¹ Pooro, muini buroko bua bora Yesu Kristu, ndo muan'inyiti Timote, u wene Firemon indjuiti ndjua ruwondo ndo mbaya yitu ndjua ngunu, ² U wene panga yiti Afia, u wene Arshipe mbay'ayiti ndjua itumba, ndo u ekerezia bora Ndjambe yini yiy'ukata mburu'awa . ³ Ntshongo ndo poro djini dja mik 'punu ubora ishiti Ndjambe ndo bora Kumu Yesu Kristu djar'ando yini. ⁴ Nda nkareshika Ndjambe maranga shoko sha shikimi. Ndake shiki rukombo ruawa shoko sha shikimi u maromboro mami. ⁵ Shini ande ndake woko rushanga ru ruwondo ndo maweshere mana miya ndo wa u Kumu Yesu ndo amburu a bana babakimi baweshe. ⁶ Nda nombok'ande, mayekere mi maweshere mawa mara ma moniyo u mayebere ma meye ma makimi mamasheke miti ishini Kristu. ⁷ Muana maye nda mare wara ndo bunyaka bua buiki ndo makitiri ma nteme ishini ruwondo ruawa, shini ku wene miteme nya bin'ikini nyiyi nya kiti. ⁸ Keke ndisheke war'ande ndiy'ando bunono buabukime u Kristo bu yi tomo ande ukere runu rua nguare wene ruerakere, ⁹ Ndaki rombo ishini ruwondo, shoko sheke ishini miyi, Pooro, inunu ra moto, ndo buika buika kekangowo muini buroko ishini Yesu Kristu. ¹⁰ Ndak'irombo ishini muana mi Onezime ndju'aboto miyi, miyi ndjua kanda minambu. ¹¹ Ishin'ande awara shoko sheke ngona ngona, ishini wene, anik'amawiyi moto ndjua nganga uboro buaw'ake u miyi. ¹² Nda ikarash'ande, yande yono yiy'ando nganga u nteme muami. ¹³ Ndareke wesh'ande ndi nondo ngam'ando mi, kek'ande ipuasha ngunu u iraka rawa, itanga rini rimiyi u kata minamba ishini rusangu rarusheke. ¹⁴ Kek'aki she ra weshe u kere rueyi a rumoko mi bere toko woko buanya buawa, shin'ande shi nda wesh'ande busheke bunu bukere wene areke buare ngo nde ba ikereshe a bunono, keke djare u ruwondo ruawo. ¹⁵ Shoko sheke buakapasha buin'ande ku itenye ritanga, keke bukarake monosho shera shera. ¹⁶ Kuap'ande ikarawara ngo ntshiowo keke yara ureke ntshiowo, ngo muanyitu ndjua ruwondo, Yiyi ndjua ruwondo rua buiki ishini miyi mi mene, ndo yiyi ndjua reke ishini wene, ndjarek'ukata rutuko ndo ukata Kumu. ¹⁷ Mbe ndjar'ande wua mposhoko ngo mbayawu ndjua ngunu, wu nguay' a yande ipu imoko ando miyi. ¹⁸ Ndo mbe ndjar'ande yi yikereshe bube, mbe kuap'ande yiy'ando mbat 'awu, ishiki u ntshu muami. ¹⁹ Miyi Pooro ndaka bi mpundu ando iyate rame miy'amene ande ndi kakarere, u bere iwibir'ande wiyi a mbat'ame,wene we mene wiyi mbat'ami. ²⁰ Iranga, muana mayi, kereshe rueyi runu u Kumu, kitishi nteme muama u Kristu. ²¹ Nda ntshiki miyi nteme u rutomowo ruawa, irak'rina amaki miyi ipundushu. Nda nyebek'ande ukekere ureke rueyi runu rua nomboko miyi. ²² Ndo kerere imoko u ndorosho mburu ndja ntshiondjo, nda guengiyik'ande shini maromboro mini,ndi pupunu u bu wiri. ²³ Epafase mbaya ami djua buru buroko u Yezu Kristu amakiwimbishe, ²⁴ ayasha Mark , a Aristark, Ademak, ndo Luk bambayi shama ba neme bakiwimbishe. ²⁵ Tshiongo mua bora Kuma yiti Yezu Kristu muara u miteme nyinu Amene.