¹ Bai Pilato atikumtola na kumkombwa. ² Balo askari kabasokota miimwa na kulichenga litaji. Baibeka nnani ya ntwe wa Yesu na kun'walisha livazi lya rangi ya dhambarau. ³ Kabaisa na kubaya, "Wenga mpwalume wa Ayahudi! na boka po kunkombwa kwa maboko yabe. ⁴ Pilato kaboka panja na kuabakiya bandu, "Linga nialetya mundu yoo kwinu ili mutange kuwa nenga niiboniya kwaa hatia yoyote nkati yake." ⁵ Kwa eyo Yesu kaboka panja; Abile atiwala litaji lya miimwa na ngobo ya zambarau. Pilato kammakiya, Mulinge mundu uyu pano! ⁶ Kwa eyo muda kuhani nkolo na akolo pabamweni Yesu, kabakombwa lilobe no baya, "Mmulage, mmulage." Pilato kaamakiya "Muntole mwenga mwabene mukammulage, kwa kuwa nenga niibweni kwaa hatia nkati yake. ⁷ Ayahudi kabanyangwa Pilato, "Twenga twabile na saliya, na kwa saliya eyo impalika kuwaa kwa sababu ywembe aipangite kuwa mwana wa Nnongo." ⁸ Pilato paayowine maneno aga ayogopile muno, ⁹ kayingya Praitorio kae na kummakiya Yesu, "Wenga uboka kwako? Hata nyo, Yesu anyangwa kwaa. ¹⁰ Boka po Pilato kammakiya, "Je wenga ulongela kwaa na nenga? Je, wenga utangite kwaa kuwa nenga nabile na mamlaka ga kukuyongoli na mamlaka ga kukusulubisha?" ¹¹ Yesu kanyangwa, "Mana ubile kwaa na likakala dhidi yango kati upeyelwa kwaa boka kunani. Kwa eyo, mundu ywanibokite kwako abile na sambi ngolo." ¹² Bokana na lijibu lee, Pilato apala kunneka huru, lkini Ayahudi akombwile lilobe kabaya, "Kati unneka huru baai wenga wa rafiki kwaa ba Kaisari: Kila ywapangaye kuwa upwalume ubaya kunchogo ya Kaisari." ¹³ Pilato paayowine maneno aga, kamnetya Yesu panja boka atama mu'itego sa hukumu mahali palo payowanike kati sakafu, lakini kwa Kiebrania Gabatha. ¹⁴ Lisoba lya maandalizi lya mashaka yaiikite, pabile muda wa saa ya sita. Pilato aabakiya Ayahudi, "Mulinge mpwalume winu ayoo pano!" ¹⁵ Kabakombwa ndoti, "Mboywe, mboywe, mmulage!" Pilato kaabakiya, "Je, nimmulage mpwalume winu?" Na ywembe kuhani nkolo kayangwa, "Twenga twabile kwaa na mpwalume ila Kaisari." ¹⁶ Nga Pilato abapeile Yesu ili bam'bulage. ¹⁷ Na bembe kabantoloa Yesu, na ywembe kaboka, abile autweti msalaba wake mwene mpaka ku'lieneo lyakemelwa Fuvu lya ntwe, kwa kiebrania ukemwa Golgotha. ¹⁸ Nga kabamsulubisha Yesu, pamope na yweme analomea bele, yumo upande wa kummalyo na ywenge upange wenge, na Yesu nkati yabe. ¹⁹ Boka po Pilato atiandika alama na kuibeka nnani ya msalaba. Palyo paandikilwe: YESU YWANAZARETH, MPWALUME AYAHUDI. ²⁰ Baingi ba Ayahudi baisomite alama yee mana mahali palyo paasubilishwe Yesu pabile papipi na mji. Alama yee iandikilwe kwa Kiebrania, kwa Kirumi na kwa Kiyunani. ²¹ Boka poo akolo ba makuhani ba'Ayahudi kabammakiya Pilato, "Kana uandike, 'Mpwalume wa Ayahudi; ila ywembe abayite nenga na mfalme wa Ayahudi." ²² Na ywembe Pilato kanyangwa, "Yaniiandikiye niiandikyange." ²³ Baada ya askari kum'bulaga Yesu, kabantola ngobo gake na kuagawa mu'mafungu ncheche, kila askari lifingu limo, nyonyonyo na nganju, Nambeambe yelo nganju yabile kwaa itishonwa ila yabile ipumilwe yote boka kunani. ²⁴ Boka po kabakokeyana bene kwa bene, "Kana tuipapue ila tuipigiye kura ili kubona yabi ya nyai." Lee lapangite ili lelo liandiko litimye, lelo lyabaya kabagawana ngobo yango, na nganju yangu waipigiya kura. ²⁵ Askari bapangite makowe aga. Mao bake Yesu, dada wa mao bake, Mariamu nnyumbo bake Kleopa na Mariamu Magdalena-anwawa aba babile bayemile papipi na msalaba wa Yesu. ²⁶ Yesu paamweni mao bake pamope na yolo mwanapunzi bake ywampendile bayemite papipi, kamakiya mao bake, "Nwawa, linga, lola mwana wako ayoo pano!" ²⁷ Boka po kammakiya yolo mwanapunzi, "Linga, aywoo pano mao bako."Boka saa yee yolo mwanapunzi kamtoloa kuyenda munyumba yake. ²⁸ Baada ya lelo, Yesu abile atangite kuwa yote yayomwike ili kugatimiza maandiko, kabaya, "Nabona kiu." ²⁹ Iombo yaibile imejaa Siki chabile kibekilwe palyo, kwa eyo bakabeka sifongo yaijaile siki nnani ya ufito wa hisopo, kabambekeya mu'nkanwa wake. ³⁰ Na ywembe Yesu aionjile yoo, kabaya, "Iyomwike." Boka po kaiinamisha ntwe wake, na kumpeya roho yake. ³¹ Kwa kuwa ibile na muda wa maandalio, na kwa kuwa yega ipalikwa kwaa kubaki nnani ya msalaba muda wa sabato(kwa mana Sabato yabile siku ya muhimu), Ayahudi bamloba Pilato kuwa magolo gake balo babile batisulubishwa itekwanike, na kuwa yega yabe itombolewe pae. ³² Nga askari bapaisile na kugatekwana magolo ga bandu ba kwanza na wa ibele ywabile atisulubiwa pamope na Yesu. ³³ Pamuikile Yesu, batimkuta tayari ywabile tayari atiwaa, kwa eyo kabatekwana kwaa magolo gake. ³⁴ Hata nyo, yumo wa askari atikunchoma Yesu mu'ubavu wake kwa mkuki, na mara kababoka mase na damu. ³⁵ Ni ywembe ywalibonekeya lee aboite ushuhuda, na ushuhuda bake ni wa kweli. Ywembe ywatangite kuwa chaakibaya na cha kweli ili mwenga muamini kae. ³⁶ Makowe aga gapangite ili litimye lelo lineno lyalibayite lipate timya, "Ntopo hata wake yumo wautekwanike." ³⁷ Kae liandiko lyenge gabaya, "Balowa kulinga ywembe ywamchomile." ³⁸ Baada ya makowe aga Yusufu wa Arimathaya, kwa kuwa abile mwanapunzi wa Yesu, lakini kwa siri kwa kuaogopa Ayahudi, atikunloba Pilato kuwa autole yega wa Yesu. Na ywembe Pilato kampeya Ruhusa. Kwa eyo Yusufu kaisa kuuboywa yega wa Yesu. ³⁹ Na ywembe Nikodemo ywabile hapo awali atikunkengama Yesu kilo na ywembe kaisa. Ywembe aaletike mchanganyiko wa manemane na udi, yapata uzito wa ratili mia jimo. ⁴⁰ Kwa eyo kabautola yega wa Yesu bautabile mu'sanda ya kitani pamope na galo manukato, kati yaibile desturi ya ayahudi muda wa kusika. ⁴¹ Mahali ambapo Yesu atisulubilwa pabile na bustani; nkati ya yelo bustani pabile na likaburi lyaayambe ambalo ntopo mundu ywabile amewai kusikwa mu likaburi lee. ⁴² Bai kwa kuwa yabile na lisoba lya maandalio kwa Ayahudi, na kwa nyonyonyo likaburi lyalibile papipi, bai kabam'beka Yesu nkati yake.