¹ Yakobo, omurume waNyasaye nende omwami Yesu Kristo, yule khutsikabila ekhumi nende tsibiri etsiasalana: amashesio khuinywe. ² Abaana beefu, mulolenge mbu nobusangali olwa munyoola obutemwi bwabukhane. ³ Nimumanya mbu okhutemwa khwobusubiri bwenyu bwibuanga okhutiyirira. ⁴ obutinyirifu nabwo bukholere elala emilimo chiabo mbu mube abalamba habwene nimulalema mwikhuwa liosi ta. ⁵ Ne oundi yesi khuinywe naba naumirwa obuchesi amusabe Nyasaye, ouhaniranga bosi nomnkhono omusiro nalamwibira ta mana alahebwa. ⁶ Ne akhoyere okhusaba nobusubiri obulakanakania ta shichira oukanakaninjia afwanana shinga amarunda akokhunyanza akarundwa nomuyeka nikerunda runda. ⁷ Omundu uyo alapara mbu alahebwa nomwami tawe. ⁸ Niweshikhabiri oubeeya beeya munjira tsiosi tsiosi. ⁹ omwana wefu ouli omumanani yetsialire obukhulundubwe. ¹⁰ Nebutswa omuyiinda yetsialire obututubwe Shichira yetsa okhuwayo shinga eshimuli eshiamubulimo. ¹¹ Okhuba eliuba lifinda nilirera omuyeka okuyiire paa nilifululusia obulimo. Amawa nano nikakwa, khandi obukasu bwako nibuwaho. Munjira yeneyo, omuyiinda yetsa okhuwaho akarii woluchendo lulwe. ¹² Niweikhabi omundu yesi owifira mubutemwi, Shichira olwa balaba nafuchiirwe alanyoola olusimbi lwobulamu olwa omwami yabasubisia yabo abamuheranga. ¹³ Olwa omundu atemwa shialaboola mbu “Nyasaye niye oundemanga ta” Shichira Nyasaye shiateemungwa n amabii ta kata ye omwene shiatemanga omundu yesi tawe. ¹⁴ Ne buli omundu atemwa omwana nakhweswa nobwikombi bubwe omwene,nahomberesibwa ninabwo. ¹⁵ Mana obwikombi olwa buba nibubereshe bumalanga bwibula obwononi, obwononi nabwo olwabuba nibukhulire bwibula okhufwa. ¹⁶ Mulqkatibwa ta abaana beefu. ¹⁷ Buli eshihanwa eshilayi khandi buli omukabo omulamba kurulanga ikulu, nikwikha okhurula khu papa wobulafu. Shichira khuye bubulaho obukalukhani bwosi nomba eshinani ta. ¹⁸ Khulwa okhuchama khukhwe yakhwibula n elikhuwa liobwatoto khube shinga omurongole khubilonjebie. ¹⁹ Mumanyire likhuwa lino abaana beefu, lekha omundu abe omwangu wokhuhulira, halali shibalaba omwangu woburima ta. ²⁰ Shichira elirima liomundu shilitusinjia obulunjishi bwaNyasaye ta. ²¹ Khulwa ishio mwifwalule okhurula mobwonooni nende akeshifwabi nende mubuunji bwamabii. Nimwinjisia mubwitutuyi elikhuwa elio eliarakwa muinywe elinyala okhuhonia emioyo chienyu. ²² Mubetsenge abakholi be likhuwa ne mulala abahuliri butswa ta abeekatia abeene. ²³ Shichira omundu naba omuhuliri we likhuwa ne balaba omukholi ta yeengana nende omundu owiyenga mumonimwe mwoburulanda mushilolero. ²⁴ Okhuba yeelola omwene natsia butswa butsia habweneho niyeebirire okhufwanakhwe. ²⁵ v25Ne ouhenjeresia mwilako lilamba liobulakhule, natsirira okhukhola, nalaba tsa omuhuliri ouwibiriranga ta, omundu yetsa okhusasibwa mumilimo chichie. ²⁶ Omundu yesi naba niyeparakhwo mbu noweidini ne nalanyala okhulinda olulimi lulwe ta, yekatinjia idini yomundu oyo nibutswa. ²⁷ Idini inzeleleshe khandi eyibulamwo eshikha imberi waNyasaye wefu khandi seefwe njie shino mbu okhukhola yabo abaana abashisandu nende abakhasi abalekhwa mumatinyu kabwe, Khandi okhwilinda oleshe okhumiitswakhwo eshiroonyesi shiosi shiokhushialo.