¹ Ndipo Aisraeli becita soti viipa pameso pa Yehova, ndipo ebatwala m'manja mwa Afilisiti kwa vyaka fote. ² Kwenze munthu wocokera ku Zora, wa mkoka wa Dani, zinalake enze Manowa. Mkazi wake enzonkhalalini na vumo teto aliyevyale. ³ M'ngelo wa Yehova emuonekela mwanakazi ula ndipo eciti kwa eve, ''Ona lomba, unkhallini na vumo, ndipo ukaliyevyalepo, koma unkhale na vumo nakuvyala mwana mwanalume. ⁴ Koma usamale osamwa vinyu kapena akumwa cikali kapena kulya cakulya conyasa. ⁵ Ona, unkhale na vumo nakuzovyala mwana mwanalume. Kuliye kaleza katikakapite ku mutu kwake, pakuti mwana uyu akankhale m'naziri wakwa Mulungu kufumila m'mala, ndipo akayambe ku pulumusha Aisraeli m'manja mwa Afilisiti.'' ⁶ Teto mwanakzi ula ewelakuzouzya mwanalume wake, ''Munthu wa Mulungu enzewawela kwa neo, ndipo maonekedwe bake benze monga ni m'ngelo wa Mulungu, yoyofya. Niliyemkoshe kwawafumila, ndipo aliyeniuzye zina lake. ⁷ Wanena teti kwa neo, 'Ona! Unkhale na vumo, ndipo kuzovyala mwana mwanalume. Teto osamwa vinyu kapena cakumwa cikali, ndipo osalya cakulya camene lamulo lunena kuti niconyasa, pakuti mwana akankhale m'naziri wa kwa Mulungu kuyambila akali m'mala mpaka imfwa yake.'' ⁸ Ndipo Manowa epemphera kwa Yehova nakuti, ''Ha, Ambuye, napapata lekani munthu wa Mulungu wemwenzemwatuma awele soti kwa seo kuti atiphunzise catufunikocita pa mwana watiavyalike lomba pano. ⁹ Mulungu ecimvwa lizu la Manowa, na m'ngelo wa Mulungu ewela soti kwa mwanakazi penzenkhezi m'munda. Koma Manowa mwanalume wake enzelini naye. ¹⁰ Teto mwanakazi eutuka msanga-msanga nakuyouzya mwanalume wake, ''Onani! Ula munthu waonekela soti, ula enzewela kwa neo siku ila!'' ¹¹ Manowa enyamuka nakukonkha mkazi wake. Pefwika kwa ula munthu, eciti, ''Ko niweo wenzewelabila na mkazi wangu?'' Ula munthu eciti, ''Inde nineo.'' ¹² Teto Manowa eciti, ''Lekani mau banu bacitike. Nanga malamulo bake pa mwana uyu niyotyani, nanga nchito yake ikabe yotyani?'' ¹³ Ndipo m'ngelo wa Yehova eciti kwa Manowa, ''Asamalishe kucita vonse venemuuzya. ¹⁴ osatiakokulya ciliconse cocokela ku mpesa, osamulola kumwa vinyu kapena cakumwa cikali kapena cakulya ciliconse conyasa. Ofunika asamalile vonse venemlamulila kucita.'' ¹⁵ Manowa eciti kwa m'ngelo wa Yehova, ''Napapata nkhalankoni kwa nthawi, mutipaseko m'mpata kuti tikukonzekelenkoni ka mwana ka mbuzi.'' ¹⁶ M'ngelo wa Yehova eciti kwa Manowa, ''Olokuti ninkhale, sinilya cakulya canu. Koma mkakonza nsembe yoshoka, ipelekeni kwa Yehova..'' (Manowa aliyezibe kuti enze m'ngelo wa Mulungu) ¹⁷ Manowa eciti kwa m'ngelo wa Yehova, ''Niwe bani zina lako, kuti tikuyamikile mau bako yakayokwanilishika?'' ¹⁸ M'ngelo wa Yehova eciti kwa eve, ''Unikoshelanji zina langu? Ni labwino!'' ¹⁹ Teto Manowa etola kamwana ka mbuzi na nsembe yambeu nakutwala pa mwala kwa Yehova. Ndipo ecita cinthu ciyakine codabwisa Manowa na mkazi wake olnga, ²⁰ Mulilo peweluta kululu kucokela pa guwa, m'ngelo wa Yehova eluta m'mulilo wapa guwa. Manowa na mkazi wake beciona ici nakulala na vinso vulanga pansi. ²¹ M'ngelo wa Yehova aliyeonekelesoti kwa Manowa na mkazi wake. Ndipo Manowa eziba kuti uyu enze ni m'ngelo wa Yehova. ²² Manowa eciti kwa mkazi wake, ''Titifwe mosakaika, pakuti taona Mulungu!'' ²³ Koma mkazi wake eciti kwa eve, ''Ngati Yehova enzofuna kutipaya sembe aliye landile nsembe yoshoka na nsembe ya mbeu yatampasa. Sembe aliyotioneshe vinthu vonse ivi, kapena pa nthawi yoteti kutimvisha vinthu voteti.'' ²⁴ Pasogolo pake mwanakazi ula evyala mwana mwanalume, ndipo emuteya zina kuti Samsoni. Mwana ula ekula ndipo Yehova emdalisa. ²⁵ Mzimu wa Yehova weyamba kumkulumizya eve mu Mahane-Dani, pakati pa Zora na Estaoli.