Ekiseku 6

1 Na kwego, okukora emirimo hamwe, turasabha emwe mutige kugega orubhango rwe Eriobha kutana kuhika. 2 Kwo okubha arabhga, "Eribhaga rwo okwikirirya nihabhakisi kweemwe, na ezisiku zyo obhutuurya nikabhasakirya." Rora, bhano ni ibhaga ryookwikirirya. Rora, bhoono ni ezisiku zyo obhuturya. 3 Tutakutura ugina ryo kwibhira embere yo omutu wosi wosi kwo okubha tutakwendera obhuhokya bhuretwe iguru wo okukumia okubhihu. 4 Mumweya, turirora abhene kumang'ana na geetu goosi, kuubha turi abhabhagati bhe Eriobha. Turi bhabhagti bhaye kwisaaro ryo obhwigumirirya enyako, no ubhukong'u bhwe ekikarire. 5 Kutemwa kibhohe kitiri gatiyo okukora emirimo kwe ezinguru, iguru wo okubhurwa ezitiro obhutiku iguru we enzara, 6 iguru ubhuzoomu, obhung'eeni, obhwikong'ererya, bhuhene iguru we ekoro ehoreru kubhusegi obhene. 7 Turi bhabhagati bhaaye iguru we ring'ana rye ehene, iguru we ezinguru zye Eriobha. Tuna ebhigwato bha ehene iguru yo okubhoko kwo obhusubhe no okumosi. 8 Turakora emirimo gati yo okusuuka no okuregwa, gati yo kuzerwa, no okukumia. Turatunirirwa kubha bhangenererya na eribhaga turi bhahene. 9 Turakora emirimo kyamuna tutamenyekeni na hano tumenyekeni bhuzomu. Turakora emirimo kya bhano bhakukwa, na rora tukyari turikara, turakora emirimo tukusinzira, gati wa amang'ana geetu nawe tiigo kya bhano bhasinzirwe hata okukwa. 10 Turakora emirimo kya bhekirugura nawe siku zyoosi tunoobhuzomererwa. Turakora emirimo kya abhataka, nawe turabhazomerya bhaaru. Turakora emirimo kya munatutakubhona kigiro, nawe kya muna tukwikarira kira ekigiro. 11 Tuhayiri obhuhene bhoosi kunemwe Bhakorintho, ne emioyo gyetu gigukiri kwo obhughari. 12 Emioyo gyeetu gitakuribhirwa na neetwe, nawe ziraribhirwa no okwosega kwenyu abheene. 13 Bhoono iguru wo kukirania kweeheene ndakerenia kyeego kubhana, mwigure emioyo gyenyu kwa bhugari. 14 Mutagwatanibhwa hamwe na bhano bhatikirirye, kwo okubha bhuriho bhmweki gati ye ehene nokutiga? Na eriho sanga gati ya obhweru ne ekirima. 15 Ni mikiriranioki gano Kristo akunagya kubha nago na Beriari? Hamwe ewe omwikirirya arirubharaki na wuno atakwikirirya? 16 Na mikiriranioki gaariho gati ya isengerero rya Eriobha ne esanamu? Kwo okubha kyeego Eriobha rikuhaya nsikara gati wabhu na kugenda gati waabhu. "Ndabha Eriobha ryaabhu eebho bharabha abhatu bhane." 17 Kwego, "Mureka kuneebho, na mwahuke nabho," arahaya Taatabhugya. "Mutakunia kigiro kibhihu, na ndabhaginiha emwe. 18 Ndabha Taata kunemwe, emwe murabha bhana bhane bhekisubhe ne ekikari," arahaya Taatabhugya omusegi.