¹ Duri dalam'p Daging'k Paulus Oko harus berbangga walaupun't nyen me manguntong'k. Oko nak menerus pamantau-pamantau aba penyataan-penyataan dari Tuhan. ² Oko ngantaok sikok dalam'p Kristus, yang empat belas taun't lalu dah ncang'k ka surga tingkat toruh --entah di dalam'p unan neh, oko me taok; atau di luar unan, oko gak taok, Allah yang taok. ³ Aba, oko taok kanih onya-onya nto -- entah di dalam'p atau di luar unan neh, oko me taok, Tuhanlah yang taok, -- ⁴ iyo nongkat ka Firdaus aba ngoping'k omong-omong yang me tanomong, yang me bia nomong mansia. ⁵ Nak onya nto nak berbangga, jak neh nak oko dodop, oko me naka berbangga kecuali atas kalomah-kalomah oko. ⁶ Jak neh, kalok oko cokok berbangga, oko me nak manyadi bulo ntam'p oko monang'k kabenar. Jak, oko nganahan neh gek madeh onya yang mantau oko lebeh dari onih yang denak pantau atau yang denak kaping'k tentang'k oko. ⁷ Nak nganyaga gek oko me talalu berbangga atas penyataan-penyataan yang luar biasa nyen, maka sitek dure nyok dalam'p unan oko, yaitu utusan Iblis nak nganyusah oko gek oko me nganningi oko dodop. ⁸ Manenal hal, nto oko mintek mun ka Tuhan sabokah toruh kali gek hal nyen marontik oko. ⁹ Jak neh, Iyo baromong ka oko, "Anugerah-Oko cukup nak omo ntam'p kuasa-Oko di sempurnakan dalam'p kalomah." Ntam'p nyen, oko lebeh madah berbangga atas kalomah oko gek kuasa Kristus diam'p dalam'p oko. ¹⁰ Ntolah sebab neh, oko ngarasa madah dalam'p kalomah, dalam'p panyiksa, dalam'p kasukar, dalam'p panganiaya, aba dalam'p kasulit aba Kristus. Ntam'p pas oko lomah, maka oko kuat. Kaseh Paulus nak Jemaat di Korintus ¹¹ Oko dah manyadi bulo ntam'p omo ngamaksa nak nyen, padahal oko seharus neh panuji omo. Ntam'p, oko me kurang'k onih-onih bananning'k padak rasul yang luar biasa nyen, meskipun't oko madeh onih-onih. ¹² Tana-tana yang ngamukti sikok rasul dah nayok di antara omo dalam'p' segala katabah, dalam'p tana-tana, mukjizat-mukjizat, aba keajaiban-keajaiban. ¹³ Ntam'p, dalam'p onih kah omo narenah dari dari jemaat-jemaat lain't, kecuali kalok oko me manyadi beban't nak omo? Mintek maaf ntam' me adel oko nto! ¹⁴ Jong'k nto, oko siap nak nomu omo nak katoruh kali neh aba oko me nak manyadi beban't nak omo ntam'p oko me ngunah onih yang omo odeh, ngalain't neh omo. Ntam'p, onak-onak me wajib mangumpol reta nak onya muntuh neh, jak onya muntuh nak onak-onak neh. ¹⁵ Aba, oko nak aba madah mangaroban't mpo oko aba oko dodop nak omo. Kalok oko lebeh mangaseh omo, apakah omo nak kurang'k mangaseh oko? ¹⁶ Jak neh, meskipun't oko me nak beban't nak oko, omo monang'k oko licik aba nganyerat omo aba tipu musliat. ¹⁷ Apakah oko miak kauntong'k dari omo ngalaui onya-onya yang oko nutus ka omo? ¹⁸ Oko nganesak Titus nak obu aba ngutus posik manak nak obu basama iyo. Apakah Titus miak kauntong'k dari omo? Apakah manak me bajalan't dalam'p roh yang sama aba bajalan't dalam'p tapak-tapak yang sama? ¹⁹ Lalu, apakah omo dah lamat miker kalok manak ngamela odop dodop manak terhadap omo? Manak baromong di adap Allah dalam'p Kristus, tetapi hal-hal nto, hai yang terkaseh, odelah nak ngamangun omo. ²⁰ Ntam'p, oko golak, kalau-kalau pas oko monik, oko nak nomu me mpah yang oko narap, aba omo me nak nomu oko mpah omo harapkan. Mesah-mesah odeh odeh pasaliseh, iri oti, amarah, kapenteng'k odop dodop, fitnah, desas-desus, kasomong'k, aba kekacau. ²¹ Oko khawater pas oko monik lagek, Allah oko nak ngarenah oko di adap omo aba oko nak baduka atas bokah onya yang tian't eh dah badosa sebelum neh aba tetap me batobat dari kenajis, percabulan, aba hawa nafsu yang dah denak nalaku.