¹ Long dispela nait king i no inap long slip. Em tokim ol wokboi bilong em long kisim i kam ripot bilong wok i bin kamap aninit long lukautim bilong em na ol i ritim strong dispela ripot i go long king. ² Ol i painim aut olsem Modekai i bin tokim stori bilong Bigtana na Teres, em tupela ofisa bilong king husait i save lukautim bikpela dua, em tupela tasol i laik bagarapim king Asueras. ³ Na king i askim, "Wanem samting bai givim biknem na luksave i go long Modekai long em i mekim dispela?" Yangpela wokman bilong king i tok, "Nogat wanpela samting ol i mekim long em." ⁴ King i tok, "Husait i stap insait long banis?" Haman i kam insait long narapela autsait banis bilong haus bilong king na i tokim em olsem, em i laik hangamapim Modekai long rop antap long pos em yet i sanapim long em. ⁵ Wokboi bilong king i tokim em, "Haman i sanap insait long banis." Na king i tok, "Larim em i kam insait." ⁶ Taim Haman i kam insait, king i tokim em olsem, "Bai yumi mekim wanem samting long givim biknem i go long man husait king i save amamas long en?" Na Haman i tokim em yet olsem, "Husait em bai narapela man moa bai king i amamas na givim namba na biknem i go long em moa long mi?" ⁷ Haman i tokim king olsem, "Long husait man king i gat amamas long givim namba na biknem, ⁸ larim em i werim klos king i save werim na sindaun antap long hos, king i save sindaun antap long en i gat bilas bilong king long het bilong dispela hos. ⁹ Givim dispela klos na hos i go long ofisa bilong king husait i gat gutpela nem. Larim ol i bilasim dispela man husait king i gat amamas long givim namba na biknem, larim ol kisim em long hos na raunim olgeta hap long biktaun. Larim ol i tokaut long pes bilong em, 'Dispela kain samting i save kamap olsem, taim king i save amamas long givim biknem i go long wanpela man!'" ¹⁰ Olsem na king i tokim Haman, "Hariap, kisim ol klos na hos, olsem yu yet i tokim pinis na mekim dispela long Modekai, dispela man Juda, husait i save sindaun long dua bilong king. Noken abrusim wanpela samting olsem yu bin tokim." ¹¹ Orait Haman i kisim klos na hos. Em i bilasim Modekai na kisim em long hos i go long olgeta han rot bilong biktaun. Em i go pas long Modekai na tokaut olsem, "Dispela kain samting i save kamap taim king i amamas long givim biknem long wanem man em i laikim ." ¹² Modekai i kam bek long dua bilong king. Tasol Haman i hariap tru i go long haus bilong em na karamapim het bilong em wantaim laplap na krai nogut tru. ¹³ Haman i tokim Seres meri bilong em na tu ol wantok bilong em long wanem ol samting i kamap long em. Ol wokman bilong em husait i gat gutpela save bilong skelim toktok na meri bilong em Seres i tokim em olsem, "Sapos Modekai em man husait yu brukim skru long en, em man Juda, yu no inap tru long daunim em, tasol bai yu i stap aninit long em." ¹⁴ Taim ol i wok long toktok wantaim em i stap, ol ofisa bilong king i kam kamap. Ol i hariap long kisim Haman i go long pati kaikai bilong Esta i redim.