¹ Litimapim God Yawe. Blesin i stap wantaim man husat i save harim tok bilong God Yawe, husat i save amamas tru long ol lo bilong em. ² Ol lain tumbuna bilong em bai i kamap strong long dispela graun na ol lain tumbuna bilong stretpela man bai i kamap planti. ³ Moni na kago em i pulap long haus bilong em na stretpela pasin bilong em bai i stap oltaim. ⁴ Lait i save lait long tudak long ol stretpela man. Em i gutpela, stretpela man na man bilong marimari. ⁵ Ol samting i save kamap gut long man husat i save mekim gut long ol narapela manmeri na givim dinao moni long ol na mekim ol wok bilong em wantaim stretpela pasin. ⁶ I nogat wanpela samting bai i surukim em na stretpela man bai i stap long tingting bilong ol man olgeta taim. ⁷ Em ino save pret long tok nogut .Em i stap strong na em i save bilip long God Yawe. ⁸ Man bilong bel isi, i no save pret na em i save em bai i winim ol birua bilong em. ⁹ Man bilong givim long ol rabis man na stretpela pasin bilong em bai i stap oltaim na God bai apim em na onarim em. ¹⁰ Na man nogut bai i lukim dispela na em bai i belhat. Em bai i belhat na kaikai tit bilong em na em bai i pinis nating. Laik bilong bel bilong ol man nogut bai i pinis.