¹ Ilyo abantu bonse bayabukile ku bushilya bwa Yordani, Yawe asosele kuli Yoshua atile, ² "Israeli abaume ikumi nababili ukufuma mu bantu, umuntu umo ukufuma muli cila luko. ³ Ubapele ici cipope; 'mubule amabwe ikumi limo na yabili ukufuma pakati ya yordani apo apeminine bashimapepo pa mushili wauma, no kuyaleta kabili nokuyabika pa ncende apo muleya sendama lelo ubushiku."' ⁴ Elyo Yoshua aitile abaume ikumi limo nababili abo asalile ukufuma munko shabena Israeli, umo ukufuma muli cila mutundu. ⁵ Yoshua asosele kuli bena ati, "kabiyeni ku ntanshi ya mbokoshi yakwa Yawe Lesa wenu papkati ka Yordani.' Cila umo asende ilibwe pa kubeya ukukonka ne mpendwa ya mitundu yabena Israeli. ⁶ Ici cikaba ecishibilo pakati kenu iyo abana benu bakala-ipusha mu nshiku ishileisa abati, "bushe aya mabwe yapilibula nshi kuli imwe? ⁷ Elyo mukalabeba amuti, 'amenshi ya Yordani yalipatulwilwe pa ntanshi yambokoshi yacipangano cakwa Yawe. Ilyo ya abukile ku bushilya bwa Yordani, amenshi ya yordani amenshi yalilekele ukwenda. Eico aya amabwe yakaba ecibukisho ku bana ba Israeli pe nape. ⁸ Abena Israeli bacitile nga fintu Yoshua abakonkomeshe babulile amabwe ikumi limo na yabili ukufuma pakati ya Yordani, ukulingana ngefyo Yawe aebele Yoshua. babulile amabwe ikumi limo nayabili ukulingana ne mpendwa yamitundu yabana ba Israeli. Basendele amabwe, ukuya nayo pa ncende apo bapangile inkambi nokuyabika palya pene. ⁹ Elyo Yoshua atantikile amabwe ikumi limo na yabili pakati ka mumana wa Yordani, pa ncende palya amakasa yabashimapepo balya abasendele imbokoshi yacipangano baiminine. Icibukisho epo caba no bushiku bwalelo. ¹⁰ Bashimapepo abasendele imbokoshi baiminine pakati ka Yordani mpakafye ifintu fyonse Yawe akonkomeshe Yoshua ukweba abantu fyapwa, ukukonka na fyonse ifyo Mose akonkomeshe Yoshua. Abantu balyangufyenye nokwabuka. ¹¹ Ilyo abantu bonse bapwisishe ukwabuka, imbokoshi yakwa Yawe na bashimapepo bayabuka batangiliola abantu. ¹² Umutundu wakwa Rubeni, Umutundu wakwa Gadi, na citika wa mutundu waka Manase bayabwike ninshi abana ba Israeli tabalakolonganya ifita, ukulingana nefyo Mose abebele. ¹³ Ukufika ku makana amakumi yane abaume nabasenda ifyanso fya bulwi ebapitile pantanshi yakwa Yawe, baile ku bulwi mu mawanga ya yeriko. ¹⁴ Pali ubu bushiku Yawe asumbwile Yoshua pa menso ya bena Israeli bonse. Bali mupele umucinshi-pamo nga filya bapele Mose umucinshi-mu nshiku sakwe shonse. ¹⁵ Elyo yawe asosele kuli Yoshua ati, ¹⁶ "konkomesha bashimapepo abasenda imbokoshi yabunte ukwisa nokufuma mu Yordani." ¹⁷ Eico, Yoshua akonkomeshe bashimapepo at, "iseni nokufuma mu Yordani." ¹⁸ Ilyo bashimapepo abasendele imbokoshi ya cipangano cakwa Yawe bafumine pakati ka Yordani, kabili bashifumya fye inkasa shabo mu Yordani nokwisa ku mulundu, kabili amenshi yayambile ukulapita, nga fintu wali inshiku shine ishapita. ¹⁹ Abantu bafumine mu Yordani pabushiku bwakulenga ikumi mu mweshi wantanshi. Baikele mu Giligali, ku kabanga ka Yeriko. ²⁰ Amabwe ikumi limo na yabili ayo basendele ukufuma mu Yordani, Yoshua ayemike mu Giligali. ²¹ Asosele ku bena Israeli ati, "ilyo abana benu bakalaipusha ba cshibo mu nshiku ishileisa abati, "bushe nga aya mabwe?' ²² Mukalaeba abana benu amuti, 'apa epo abena Israeli bayabukile Yordani pa mushili uwauma.' ²³ Yawe Lesa wenu aumishe amenshi mu Yordani, mpaka mwapita nokwabuka, pamo nga filya fine Yawe Lesa wenu aciutile ku mumana wa kashika, uyo akamishe pa mulandu wesu mpaka twayabuka, ²⁴ epakuti abanti isonde lyonse bashibe ukuti ukuboko kwakwa Yawe kwa maka, nokuti mukalapela Yawe Lesa wenu umucinshi penape."