. Jesus fala elis: ''Suma kalis ki na bibi, bo na bibil tambi, ku batismu ku na batizadu nel. ⁴⁰ Ma i ka Mi ku ta da diritu di sinta na mon direita o na mon skerda, ma i pa kin ku kila purparadu pa el''. ⁴¹ Otcha kil utrus des disipulus obi kila, e panha raiba di Tiagu ku Jon. ⁴² Jesus tchoma elis pertu dEl I fala: Bo sibi kuma kilis ku konsideradu governantis di djintius e ta domina elis, i se chefis garandi ta manda ku forsa riba delis. ⁴³ Ma i ka dibidi sedu des manera na bo metadi. Kilis ku disdja sedu garandi na bo metadi, dibidi sedu bo kriadu, ⁴⁴ i kil ku disdja sedu purmeru na bo metadi, i dibidi sedu katibu di tudu. ⁴⁵ Pabia Fidju di Omi ka bin pa djinti tarbaja pa El, ma pa tarbadja pa djinti i pa da Si vida pa kaplinti manga delis''. ⁴⁶ I e bin pa Jeriko. Octha ki Jesus na sai di Jeriko ku Si disipulus ku manga di djintis, un omi tchomadu Bartimeu, fidju di Timeu, un pididur di simola, i sinta ba pertu di strada. ⁴⁷ I obi kuma yera Jesus, Di Nazare, ku sta ba na pertisi, i kumsa na grita i na fala: ''Jesus, Fidju di Davi, ten pena di mi!''. ⁴⁸ Manga di djintis na kalantalba e na falal pa i kala. Ma i na gritaba ainda mas: ''Fidju di Davi, ten pena di mi! ⁴⁹ Jesus para i manda elis pa tchomal. Nton e tchoma segu, e falal: ''Korazen! Lanta! I na tchomau''. ⁵⁰ I bota si kamisoti, i jukta i bai pa Jesus. ⁵¹ Jesus, ruspudil, I fala: ''Ke ku misti pa Nfasiu?''. Segu falaL: ''Rabi, pa ntorna odja''. ⁵² Jesus falal: ''Bai, bu fe ku kurau''. Na mesmu ora, i oja i pega Si tras.