Ekiseku 1

1 Pauro omubhagati wa Kristo Yeesu kumegha ghe Eriobha, bhwahenebhwahene no obhragi bhwaye bhwo obhuhoru bhuno bhuri mwosi ya Kristo Yeesu. 2 Ku Timotheo omwana omusegwa orubhango, ebhigongi, noobhuhoreru kurwa ku Riobha Tata na Kristo Yeesu Tatabhugya wetu. 3 Nirarikumia Eriobha, rino nikuhokerya kwo omutima muzomu kyego bhakoriri Bhatata bhane, hano nikuhituka ibhaga ryosi sami bhane obhutiku no omwisi. 4 Mumwisi ndagongerya okukurora, nimenye kwizuribhwa no obhuzomererwa ndazihituka ezingusuri zyazo. 5 Nibheri ndahitukibhwa kuhene yazo ya hene, yino embere hayoekikara mwosi wazo hosi. 6 Yino niyo ekukora ndakuhitukya okusindirirwa obhunagya bhwe Eriobha bhunobhurimu mwosi wazo kwe enzirz yo kuturibhwa amabhoko ghane. 7 Kwookubha Eriobha ritatuheri ekoro yo obhwobha, eno nikwezinguru no obhusegi no obhusuki. 8 Ku ghayo utabhurorerera ezisoni kukerenia kumang'ana ga Tatabhugya wetu, wara obhwene enye Pauro omubhohwa waye. Akiriku ogwate enyako kwe eng'ana ye kina kyabwahene bwahene no obhunagya bhwa Eriobha. 9 Nie Eriobha rino ryatuturirye no okututura ku bhuhirikiri bho bhweru. Atakoririgo kwokuring'ana neemirimo gyetu nawe kwookuring'ana no orubhango no mpamgo gwaye omwenego. Akatuhana amang'ana gayo gati wa Kristo Yeesu kwibhaga rino ryari kutanga. 10 Nawe bhono obhuturibhwa bhwe Eriobha bhumariri kukundukurwa kwo okuza kwo omuturya wetu Kristo Yeesu. Ni Kristo wuno yanagiriryeho oruku no okutoraho obhuhoru bhuno bhutakuhwa kwo obhweru bhweekina. 11 Kumang'ana gayo nikasorwa kubha omurwazi, mubhaghati no omwegy. 12 Kumang'ana ghano ndanyakibhwa kweki, nawe ntakurora soni kwo okubhwa nimumenyiri ewe wuno nimariri kumwikirirya, ninabhwe obhuhene kubha ewe aranagya kukibhika kirya kino nimariri kuhana kunewe hata orusiku rurya. 13 Ohituke obhutubhania bhwa amang'ana goobhuhene bhuno witegerere kureka kuninye, hamwe ne ehene no obhusegi bhwa mwosi ya Kristo Yeesu. 14 Obhike amang'ana amazomu gano akugwatirirya Eriobha kuhitira ekoro enzeru yino etari mwosi wetu 15 Omenyiri kubha, bhosigo bhano bhakwikara eyo Asia. bhakanihatira mwihozo rino bharimu Figero na Hemogene. 16 Taatabhugya ayirorere ebhigongi enyumba ya Onesiforo kwookubha mara karuatagirorereri soni eminyororo gyane. 17 Kumweya gwaye, hano yabhaga Roma akanimohya kwo omukya akaninyora. 18 Eriobha rimusakirye kunyora ebhigongi kurwa kunemwe orusiku rurya. Kyego ansakirye hanonari Efeso, awe omenyiri bhuzomu.