¹ Wakati ogo baisi Yerusarem, kalibu ya Besthfage na Bethania, pakitombe sa mizeituni, Yesu atumike abele kati ya balyo benepunzi bake ² Nkuakokeya "Muyende ukijiji sa kibii kalibu na twee. mi ana muujingile omo, mwammona mwana mbonda, ambaye anakwelwa kwaa. Mtabaye na munnete kwango. ³ Mana api mundu kubalokiya mwalowa kele ntenda iyeya? Mbakiyaye Bwana ando kumpala na ambukiya pano." ⁴ Bayei nia kummona mwana mbonda kunza ya mlango kwenye mtaa wa palai na membe kabaamuundua. ⁵ Na bandu bai bayemi palyo na kabaakokeya "Mutenda kele kumbundua mwana mbonda oyo?" ⁶ Kabaakokeya katu ya abalogoli Yesu, na bandu kabaaleka ayende. ⁷ Wanapunzi abele banletike mwana mbonda kwa Yesu na kabatandika ngobo yabe kunani ili Yesu awese kukwela. ⁸ Bandi banyaansima kabatandika ngobo yabe mundela na benge batandike matambe galyo batekwi mmigonda. ⁹ Balyo bayei kulonge yake na balyo bankotike kaba guta "Hosana! Abarikiwe aisa kwa lina lya Bwana." ¹⁰ Ubarikiwe upwalume ogo uisa watate bitu Daudi! Hosana kwa aliye kunani. ¹¹ Ndipo Yesu ayingii Yerusalem na ayei hekaluni na aloi kila kilebe. Muda wa yei, ayei Bethania pamwepe na komi na ibele. ¹² Lisiku lya nyaibele, palyo kabakuya kuoma Bethania, abi na njara. ¹³ Abweni ntela wa kumwitu ubi na manyei kutalu ayei kulola kama kubi na kilebe mwa nnani. ¹⁴ Kankokeya, "Ntopo wa ulya matunda kuoma kwako lelo." Benepunzi bake bayowine. ¹⁵ Baisi Yerusalem na ywembe kayingia muhekalu katumbua kubapiya panza asalusaji na anunuzi muhekalu. Kagalwa mesa za wabadilishaji pwela na vitu vya asulusa ngunda. ¹⁶ Kakanikiya kwa mundu yeyote kupotwa kilebe sosote muhekalu sa kisalulwage. ¹⁷ Kabayegana na kukoya, "je iandikwe kwaa, nyumba yango yakemwa nyumba ya sala kwa mataifa gote? lakini mutei lipango lya anyang'anyi." ¹⁸ Makuhani akolo na aandishi bayowine ga akoyage, na bembe kabapala ndela ya kum'bulaga. Hata hivyo bayogwipe mwalo bandu banyansima batekanganywa na mapundisho gake. ¹⁹ Kila pa yaike kitamunyo baboi mjini. ²⁰ Kabatyanga bwamba, baabweni ntela wa mmwitu uyomike mpaka mikega gake yake. ²¹ Petro kakombokya na kukoya "Rabi lola, ntela wa mmwitu wa ulaanike uyomi." ²² Yesu kabayangwa, mube na imani kwa Nnongo. ²³ Amini nando kuwakoya kila ywa akikokeyue kitombe seno,'Boka na ukaitage wa mwene baharini mana kana ntopo masaka kumoyo wake lakini abi na imani sa akoiye sapitya, Eyo ndivyo Nnongo atenda. ²⁴ Eyo nendo kuwabakiya kila kilebe sa muyopa na kulokiya kwa ajiri yake, amini na mpokile navyo vya ba vinu. ²⁵ Wakati wa kuyema na kuyopa, mnapaswa kusamehe sambi naso dhidi ya mundu ywenge, ili Tate binu bambinguni abasameeni mwenga mukosa yinu. ²⁶ (Zingatia: mstari uno, Lakini msipo samehe tate binu wa mbinguni na ywembe hata wasamehe masambi ginu. ntopo mu mistari ga kale) ²⁷ Baisi Yerusalem kwa mara yenge. Yesu katyanga hekaluni, Makuhani akolo, aandishi na agoi baisi kwake. ²⁸ Kabankokeya, kwa mamlaga gani utenda iyeya?" Nyai akupei mamlaka ya kutenda gano?" ²⁹ Yesu kabakokeya, naalokiya swali limo. Nikokeyage nani naakokeya nitenda gano kwa mamlaka ga nyai. ³⁰ Je, ubatizo wa Yohana wa omi mbinguni au wapii kwa bandu? Niyangwaye." ³¹ Kabajadiliana bene kwa bene kabashindana na kukoya "mana tukoiye kuoma mbinguni, akoya mwalowa kele hamkumuamini? ³² Mana twakoya kuomba kwa bandu,... "Bayogwipe bandu, mwalo bote bakoyage Yohana abi nabii. ³³ Kabam'yangwa Yesu na kukoya, "Tutangike kwaa" Yesu kabakokeya, "Wala nenga nabakiya kwaa kwa mamlaka gani nitenda gano.