¹ Apwiya yahin'himerya Moise wira: ² ''Ela entthuna okhala ekettelo mwaha wa ntthu onanara, nihiku na orelihiya wawe. Owo ohaana wixooniherya wa nankuttho. ³ Nankuttho akhumeke omamaxani wira akumane ni ntthu owo wakhala nikhwatta nawe noovona. ⁴ Nto nankuttho onanrowa oruma wira ntthu owo nwa wira areelihiye aruuhe axaapalame enli akumi, ithaapwa tja ecedru, ekarimesini ni essopu. ⁵ Nankuttho onoorumiha wira inviye mwaxiipalame m'motja n'hina mwa matji oriirya antthuna okhala m'mwaapuni mwa oloko. ⁶ Nankuttho onoonwaana mwaxiipalame nkumi, ni ethaapwa ya ecedru, ni ekarimesini, ni essopo ni onooruweya tjitthu n'nya tjotene, vamotja ni mwaxiipalame ole nkumi, n'hina mwa ephome mwa mwaaxipalame ole n'viye n'hina mwa matji oorirya. ⁷ Nto nankuttho onaarowa onttikitthela ntthu owo ovon'ne ikwaha thanu napili ni wahoolo onaahimya wira nkumi. Numala eyo, nankuttho owo onan'hiya mwaxipalame owo nkumi nipuro nootthukuwa. ⁸ Ntthu owo onrowa oreelihiya onaakattha ikuwo tjawe, ohaana ometthiya ikharari tjawe tjootene, onimwiirapiha m'matjini ni nto onaakhala nkumi. Numala eyo, ntthu owo aroweke omaxaxani, nto okhaleke ota wa muxaxawe mahiku thanu napili. ⁹ Nihiku na eneethanu napili, ohaana omeethiya ikharar tjawe ni-tho ohaana ometthiya ereru awe ni iyaaphi tjawe. Owo ohaana ometthiya ikharari tjawe, okattha ikuwo tjawe ni wiirapiha m'maatjini; nto onaarowa okhala nkumi. ¹⁰ Nhiku na neethanu nattharu, ohaana okuxa ipwittipwitthi pinli ikumi, epwittipwitth emotja ya eyakha emotja ekumi, mithinto tthaaru tja efa ya ephepa yooreera yootakaihiya ni makhura. ¹¹ Nankuttho ompaka mareeliho ononvenxa btthu owo ontthuna oreelihiya, vamotja ni tjitthu n'ya tjootene, oholo wa Apwiya, vankhora wa enupa ya nthukumano. ¹² Nankuttho onoonkuxa mwapwittipwitthi m'motja m'motja ntoko yoovaha mwaha wa itampi, vamotja ni nthinto m'motaja makhura; owo onowaana oholo wa Apwiya ntoko yoovaha ni onimwaavaha. ¹³ Owo ohaana winva epwittipwitthi nipuro tjinviya tjoovaha tja itampi ni mikuttho, nipuro na etabernakulu, waholo yoovaha mwaha wa itampi eyo tiyanankuttho, tjitjam'mo ntoko yoovaha mwaha wa itampi, waholo iyo titjootepa warya. ¹⁴ Nankuttho ohaana okuxa ephantti emotja ya ephome ya yoovaha mwaha wa itampi ni oheleke naaru moono woolopwana wa ntthu ontthuna orelihiya, ekatha awe yoopwana moono woolopwana. ¹⁵ Nto nankuttho akuxeke makhura ni intjaathiki m'matatani mwawe moono woothiyana, ¹⁶ onoohela ekathawe moono woolopwana m'makhurani ari m'matatani mwawe ni onoottikitthela makhura awo ikwaha thanu napili oholo wa Apwiya. ¹⁷ Nankuttho owo onoohela makhura antthuna ohala m'matatani mwawe moono woolopwana wookhitjeryani wa naaru wa ntthu ontthuna oreelihiya, ekathawe yuulupale ya moono awe woolopwana ni elipwi awe yuulupale n'nawu nuulupale. Owo ohaana wintjaathi makhura otjulu wa ephome ya yooleveleliya wa itampi. ¹⁸ Ni mwakhura antthuna ohala antthuna okhala m'matatani wa nankuttho owo onoohela m'muruni wa ntthu ontthuna oreelihiya, ni nankuttho ononlompela oholo wa Apwiya. ¹⁹ Numala nankuttho ovahe yoovaha mwaha wa itampi ni onanlompela ole ontthuna oreelihiya mwaha wa onanara wawe ni numala owo avaheke yoovaha yoopahiya. ²⁰ Nto nankutto ovaheke nkuttho ni yoovaha yoopahiya waltari. Nankuttho onlempeleke ntthu owo, nto owo onookhala oorelihiya. ²¹ Vano ntthu akhala oohawa ohiwerya oliva tjitthu n'ya, nto owo okuxeke epwittipwitthi ntoko yoovaha mwaha wa itampi wira avahiye Apwiya ntoko yoolompeliya ni yanamuloko ya efa yooreera yootakanihiya makhura ntoko yoovaha yoopahiya ni mphantti wa makhura, ²² vamotja wa ikhuntte pinli ni matjiya menli, tjitjam'mo ontthunawe owerya ovaha; mwaxipalame m'motja ontthuna okhala yoovaha mwaha wa itampi ni nkina nkuttho. ²³ Nihiku na eneethanu nattharu, ohaana wawana wa nankuttho wira oreelihiye, vankhora wa mpani mwa ntukumano, oholo wa Apwiya. ²⁴ Nto nakuttho onkuxeke mwapwittipwitthi wira avahe yoovaa mwaha wa itampi ni mphantti wa makhura nto avaheke Apwiya. ²⁵ Owo omwinveke mwapwittipwitthi a yoovaa mwaha wa itampi ni okuxeke maphantti wa ephome ya yoovaha ya itampi ni oheleke woomalelani wa naaru moono woolopwana wa ole ontthuna oleveleliya, ekathawe moono woolopwana yuulupale ni valipwini vawe yuulupale moono woolopwana. ²⁶ Nto nankuttho onoohela makhura m'matatani mwawe moono woothiyana ni ²⁷ ottikittheleke ni ekathawe moono woolopwana akuxaka makhura ale ari moono awe woothiyana attikittheleke ohololo wa Apwiya ikwaha thanu napili. ²⁸ Nto, nankuttho onohela mphantti wa makhura ari m'matatani mwawe woomalelani wa naaru woolopwana wa ole onreelihiya, ekatawe yuulupale moono awewe woolopwana, ni elipwi awe yuulupale moono awe woolopwana, mapuro mamotjaru yawo ohelalyawe makhura a itampi. ²⁹ Owo onoohela makhura anttuna ohala ari m'matatani mwawe m'muruni wa ole onreelihiya, wira alompeliye oolo wa Apwiya. ³⁰ Owo ohaana ovaa wa emotja ya ekhuntte wala ntjiya, tjitjam'mo ntthu owo ontthunawe owerya ophwanya - ³¹ emotja ntoko yoovaha mwaha wa itampi ni ekina ntoko nkuttho, vamotja wa yoovaha yoopahiya. Nto nankuttho onoonlompela ole ontthuna oreelihiya ohoolo wa Apwiya. ³² Ela ekettelo ya ntthu iipale varutthuni, ohintthuna owerya ophwanya yoovaha mwaha wooreelihiya wawe''. ³³ Apwiya yahin'himerya Moise ni Aroni wira: ³⁴ ''Okathi ontthunenyu okela elapo ya Okanani, yeeyo yoovahalyakani ntoko yoohalana, ni miyano kihela maretta vatthokoni, elapo yeeyo entthunenyu ohalana, ³⁵ nto mwanene etthoko ohaana owa on'himerya nankuttho. Owo ohaana wira: 'Kinoona wira yookhala etthu enkhala mwa maretta owan'nyaka'. ³⁶ Nto nakuttho ohaana ohimya wira atthu awo akhumihe tjitthu m'pani ohinatthi okela wira awehe maretta awo, wira ehikhale etthu ya m'pani entthuna okhae yoonanara. Numala eyo, nankuttho okeleke mpani wira awehe. ³⁷ Owo ohaana owehaweha maretta awo yakhala ari nxirini mwa enupa, ni onooweha-tho wakhala wira awo tooripelela wala oottela nkherekhere mwa exiri. ³⁸ Wakhala enupa eyo ehaana maretta, ntoko nankuttho akhumeke ni atthukhweke enupa eyo n'hina mwa mahiku tha u napili. ³⁹ Nto nakuttho owo atthikeke nihiku na eneethanu napili ni awehe wakhala wira maretta ale amwaarela nxirini mootene. ⁴⁰ Wakhala wira amwareela, nto nankuttho onoohimya wira akhumohiye maluku mem'mo maretta ale aryaayamoni attikheliye nipuro noohiloka ota wa epoma. ⁴¹ Owo arumihe wira ixiri tjootene tja n'hina tjixiliye, ni akhuxeke tjen'ye tjaxiliya tjittikheliye ota wa epoma, nipuro noohiloka. ⁴² Awo akhuxeke maluku makina ni yintjaathi mem'mo akhumihiye maluku onnara ni akhuxeke oloko n'sya areerihaneke. ⁴³ Wakhala wira maretta anootthikela-tho enupa yeele akhumihiye maluku ni khukhumihiya malukune, ⁴⁴ nto nankuttho onaawa-tho awehe wakhala wira maretta awo atjareya mpani mootene. Aphwanya, nto mareetta oothipelela, ni enupa eyo yonanara. ⁴⁵ Enupa eyo ehaana okwakwanyuliya. Maluku-ene, ithaapwa, ni ixiri tjootene tja enupa tjiihaana okhumiheriya ota wa epoma, nipuro noohiloka. ⁴⁶ Tjitjam'mo-tho, wakhula ntthu ontthuna okela mpani mootthukiya onookhala ohiloka mpakha ntjuwa onaya. ⁴⁷ Ole ontthuna orupa mpani m'mo ohaana okattha ikuwo tjawe, ni ole onthuna olya n'hina mwa enupa ohaana okattha ikuwo tjawe. ⁴⁸ Wakhala nankuttho onookela mpani wira awehawehe ni wira awehe wakhala maretta atjareya mpani, numala eyo oreerihiya, nto, maretta awo yahitthike, owo onoohimya wira enupa ekumi. ⁴⁹ Nto nankuttho ohaana okuxa matjiya menli wira areelihe enupa, ni ethaapwa ya ecedru, ekarisimini, ni issopo. ⁵⁰ Owo ohaana winva ntjiya nimotja m'matjini ooriirya munrinkini mwa oloko. ⁵¹ Owo akuxe ethaapwa ya ecedru, issopo, ekarimesini ni ntjiya nikumi ni aruweyeke mphomeni mwa ntjiya nowookhwa, n'hina mwa matji ooriirya, ni attikitthele enupa ikwaha thanu napili. ⁵² Owo onooreeliha enupa ni ephome ya ntjiya ni matji ooriirya, ni ntjiya nikumi, ethaapwa ya ecedru, isoopo ni ekirimisini. ⁵³ Vano owo ottikheleke ntjiya nlo ota wa epoma. Tjitjam'mo, owo onoolomepela enupa, ni eyo enookhala ekumi. ⁵⁴ Ola nkettelo wa wakhula wipa wa varutthuni enwaanela oneena ni mareetta a vakuwoni ⁵⁵ ni vanupani, ⁵⁶ wiipa, ohononeya wa erutthu ni malepa oottela, ⁵⁷ entthuna wooniherya wakhala wira wakhula tjitthu n'yo wira tjikumi wala khahiyo tjikumi. Ola nkettelo wa wiipa wala maretta''.