1 Yakobo, omubhaghati we Eryoobha , rya Tatabhugya Yeesu Kristo, ezihamati ikumi nibhiri zino zinyarageni, ndabhakerya. 2 Obhare kubha obhuzomererwa bhukuru, bhahiri bhane hano mukuhita mumabhi gahagari hagari. 3 Mungamenyiri kubha bhakabhasakya kwo kwikirirya kwenyukubhahana okuhorera. 4 Mutige obhuhoreru muimare omutino gyaye kubha munagye kukong'a henehene kutiga kusuhirwa kuryoryosi rirya. 5 Kwego aribha ariho omutu omurikienyu arenda okusuka asabhe kurya Kuryoobha wuno akurusya kwoobhuzomerwa, kutari kurekya kubhosi bhano bhakumusabha, araha okusuka. 6 Kweego sabha kwokwikirirya, ukutura obhwobha, kwookubha owokutura obhwobha ni amabhoka ga munyanza, niragegwa no obhukama, mo okurekerwa eyo neyo. 7 Kwookubha omutu wuno atige kwisega kubha arasurung'anwa, erisabhi ryaye kureka Kutatabhugya. 8 Omutu wuno abheri namisango abhiri, arari kisi ghati ghati wenzira zyaye zyosigo. 9 Abhahiri abhatak bharenderwa kwizuma kwimerera iguru waye. 10 Kwibhaga riyo riyo abhahiri abhanibhi bharasuka kunewe, kwookubha ararekaho kya amaua ga mwiginga. Mumugundu ghati wo omugundu guno akuhita. 11 Omubhaso gurasomoka na Eryooba bhiharungurya no okwomia ebhyakurya kweego amaua garagwa no obhuzomu bhwaye bhurakwa. Ego ego abhaatu abhanibhi bharanyara ghati ghati yemirimo gyaye. 12 Anaeribhando omutu wuno akwikong'ererya, nezinyako kyego hano hakumara enyako yiyo aragegha orusangarya yobhuhoru yino yaragirwe kubhano bhasegiri Eryobha. 13 Omutu wowosi etakwenderwa hano akusakibhwa, ''enyako yino erahwa Kuuryobha'' kwookubha Eryobha ritakusakibhwa no obhubhine Eryobha eryene ritakusakibhwa wowosi. 14 Abhatu bhosi bharasakya emigono gyabhu emibhi gino gikumung'enererya no kumuruta kure. 15 Niho kwego yoomugono gwa obhusagarya kugega enda, obhusagarya kwibhurwa, ruho kwega obhusagarya bhukong'iri hene hene, bhurahuera kuruku. 16 Abhahiri bhane abhasegwa, mutang'enereribhwa. 17 Kwo omubhano omuzomu noomubhano ghuno ghubheri ghurareka iguru, ghurituma hasi kureka Kutata wo ubhurabhu atakwikyora kye ekizururu kino kikwikyora. 18 Eryobha rikasora okutuha etwe obhuhoru kwe eng'ana yoobhuhene, kwookubha tubhe kyoorwibhuro rwo okutanga ghati ghati mwebhigiro bhyaye bhosigo. 19 Mumenyiri rino bhahiri bhane bhasegwa kumumwe arenderwa abhe mwangu wo kwigwa, atabha mwangu wa kughamba no kutinda. 20 Kwo kubha obhururu bho omutu bhutakunagya kukora mahene ge Eryobha. 21 Kwego muture kura obhunyaka bha amabhi na amabhihu bhwosi bhuriho ahagiro hohosi, kwo okusuka murigege ering'ana rino ryemibhwe mwosi wenyu, obhunagya bhwo okuturya ezikoro zyenyu. 22 Murisuke ering'ana murigwe muteng'ana muzikoro zyenyu abhene. 23 Kwo okubha kuwowosi wunuyigwiri eng'ana kukora mirimo kwego omutu yirorere obhusyo bhaye mukirore. 24 Wibhurye obhusyo bhaye aragya ziaye na kwibhaga iguhi arabha kyego atubheni. 25 Kwego omutu wuno akwirora kwo obhuzomu erihatike nerihatike rya okusuka, kwego ewe nimwitegereri wuno akwebha, omutu wuno anaeribhando araikora. 26 Omutu wowosi wuno akwisega omwene kwo okubha no omutu we risengerero, nawe atakunagya kuhiza ororimi ryaye,okung'enererya ekoro yaye ne erisengerero nibhusa. 27 Erisengerero erizomu rino ritakusaribhwa kubhukangati bhwe Eryobha ne Tata: kubhasakirya abhana bhano bhakwererwe bahri munyako abhajane ne nyako yo mkyaro.