1 Bhoono iguru wo okuza Tatabhugya weetu Yeesu Kristo na okukumanibhwa hamwe tubhe nawe turabhasabha emwe bhahiri bhetu, 2 kubha mtaaza kunyakibhwa nyakibhwa kwoobhunyohwiigo, kwo ekoro na kwa amang'ana hamwe kweering'aara rino rikuza kubhuga kubha orusiku rwa Tatabhugya rwookuuza rubheeri. 3 Mutu atabhang'enererya kwa tee mwa yoyosi kwookubha rutakuuza tee okubha kwa amahokya ga abhatu kurorekane hinga noomuutu woobhuhabhi akundukurwe, omwana wurya woobhusarya. 4 Wuuno niwe akanga no okwituura iguru wa goosi kukira Eriobha na kino kyoosi kikusengerwa. Na amaaza gaku arikara iguru we erihuna rya Eriobha ryookusengereramu nookwiyerekenia kubha ewe ni kye Eriobha. 5 Awe, mutakuhiita kubha hano niari hamwe na nemwe nikabhabhuurira iguru wa amang'ana gano? 6 Bhoono mumenyiri kirya kikumuribhira, kubha ature kukundukuwa kweeribhaga rino rikwenderwa hano rirahike. 7 Kwookubha eniku yoomutwoyo omwene akuhabha erakora emirimo na bhoono, nawe areho akumuribhira bhoono tee hano ararusibhwe kuunzira. 8 Niho wuno ahabhiri akuza kukundurwa, wuno Tatabhugya Yeesu aramwiita kwoomwika gwoomunwa gwaye. Tatabhugya aramukora abhe kigiro kyookuzeera kwoobhukundukuro bhwoobhuzi bhwaye. 9 Obhuuzi bhwa omuhabhi wuno ahabhiri bhurabha kwookubha ya emirimo gya shetani kweezinguru zyoosi, obhwerekenio noobhuhahyo bhwoorurimi, noorurimi rwoosi amahokya amabhi. 10 Amang'ana gano garaza kubhaho kuubharya bhakubhura kwookubha bhatagegiri obhusegi bhweeheene kwookutuuribhwa kwaabhu. 11 Kwookubha ya gayo Eriobha arabhareetera emirimo gino ginoobhusarya niho bhikirirye ororumi. 12 Obhwerekenio ni kubha bhoosi bharatinirwa ekiina, bharya bhatikirirye obhuhene nabho bharazomererwa muubhuhokya bhwa amang'ana amabhi. 13 Nawe eratutunia tumugungye Eriobha kwibhaga ryoosi kwookubha yeenyu abhahiri bhano musegirwe na Tatabhugya. Kwookubha Tatabhugya akabhasora emwe kyoobhutongore bhwo okutuuribhwa kwookusindurwa kwe ekoro noobhwikirirya bhweeheene yorya. 14 Kino nikyo abhabhirikiriri emwe, kubha kuhitira ekiina munagye okubhubhona obhweru bhwa Tatabhugya wetu Yeesu Kristo. 15 Kweego, bhahiri, mwimerere eno mukong'eeri. Mubhumenye ubhunyanyangi bhuno mukeegibhwa, kweeng'ana abhe kweeriing'ara ryeetu. 16 Bhoono, Tatabhugya wetu Yeesu Kristo omwene ne Eriobha Tata wetu wuno akatuseega nookutuha obhwiisige bhwa kira keego noo bhusubhe subhe obhuzomu kwoobhwikari bhuno bhukuuza kuhitira eriruguto, 17 arabhaha obhwisege nookuzikora ezikoro zyeenyu kong'eru kwa amang'ana goosi neemirimo mizomu.