¹ Gono mwanzo wa Injili ya Yesu Kirisitu, mwana wa Nnongo. ² Kati mwaiandikwe na nabii Isaya, Lola nandokubatuma asenga bango kulonge yinu, yumo apetwaa ndela yako. ³ Lukalanga wa mundu kakema mpongote, yomolyae ndela Bwana; boneyaye ndela yake". ⁴ Yohana ateisa, kabaatiza mpongote na kuyegana ubatizo wa toba ku mzamaa wa sambi. ⁵ Nnema nzima wa Sudea na bandu bake ba Yerusalemu bayei kwake. Bai kababatizwa ni ywembe mulupondo Yordan, kabaungamana masambi gabe. ⁶ Yohana awalage ngobo ya mayunzu ga ngamia na nkibuno mkwisi was likengo, na alyage busi wa mwitu. ⁷ Atelongela na ukoya, "Abi yumo Ando isa kuoma nee, abi na ngupu kuliko nee, nipwaa kwa ha Lita pae kuundua ilatu yake. ⁸ Nenga niabatza kwa Mase, Ywembe abatiza mwenga kwa roho mtakatifu. ⁹ Yaomi lisiku eyo Yesu aisi kuoma Nazareti ya Galilaya, na atebatizwa na roho mulupondo Yordani. ¹⁰ Yesu yaagakatwike kuoma mmase abweni kunani kusalanike pala na roho kauluka pae kunaniyake kati ngunda. ¹¹ Na lukalanga waomi kunani, "wenga wa manango mpendwa. Nandopulaika muno na wenga". ¹² Mara yimo roho atikunnasimisa ayende mpongote. ¹³ Aabii mpongote lisiku arobaini, kagiywa na nsela. Ai pamwepe ni igongoro ya mmwitu, na malaika kabanlola. ¹⁴ Tubwe kumona kuboyolwa kwa Yohana, Yesu aaisi Galilaya katangasa Injili ya Nnongo, ¹⁵ Kaakoya "muda uike, na upwalume wa Nnongo uisi. Mubuye kwa Nnongo ni muamini mwinjili. ¹⁶ Na kaapeta mmbwega ya mbwani ya bahari ya Galilaya, kaammona Simoni na Andrea alongo bake Simoni kabataga mbelele yabe mmase, kwakuba baisi aubaji. ¹⁷ Yesu abalogoli "muise, mungote, na niatenda aubaji ba bandu". ¹⁸ Mara yimo baalei mbelele na kunkota. ¹⁹ Wakati Yesu ayei kutalu kasunu, na kaammona Yakobo mwana wake Zebedayo na YohanaNnunage, bai nngalaba kabapota mbelele. ²⁰ mara kabaakema na bembe kabanleka tate babe nngalaba na atenda kasi benge, kabankota. ²¹ Apobaike Kaperaniamu lisiku ya sabato, Yesu kayingya mulisinagogi na kuyegana. ²² Batekanganya liyegano lyake kwa yelyo abi kayegana kati mundu abi na upwalume na ayendana kwa na aandishi menge. ²³ Muda gogo kwabi na mundu mulisinagogi labe abi no nsela na ateguta. ²⁴ Kaakoya "tubi na selosa utenda nimwenga, Yesu wa Nazareti? uisikutuangamisa? Nandokututaga nyai wenga. Wenga wantakatifu yikayako kwa Nnongo!" ²⁵ Yesu kaankopokya nsela na kukoya "Nyamala na uboke nkati yake!" ²⁶ Ni roho njapu kantomboya pae na kupita kalele kwa liyobe la kunani. ²⁷ Nibandu bote batekanganya eyo kabalokiyana kila yumo, "Seno kele? liyegano lyaayambe libiniupwalume? Na nsela kunkota ago akoya!" ²⁸ Nimayegeyo kuhusu ywembe mara yimo yalitawala kila nsengo nnema nsima wa Galilaya ²⁹ Mara yimo baada ya kupita kunza ya Lisinagogi, Baayingi ukaya kwa Simoni na Andrea bai na Yakobo na Yohana. ³⁰ Sasa akibe alwawa Simoni abiagonzike kabinya homa, mara yimo kabankokeya Yesu ubinye wake. ³¹ Eyo kaisa, kankamwa luboko, Na kunkagatuya, homa yaboi muyega yake na utumbwa uudumya. ³² Kitamunyo eyo lisoba liwile Abinye bote baaletikwe kwake, au babi Na nsela kumutwe. ³³ Nnema nsima baikonzike pamwepe pa nlyango. ³⁴ Atealagwa Abinye banyansima mabinye mbalembale na kupiya nsela(mahoka) banyansima, aakani mahoka kulongela maana batekuntanga. ³⁵ Aayumwike bwamba muno lubendo lukatama; aaboi na kuyenda pandu abonekane kwa Na mundu na kayopa oko. ³⁶ Simoni na bote baipamwepe na ywembe baankotike. ³⁷ Baammweni na kunkokeya "kila yumo andokupala". ³⁸ Atekubabakiya, "Tuboke kundukwenge, kunza ya gono nnema, ili niwese ulongela na uko iyeya. Ndio mwalongo was kuisa pano. ³⁹ Ayei kapeta Galilaya yote, kalongela mmasinagogi yabe Na kukemea mahoka. ⁴⁰ Kaisa mundu yumo abi ni ukoma. Abi kampembela; aatengwi majua na kunkokeya"Mana kaupala tenda nibe na nkoto". ⁴¹ San'yingikiya, Yesu katondobeya luboko lwake na kunkamwa kankokeya, "nipala ubebwise". ⁴² Mara yimo ukoma waamboi, katenda kuba bwiso. ⁴³ Yesu atekunkopokya kwa ukale Na kumbakiya ayende marayimo. ⁴⁴ Atekumbakiya, "kanaukoye liyaulyo kwa yeyoteywa, lakini boka ukajibineye kwa kuhani, Na upiye dhabibu kwa utakaso Musa atelagiya, katiusaidi kwabe." ⁴⁵ Ateboka Na kutumbwa kumbakiya kila yumo nikukoya liyaulyo muno hata Yesu awesome kwa lelo kuyingya pannema kwa uhuru. Eyo atami pandu pakiiyo na bandu baisi kuoma kila nnema.