¹ Nakulakiza mbere za Mulungu na Masihi Jesu, andiye mvahukumu mvario azima na afu, na kpwa ajili ya kufunulirwa ni ufalumewe. ² Hubiri neno; ukale tayari, wakati ufaawo na usiwofaa. Mvambire atu dambi zao, chemera, onya kpwa uvumirivu wosi na mafunzo. ³ Kpwa kukala wakati undadza uriwo atu mvandagakahala mafundisho ga ujeri. Badalaye, mvandadzitafutira alimu a kufundisha kulingana na tamaa zao. Mvanenao chiricho masikiro gao gawawago gamala kusikira. ⁴ Mvandaricha kusikiza mafundisho ga jeri, na kugalukira ngano za ulongo. ⁵ Ala uwe, kala mwaminifu kahi za mambo gosi. Teseka, henda kazi ya muhubiri wa injili; timiza hudumayo. ⁶ Kpwa kukala mino kare nidzimwagbwa nze. Wakati wa charo changu ufika. ⁷ Nidzivipiga viha virivyo vidzo; mwenendo nidziumala, imani nidzi-irinda. ⁸ Taji ya hachi idzikpwa kpwa ajili yangu, iriyo Bwana, ahukumuye kpwa hachi, andanipa siku iyo na si mimi hacheye, ala pia kpwa osi mvatarizao kpwa hamu konekanakpwe. ⁹ Dzihimize udze upesi. ¹⁰ Kpwa kukala Dema adziniricha. Adziuhenza urimwengu wa sasa naye adzenda Thesalonike. Kireseni wekpwenda Galatia, na Tito achenda Dalmatia. ¹¹ Luka hacheye ndiye ariye hamwenga nami. Mupate Mariko udze naye kpwa kukala iye ni muhimu kpwangu kahi za huduma. ¹² Nemuhuma Tikiko Efeso. ¹³ Joho niriro riricha Troa na Karpo, undihokudza rirehe, hamwenga na viratu vitabu hasa vyo vya chingo. ¹⁴ Alekizanda, fundi wa vyuma wenihendera maovu manji. Bwana andamuriha kulingana na mahendoge. ¹⁵ Nauwe pia dzihadhari naye, kpwani wegapinga sana maneno gehu. ¹⁶ Kahi za uhehezi wangu wa kpwanza, kakuna mutu yoyosi ariye-ema hamwenga nami, badalaye, chila mumwenga weniricha. Mulungu asimvatalire hatiya. ¹⁷ Ala Bwana wema nami, achinonjeza nguvu ili, kuchirira kpwangu, neno rinenwe kpwa ukamilifu na mataifa mvapate kurisikira. Nami nichokolwa kula kpwa mulomo wa simba. ¹⁸ Bwana andanepusha na mahendo gosi maovu na kunokola kpwa ajili ya ufalumewe wa mulunguni, utukufu ukale kpwakpwe kare na kare. ¹⁹ Nilamusira Priska, na Akila na nyumba ya Onesiforo. ²⁰ Erasto wesala kuko Korintho, ala Trifino nemuricha Mileso walumwa. ²¹ Henda undoriweza, udze kabla ya chipindi cha mvula na peho. Yubalo wakulamusa, pia Pudeni, Lino, Kilaudia na ndugu mvosi. ²² Mulungu akale hamwenga na rohoyo. Neema ikale hamwenga namwi.