¹ Aya ndiye mazina ya bana ba Israeli bemene beluta ku ziko la Igupto pamozi na Yakobo usuwawo, aliyense na am'ng'anda yake: ² Rubeni, Simioni, Levi, na Yuda, ³ Iasakara, Zebulani, na Benjamini, ⁴ Dani, Nafutali, Gadi, na Aseri. ⁵ Banthu onse obadwa m'ng'anda ya Yakobo benze 70. Yosefe enze kale mu Igupto. ⁶ Lomba Yosefe, na anekwao onse, na m'badwe onse ula becifwa. ⁷ Koma Aisraeli evyalana na kupaka ngako, ndipo benkhala bamphamvu ngako; ziko yezula na beve. ⁸ Lomba pewela mfumu iyakine yecizolamulila ziko la Igupto yamene yenzoziba lini za Yosefe. ⁹ Eciti ku banthu bake, "Onani, Aisraeli bapaka ngako ndipo otiposa mphamvu. ¹⁰ Welani, tiyeni ticite nao mwanzelu, ndaba bangapitilizye kupaka, lomba ngati kwauka nkhondo, bakuyogwilizana na adani basu, nakunyatana nase, nakuzofumamo m'ziko." ¹¹ Teto ebaikila akapitao kuti akobanzunza nakubakakamizya cito zokosa ngako. Aisraeli emumangila mizinda yosungilamu cakulya Falao: Pitomu na Ramesesi. ¹² Koma olo kuti Aigupto enzobapondelezya ngako, Aisraeli enzokuya opakilako pakilako. Cakuti Aigupto eyamba kuyopa Aisraeli. ¹³ Aigupto ndipo ebagwilisha nchito mwankhanza Aisraeli. ¹⁴ Elengesha umoyo wao kunkhala obaba kamba ka nchito yokosa yokanda madaka nochaya nchelwa, nazinchito zosiyana siyana zam'munda. Nchito iliyonse yebenzofunuka kugwila yenze yokosa ngako. ¹⁵ Mfumu ya Aigupto yelabila na anamwino aciheberi; mazina yao enze Ssifira na Puwa. ¹⁶ Eciti, "Pumuyavya anakazi baciheberi popapa, mkolangishisha. Ngati ni mwana mwanalume, nikumpaya; ngati ni mwana mwanakazi, angankhale namoyo." ¹⁷ Koma anamwino enzoyopa Mulungu ndipo enzocitalini kulingana naveyelamula mfumu ya Aigupto; Koma m'malo mwake belekelela bana banalume kunkhala namoyo. ¹⁸ Mfumu ya Aigupto ebaita anamwino ndipo eciti kwa beve, "Mwacitalanji teti, nolekelela bana analume kunkhala namoyo?" ¹⁹ Anamwino bemuyankha Falao kuti, " Anakazi baciheberi olingana lini na anakazi ba Aigupto. Banamphamvu ngako yovyala musanga namwino akaliye fwika kwa beve apobavyala kale." ²⁰ Mulungu ebateteza anamwino aba. Ndipo banthu bepaka nakunkhala na olimba ngako. ²¹ Ndaba anamwino benzoyopa Mulungu, ebapasa ma banja yaoyao. ²² Falao elamula banthu bake onse kuti, "Bana analume onse batiokobadwa mkobataya m'mkolo, koma mwana aliyense mwanakazi mkomuleka namoyo."