¹ ئەمە بینینێکە لەلایەن خوداوە بە یەشوای مەسیح دراوە، بۆ ئەوەی ئەو شتانە بۆ خزمەتکارەکانی ئاشکرا بکات کە دەبێت بەم زووانە ڕوو بدەن. مەسیحیش لە ڕێگەی فریشتەکەیەوە بۆ یۆخەنای بەندەی ئاشکراکرد. ² شایەتحاڵی یۆخەنا لەسەر وشەی خودا و شایەتحاڵی یەشوای مەسیح، و هەموو ئەو شتانەی کە بینیویەتی. ³ بەختەوەرە ئەو کەسەی ئەم پەرتووکی پێشبینییە دەخوێنێتەوە و بۆ ئەوانەی دەیبیستن، و چاودێری ئەوە دەکەن کە تێیدا هاتووە، چونکە وادەی هاتنەدی پێشبینیەکە نزیکە! ⁴ لە یۆخەنا، بۆ حەوت کڵێساکەی هەرێمی ئاسیا: بەخشش و ئاشتیتان بۆ بێت لەوەی کە هەبووە و کەهەیە و کە دێت، و لە حەوت گیانەکەی بەردەم تەختەکەی، ⁵ لە یەشوای مەسیحەوە شایەتحاڵی دڵسۆز، نۆبەرەی ئەوانەی لە مردن هەستانەوە، پاشای پاشاکانی زەوی، لەبەر خۆشەویستیەکەی بۆ ئێمە لە پێناوماندا مرد و بە خوێنی خۆی لە گوناهەکانمان شۆردینیەوە، ⁶ وە ئێمەی کردە شانشین، و کاهین بۆ خودای باوکی، شکۆمەندی و دەسەڵات بۆ ئەوە بۆ هەمیشە و هەتاهەتایە. ئامین! ⁷ ئەوەتا ئەو لەگەڵ هەورەکان دێت! هەموو چاوێک دەیبینێت، تەنانەت ئەوانەش کە ڕمیان لێدا، هەموو هۆزەکانی سەر زەویش بەهۆی ئەوەوە ماتەمینی دەگێڕن! بەڵێ، ئامین! ⁸ «من ئەلف و ێم» (سەرەتا و کۆتایی). ئەمە دەفەرموێت پەروەردگاری خودا کە هەبووە و هەیە و دێت، توانادارەکە بەسەر هەموو شتێکدا. ⁹ من، ێۆخەنای براتانم و هاوبەشی تەنگانە و شانشینی ئارام گرتن لە یەشوادا، دورخرایەوە بۆ دوورگەیەک کە پێی دەوترێت پەتمۆس، لە پێناوی وشەی خودا و شایەتحاڵی یەشوا. ¹⁰ لە ڕۆژی پەروەردگار، لە گیانەکەدا بووم، لە پشتمەوە گوێم لە دەنگێکی بەرز بوو وەک کەڕەنا ¹¹ دەفەرموێت: «ئەوەی دەیبینیت لە پەرتووکێکدا بینووسە، و بینێرە بۆ حەوت کڵێساکە: لە ئەفەسۆس، سمیرنا، پڕگامۆس، سیاتیرا، ساردس، فیلادلفیا و لاودیکیا». ¹² کاتێک ئاوڕم دایەوە بۆ دەنگەکە، حەوت چرادانی زێڕينم بینی، ¹³ کە ڕووم کردە دەنگەکە، یەکێکی وەک ڕۆڵەی مرۆڤم بینی لە ناوەڕاستی حەوت چرادانە زێڕینەکەدا وەستابوو، جلێکی درێژی لەبەردا بوو تا بەرپێی، وە پشتێنێکی زێڕینی لە سنگیوە پێچا بوو. ¹⁴ مووی سەری وەکو خوری بێگەرد وەک بەفر سپی بوو، چاوەکانی وەک بڵێسەی ئاگر بوون. ¹⁵ پێیەکانی بریقەدار بوو وەک مس کە بە ئاگر پوختە کرابێت، دەنگیشی وەک هاژەی تاڤگە وابوو، ¹⁶ ڕووخساری وەک خۆری نیوەڕۆ بە ڕووناکی دەدرەوشایەوە. حەوت ئەستێرەی لە دەستی ڕاستی بوو، شمشێرێکی تیژی دوو لێوار لە دەمی دەرچوو. ¹⁷ کاتێک بینیم وەک مردوویەک کەوتمە بەر پێیەکانی، بە دەستی ڕاستی دەستی لێدام و فەرمووی: «مەترسە! من یەکەم و دواهەمینم، ¹⁸ منم زیندووەکە. مردبووم، بەڵام ئەوەتا ئێستا بۆ هەتاهەتایە زیندووم. کلیلەکانی مردن و جیهانی مردووانم پێیە. ¹⁹ بنووسە چیت بینی، و ئێستا چی ڕوودەدات، وە ئەوەی خەریکە لە داهاتوودا ڕوودەدات. ²⁰ نهێنی ئەو حەوت ئەستێرەیەی کە لای ڕاستم بینیت، و حەوت چرادانە زێڕینەکەش ئەمەیە: حەوت ئەستێرەکە فریشتەکانی حەوت کڵێساکەن، حەوت چرادانەکەش خودی حەوت کڵێساکەن.