¹ Lokási ló yélómbó ló Yezu Kilisito, móngó o Dawidi, móngó o Abalayama ² Abalayama été yáláká isé o Izaka, pe Izaka isé o Yakobo, pe Yakobo isé o Yuda pe la banginéna. ³ Yuda été yáláká isé o Pereze pe la Zerah inéná o ibó Tamar, Pereze isé o Herzon, pe Herzon isé o Ram. ⁴ Ram été yáláká isé o Amminadab, Amminadab isé o Nahshon, pe Nahshon isé o Salomon. ⁵ Salomon isé o Boaz la inéná Rahab, Boaz isé o Obede la inéná Ruth, Obede isé o Jesse. ⁶ Jesse été yáláká isé o Dawidi kumi, Dawidi isé o Salomon la inéná mohali o Uri. ⁷ Salomon été yáláká isé o Rehoboam, Rehoboam isé o Abijah, Abijah isé o Asa. ⁸ Asa été yáláká isé o Jozafat, Jozafat isé o Joram, pe Joram tâtâ e Uziah. ⁹ Uzziah été yáláká isé o Jotham, Jotham isé o Ahaz, Ahaz isé o Hezekiah, ¹⁰ Hezekiah été yáláká isé o Manase, Manase isé o Amon, pe Amon isé o Joziah. ¹¹ Joziah été yáláká tâtâ e Jekoniah pe la banginéná yélékó yété yáláká bô motúké momolo e móki u Babilone. ¹² Mbusè e botsúyi motúké múkú u móki u Babilone, Jokoniah été yáláká isé o Sheatiele, Sheathiele été yáláká tâtâ e Zorobabel. ¹³ Zorobabel été yáláká isé o Abiudu, Abiudu isé o Eliakim, pe Eliakim isé o Azor. ¹⁴ Azor été yáláká isé o Zadok, Zadok isé o Akim, pe Akim isé o Eliud. ¹⁵ Eliud été yáláká isé o Eleazar, Eleazar isé Matthan, pe Matthan isé o Yakobo ¹⁶ Yakobo été yáláká isé o Yozefu molómé o Maria, ngi anò ete ôtámá Yezu, e tòmi Kilisito. ¹⁷ Bilómbó ngia bobándi Abalayama téé ko Dawidi bité yáláká bilómbó métúkú mèkèlèka, bobándi Dawidi téé ko bokeyi motúké múkú u Babilone téé ko Kilisito bilómbó métúkú mèkèlèka. ¹⁸ Bo ôtámi bo Yezu Kilisito bóté tswáná kwa ènè kindá, Inéná, Maria, été yáláká ndési e Yozefu, kasi féló ainè bayálè isikáni imoyi, été tóláká liémé kwa lókúlú lo Elimo Santu, ¹⁹ Kasi Yozefu, molómé owahè, été yáláká mitó o sémbá pe etsi te kúndáká bo mo ènèsi bosámbó, sikanè aka yá békélá momolo e mótémá ainè atsi mo fété la yétólé. ²⁰ Kunè été yáláká yè la bô makánési, anzelu o Mongalima aka mo tswélá momolo e sèmà, aka béká: ''Yozefu móngó o Dawidi, só bángá bosili Maria a lièngèlo ainè moháli owahò, po inè aka tólá liémé la lokúlú lo Molimo Mosantu ²¹ E oko ôtá Moná olómé pe oyè oko mo tòmèsá lina li Yezu, po inè e oko umésá baitó katsi e botátsi''. ²² Yô ngia ité tswáná po e bokókési inè ngia ité bekáná kwa Mongalima kwa ndólé e polofeta, bobéki: ²³ Bo okòkè,''lifòkú li moná owáli anò etsi lémbéli molómé e oko ukólá liémé pe e oko ôtá moná olómé, pe be oko mo étáká la liná li Emanuele''. inè i limbóláni, ''Mongalima ebayi la isó''. ²⁴ Yozefu aka umóha katsi e ilòhô pe aka kélá kunè été mo aesáká anzelu o Mongalima motsindó, aka silá moháli owahè katsi e liéngéló. ²⁵ Kasi etsi té kundáká bosángánési lahè bilóngó téé ko bo ôtámi bo moná olómé. Sikanè aka mo tòmèsá liná li Yezu.