¹ Patapita Masiku, panthawi yovuna tiligu, etola ka mwana ka mbuzi nakuyoona mkazi wake. Eciti m'mtima mwake, ''Nilobe mcipinda ca mkazi wangu.'' Koma awisi ba mkazi wake emulesha kuloba. ² Awisi ba mwanakazi eciti, ''Nenzoganiza kuti umzonda teto nempasa kwa muyako. Koma msaza wake niwokongola kuposa eve, siteto? mtole eve m'malo mwake.'' ³ Samsoni eciti kwa beve, ''Ino nthawi nibelini na mlandu pa Afilisiti nikabacita cayipa.'' ⁴ Samsoni eluta kuyokata ankhandwe fili handiledi nakuzimanga zibili-zibili, ku micila. Etola misaniko nakumangilila ku micila yankhandwe. ⁵ Peyasha misaniko, ezilekelela nkhandwe zipite mu tiligu wenzepene wa Afilisiti, ndipo zeshoka tiligu wenze ku mikuku nawosatenda wenze m'munda, pamozi na mpesa na minda ya azitona. ⁶ Afilisiti bekosha kuti, ''Nibani wacita teti?'' Ndipo ebauzya kuti, ''Ni Samsoni, m'pongozi wa munthu uyu waku Timna, wacita teti ndaba uyu munthu waku Timna wamtolela mkazi wake nakupasa muyake waeve.'' Teto Afilisiti beluta kuyoshoka mwanakazi ula na awisi. ⁷ Samsoni eciti kwa beve, ''Ngati ici ndkiye camucita, nikuwezyeleni nane. Ndipo nikasilizya teto, ndiye patinileke.'' ⁸ Ndipo ebatenda viduswa-viduswa, fyuku na cibelo, nakubapaya anyinji. Eluta nakuyonkhalu ku mphako ku Etamu. ⁹ Teto Afilisiti bewela nakuzokonzekela nkhondo na Ayuda nakumanga msasa mu Lehi. ¹⁰ Madoda ba Ayuda beciti, ''Mwawelelanji kuzocita nkhondo na seo?'' Beciti, ''Tewala kuzocita nkhondo kuti tikate Samsoni, ndipo kuti nakumcita mwawaticitila seo.'' ¹¹ Teto madoda fili sauzande ba Ayuda beluta ku mphako yenze ku Etamu, ndipo beciti kwa Samsoni, ''Ko uziba kuti Afilisiti ndiye olamulila seo? Nicinji cawacitila teti kwa seo?'' Samsoni eciti kwa beve, ''Monga mwebenicitila neo, nane nabacitila teto.'' ¹² Ndipo beciti kwa Samsoni, ''Tawela kuzokumnga nakutwala m'manja mwa Afilisiti.'' Samsoni eciti kwa beve, ''Lumbilani kuti simunipaya nimweo.'' ¹³ Beciti kwa eve, ''Yai, tikumange tyala na nthambo nakutwala kwa beve. Tulonjeza kuti sitikupaya.'' ndipo bemumanga na nthambo zibili zalomba nakumufumya mu mwala. ¹⁴ Pefwika ku Lehi, Afilisiti bewela okuwa penzokumana naye. Lomba pamene apo mzimu wa Yehova wewela payeve na mphamvu. Nthambo zenze m'manja mwake zenkhala ngati ninzinzi zakupya, ndipo zepona kucoka m'manja mwake. ¹⁵ Samsoni epeza bonzo yacibwano ca bulu calomba, ecitola nakuyopaya naco madoda wanu sauzande. ¹⁶ Samsoni eciti, ''Na bonzo yacibwano ca bulu, myulu pa myulu, na bonzo yacibwano ca bulu napaya madoda wanu sauzande.'' ¹⁷ Samsoni pesilizya kulabila, etaya bonzo yacibwano, ndipo etaya malo bala kuti Ramati Lehi. ¹⁸ Samsoni enze na njota ngako teto elilila kwa Yehova ndipo eciti, ''Mwapeleka cigonjeso cikulu ku mtimiki wanu. Koma lomba ninifwe na njota nakupezeka m'manja mwa bala aliyemdulidwe?'' ¹⁹ Mulungu esugula pamalo penze kacidikha mu Lehi ndipo pefuma manzi. Pecimwa, mphamvu zake zewelelelamo ndipo esisimuka. Teto etaya malo bala kuti Eni Hakore, ndipo yali mu Lehi mpaka lero. ²⁰ Samsoni eweruza Israeli mu nthawi ya Afilisiti kwa vyaka twenti.