¹ Uko niko umutume aduhalula twebwe, kabha abhatumwa bha Data nabhawakili bhinyegeje mubhukweli bwa Data. ² Mwili, ikigombezwa kubhuwakili nukubha abhategemewa. ³ Lakini iwanje jewe nikintu kitoyi chane, ha!pukumiwa na mwemwe au ihukumu yabhanadamu. Ukugilango hindihukumu na jewe nyene. ⁴ Hindihukumu jewe nyene, iyi hiyibhanye kwene, ukugilango jewe ndikwene. Na Data ampukumu. ⁵ Ukugilango, himgambo ihukumu kwijambo dyodyose umda wutalagela, Data atalaza. Aloyazana amagambo ahabhona ayanyegejwe kandi amagambo yanyegejwe mumwilima nugufundulula amagambo yanyegejwe mumutima. Niho kuli wumwe alokwakila isifa yage ukuva iwa Data. ⁶ Sasa, kaka na dada bhanje, najewe na Apolo ntumiije kumagambo aya kwalimwemwe, ili ukuvamo kwanyu mwoyobhola ukwigana mkugamba," Ntugende ukasumbo kochandiswe. " Ityo lelo ntawuliho yibhona lugulu yuwundi. ⁷ Ukugilango ninde abhona ukundi ugusumba uwundi? Ninde akibhanye yachakiye bure? kabha uzewakwakiye bule, kuki mwibhona mtakola bhule? ⁸ Tiyali mlabhanye vyose vyomwogonye! tiyali mzamubhanye amahela! mlatanguye ukubhana ubhutwale nukubhana vyishi nukusumba twebwe! kweli, handabhagombela mumiliki ubhuholo ukugilango tubhibhane ubhuholo na jewe hamwe. ⁹ Ukugilango Data atusizeho twebwe abhakozi nkukutweleka nu mwisho kumsitali wukwandamana nabhantu bhahukumiwe uguhwela. tubhaye nkamatasha mwintala, nkumpemu yera nakubhanadamu. ¹⁰ Twebwe nibhifila kwikazi ya Data, lakini mwemwe nabhapole mwali Data. Tubhe abhapole, lakini mwemwe mlininguvu. Hamhaluligwa, lakini sisi hadukezwa. ¹¹ Hadi itya tulabhanye inzala nikiu, hitibhanye ivyambagwa, na hitubhanye ibhikogwa. ¹² Hadukola ikazi chane, kumabhoko yachu twebwe. habhatukengela, tulabaliki. Lakini hatunyanyaswa, tulavumiliya. ¹³ Hatugambwa mabhi, twebwe tugalusa masole, twebwe tuchahesabiwa nkabhantu bhiyi ntala, nivyononekaye kumagambo yose. ¹⁴ Sindandika amagombo aya ukubhatela insoni mwemwe, lakini ukubhagalukila nkabhana bhanje bhonkunda. ¹⁵ Naho mubhanyu abhigisha chumi elfu mwali Yesu kristo ukuchilila amahubili. ¹⁶ Kwahiyo handabhasihi mukulikile jewe. ¹⁷ Iyo niyo isababu yondatumye Timotheyo, umukundwa wanje umwana msole mwali Data. Alobhibhusa inzila zanje kwali Kristo, Nkuko handigisha kila isehemu na kumakanisa. ¹⁸ Lakini mwalimwemwe habhisifu, habhakola ukugilango hindoza iwanyu. ¹⁹ Lakini ndamenya kumwanya mtori, kabha Data ashimye. Niho ndokamenya siyo amagambo yabho yobhisifu, lakini ndolabha inguvu zabho. ²⁰ Ukugilango ubhwami bwa Data hibhubha kumagambo bali kwinguvu. ²¹ Mgomba iki? Inze iwanyu kunkoni au kubhupendo na kumtima wubhupole?