¹ Oku bundi Musa na Haruni bayinji bwira Farao ntya: " Nahano Nyamuzinda we Israeli aderhere ntya: " leka olubaga lwani lugende, lujinjirira olusiku lw'oku nkuza omu mpinga." ² Farao ashubiza ntya: " Ye nde oyo Nahano li nyunva omulenge gwage, gurhume naleka Israeli agenda? Ntamenyere oyo Nahano, ntaleka bene Israeli nti bagende!" ³ Baderha ntya: " Nyamuzinda w'Abayahudi arhubonekere: Ku kwanene rhugende lugendo lwa siku esharhu omu mpinga, rhujirherekera Nahano, Nyamuzinda werhu, li alekichikabula kurhwabano n'echahira eri n'akaere." ⁴ Omwami w'e Misiri ababwira: " Wani Musa na Haruni, chirhumire mwashonda okushumika olubaga mpu luleke emikolo? Shubira omu mikolo yenyu!" ⁵ Farao aderha: " Mwamabona oku olubaga luola lulugire omu chihugo, b'obu mukola mwashonda luleke emikolo!" ⁶ OLo lusiku, Farao arhegeka abarhambo n'abimangizi b'emikolo b'olubaga: ⁷ " Murhakazagiha olubaga ebirhi by'okujira amadafali nk'oku mwakazagijira embere. Baleme bashond'ebirhi bonine. ⁸ Mubaseze okujira amadafali gali nk'aga banayorha bajira, murhayobohaga bichi. Obwolakazi bwabagalire, che chirhumire baherhe bayama: " Rhugende rherekera Nyamuzinda werhu!" ⁹ Abo bantu basezibwe oku kola, li baleki lakira emyazi y'obubeshi!" ¹⁰ Abarhambo n'abimangizi b'olubaga bahuluka, bajibwira olubaga mpu: " Ntya ku Farao aderhere: Ntakachimuha ebirhi! ¹¹ Muleme mwashonda ebirhi ahamwankabibona! Chi ntacho chiro n'ehintyu chakeha omu mukolo gwenyu." ¹² Olubaga lwashandala omu chihugo ch'e Misirimwoshi lwaja lwashonda ebirhi by'echira chira. ¹³ Abarhambo bakazi bashunika mpu: " Mukazimala emikolo yenyu! Mukayunjuza ngasi lusiku olugero luhemerwe! Nk'oku mwanakazagi jira amango mwaligwerhe ebirhi!" ¹⁴ Abimangizi bali bene Israeli, balala balirhumirwe n'abarhambo ba Farao, bakashurhwa, mpu " Charhumaga mwamala, mulagolo na zene, enyundo yenyu y'amadafali nk'oku mwakazigijira bwambere? " ¹⁵ Abimangizi bali bene Israeli bagendi lakira Farao, mpu: " Chirhumire wajirir'abambali bawe ntya? ¹⁶ Bambali bawe barhachihabwa ebirhi, bagali karhubwira, mpu: " Mujire amadafali!" Bambali bawe kukola kukashurhwa konine, olubaga lwawe l'olubi!" ¹⁷ Abashuza, eri: " Muli bwolokazi, chirhumire mwakaziderha mpu: " Rhujirherekera Nahano. ¹⁸ Gendaga bonabuna mujikola ebirhi murhabihabwe, chi amadafali munayorha mujira gonago." ¹⁹ Abimangizi bali bene Israeli bayunva bamaganganwa n'oko babwiragwa, mpu: " Murhakehyaga oku nyundo y'amadafali. Ngasi lusiku mukazijira ela nyundo erhegekerwe. ²⁰ Oku banarhenga aha mwa Farao, bashiganana na Musa na Haruni eri bali babalinga, ²¹ bababwira mpu: " Lero Nahano yenine alolage analuche: Farao na bamabali bage barhachishonda barhuloleko eri mwe murhuma; yabere kere mwabafumbasize mpu barhunige." ²² Musa ashubira emunda Nahano ali, aderha eri: " Mani Yagirwa, charhumire walibuza olu lubaga? Bichi wanchintumira? ²³ Kurhenga amango najaga emwa Farao nji mushambaza oku ezino lyawe, arhangira okulibuza olu lubaga lwawe chiro n'ehityu!"