¹ Elo nomba Yawe atile kuli Yoshua, ² "Landa ku bantu bamu Israeli, ukutila, 'saleni imisumba iyakufisamamo ngefyo nalandile naimwe ukupitila muli Mose. ³ Citeni ici pakutila uyo uwaipaya umuntu mukukanaishiba kuti aya kulya kwine. Iyi imisumba ikaba ni ncende yaku butukilako nokuya fisama ukufuma kuli uyo one uulefwaya ukucita icilandushi pa mulopa wa muntu ulya aipeye. ⁴ Akabutukila kuli umo umusumba pali iyi misumba elyo nokuya iminina pa mwinshi wa mpongolo ya musumba elyo nokulondolola umulansu wakwe kuba kalamba ba ulya musumba elyo nomba baka mwingisha mu musumba moku mupela icifulo cakwikalapo pakati kabo. ⁵ Ngacakutila umo pali bena aisa ukuti alandule kumulopa wa ulya muntu aipeye, abantu bamuli ulya musumba takafwile ukupela ulya muntu aipeye umuntu munankwe ku ntungulushi. Tabafwile ukucita ici pantu aipeye umupalamano wakwe mukukanaishiba elyo kabili tapali ukupata pali balya bantu mumicitile yabo iyo baleikalilamo kale. ⁶ Afwile ukwikala muli ulya musumba mpakafye akese iminina ku cintubwingi kubupingushi, mpaka ne mfwa yakwa shimapepo mukalamba uwalipo mulishilya nshiku. Elyo nomba ulya aipeye umuntu mukukanaishiba enga bwelelamo ku musuma wakwe naku nganda kumwakwe ku musumba kulya afulumwike." ⁷ Eco kanshi abena Israeli basalile Kedeshi mu Galilee mu calo caku mulundu ica Naftali,, Shekemu mu calo caku mulundu icakwa Efulemu elyo na Kiriati Ariba (cimo cine na Hebuloni) mu calo caku mulundu ica Yuda. ⁸ Peshilya lya Yordani lubali lwaku kabanga Yeriko, ba salile Besa mumatololo incende ya bantama iya ku luko lwakwa Rubeni, na Ramoti Gileadi, mu luko lwakwa Gadi; elyo a Golani ku Bashani, ukufuma ku luko lwakwa Manase. ⁹ Iyi e misumba basalile iya bantu bonse abamu Israeli elyo nabantu bakunse abaleikala pakati kabo, pakuti uyo onse uwaipaya umuntu mukukana ishiba enga butukilako pakuti apusuke. Ulya muntu tafwile ukufwa ku kuboko kwa ulta muntu uwalefwaya ukulandula umulopa uwasuminwe, mpaka ulya muntu wa mulandu atala akwata inshita yakwiminina ku cintubwingi.