1 Na akaghamba hare bho, "Obhohene ndaghamba haribhenyu, abhamubhenyu bhaho abhatho bhano haimeleye hano thebhakure he bhathana obhohene ubhwa Waryobha bhorasha ko singuru. 2 Hano siahethire ishinsiko mosansabha, Yeesu akaghegha Petero, Yakobo na Yohana hamwe nawe munguku, abhene. Naho ya wansire okwisorya kobhoronge ubhwabho. 3 Amaswaro aghaye ghakawansa korabheera bhokong'u, korera omorabhia ore onswe kukiaro. 4 Neho Eliya na Musa bhakasha mbere iyabho, nabhare koshumasha na Yeesu. 5 Petero akamohoshokia akamothebhia Yeesu, "Umweghia mbuya bhetho okobha hano, nathoghahashe ibhighuthu bhithatho, ekemwe ikoaho, ekemwe ikya Musa na ekende ikya Eliya." 6 (Kobhora athashire, nke ikyookoghamba, bhobhohire bhokong'u.) 7 8 Risaaro rekasha rekabhakundekeria. Neho omoghambo ghokalishoka mwisaro ekaghamba, "Ono noomona uwane omohanshwa. Numwitheghere." Bhong'o hano bhamahereye thebharoshi montho onswe he hamwe nabho, nokobha Yeesu umweene. 9 Hano bhare kuhika kurwa munguku, akabhahana umughiro bhathakathebhia monto wowonse keno bharoshe, kuhika hano omona uwa Adamu ashe kurioka kurwa ko bhaku. 10 Neho bhabhekire amang'ana aghabho abhene. Okobha bhakanshunsha abhene kobhene nkekera "Ukuryokibhwa kurwa kobhaku" 11 Bhabhotebhi Yeesu, "Nkwake abhangororya bhakoghamba igha mpaka Eliya ashe ekembere?" 12 Akabhatebya, "obhohene Eliya narashe kothoria ethetho ibhionswe nkwake yandekirwe omona uwa omontho mpaka anyore amanyanko amaru nokorere? 13 Okobha ndabhathebhia ighaa Eliya yamara kusha, nabhamokore kyabhono bhahanshire, kya bhora ang'oro ghakoghamba kowe." 14 Hano bharingire kobhegha, bharoshe irihisho irinene te bhainare na abhasadukayo bhare ghokora nabho ishenkani. 15 Hano bhamoroshe, irihisho ronswe rekathong'ara nokomokenyera kuya komokerya. 16 Akabhoria abhegha bhaye," Morakora eshenkani kokee?" 17 Omwe kurihisho akaohonshora, "Umwegia narendethire omona wane kouwe, ana enkoro eng'ogho eno ekomokora yange kushumasha, 18 Eramokora aghankana na ukumugwesia hanse, naukurwa irihuro mumunywa na okomokora aghankana, okosia amaino na okoghandara. Nasabhire abhegha abhaho bhamurusi irisambo, okobha thebhathore he. 19 Akabhahonshora, "Urwibhoro rono rothakukumia, nandemenya na bhenyu kuhika rohee? Nenda gheghane na bhenyu kuhika rohe? Momorenthe kuuoni." 20 Bhahire omona uwaye. Enkoro engundo hano yamoroshe Yeesu, kothokera ekamosoka ko okoghankana. Umumura akaghwa hanse na no ukurusia amahuro hanse. 21 Yeesu akabhoria suwabho, "Abhaye no obhoroye bhono ko nkagha ke?" Suwabho akaghamba, "Kukurwa kobhona. 22 Ishinsiko ishienda araghwa ko omoro hatha komanshe, na kuthuna kumwitha. Hano orathone komokora kioyo kionswe omokoree uthuabhere na othothori. 23 Yeesu akamothebhia, "Nyora umukereyi? kera kentho kobha kera ko ore onswe ana umukumyo." 24 Hano Suwabho omona aghakura no okoghamba, "Ndakumia nthoria ukwanga kukumia uwane." 25 Hano Yeesu yaroshe irihisho irinene rera kenyera harebho, akakamera enkoro ingundo na koghamba, "Uwe enkoro irimumu na indibhu amathwe, ndakughira muthighe, othaka soha hare we ghwiki." 26 Yakurire kwa bhokong'u na okonyankia omona na enkoro ekamuthigha. Omona akamahekana nkya hano akure, abharu bhakaghamba, "Akure," 27 Kobha Yeesu yamogheghire no okobhoko ukwaye akamwinyokya, naomona akaimera. 28 Hano Yeesu yasohire munyumba, abhegha bhaye bhakamobhoria kukibhisa. "Nkwake thothathore kumurusia?" 29 Akabhathebia, "Kobhono thakurishoka he okobha komasabhi." 30 Bhakarwa hara nakohethera Galilaya theyathunire omonto wowonswe igho amanye hano bhare, 31 kobhora yare kweghia abhegha bhaye akabhaghambera, " Omona uwa Adamu arasha kuhikibwa komabhoko agha bhanto, nambara mwithe. Hano oranyora akure, nare mara ishisiko ithatho ariryoka gwiki." 32 Okobha thebhamanyire oroghero ruyo keno rware koghamba, na bhakobhoha komobhoria. 33 Neho bhahikire Karperinaumu. Hano bhare munyumba akabhabhoria, "Nke mware koghamba munshera"? 34 Okobha bhaka horera. Kobhora bhare konkaani ighaa nawe arenge omonene kokera bhonswe. 35 Akaikara hanse akabhabherekera ikomi na bhabhere hamwe, no okoghamba nabho, "Nyora wowonse arathuna kobha uwambere, mpaka abhe uwa nyuma na omothomwa uwa bhonswe." 36 Akaghegha omona omoke akamothora ghathe yabho, akamoghegha komabhoko ghaye akaghamba, 37 Ore onswe akwikeria omona omoke kyaono kurina iryane, honswe anyikereyi, na hano oranyore omontho anyikereyi, thakunyikerya umwene he, okobha honswe ono anthomire." 38 Yohana akamotebya, "Umweghia thweroshe omonto ararusia irisambwa korina iraho na thoka mokania, kobhora tha kuthurwa nyuma he. 39 Okobha Yeesu akaghamba, "Mothaka mokania, kobhora thaho ono arakore omoremo omonene korina iriane naneho enkagha iyende aghambe amghogho ghoghonswe kuwoni. 40 Ore onswe athakuya bhonde nabhetho uyo arenge orobhareka urwetho. 41 Ore onswe arakohana ekokombe ikya amanshe aghukunywa kobhora orenge na Kiristo, obhehene ndabhaghambera, thathabhuthe ethamabhu iyaye. 42 Ore onswe ono bhabhoria abhake bhano bhakukumia oni, ekabhaye bhuya abhoherwa irighena irya okosera kwighothi na athabhuthwe munyansha. 43 Hano okobhoko uwaho kora kosarii kobhothore, nyakara okosoha kobhohoru othana kobhoko kokera okosohakokebhohe na amabhoko ghonswe. Ko omoro "Ghono ghothakurima". 44 (Angarra: ensenkarra seno ahase hano shenyende shethakukwa no omoro ghono ghothakurima." thomo ko irithasha ndighi ighia kare). 45 Hano okoghoro ughwaho koraghosarii, kobhothore mbuya komwe kosoha kobhohoru orenge mobheru, kokera okothabhuthwa kokebhohe na amaghoro abhere. 46 ( Angarra orokara rono, "Ahase hano ishinyenda sethakukwa na omoro ghono ghotha kothora kurimibhwa" thorenge kurithasha ndighi irya kare). 47 Hano iriso iryaho neraghire osari rihe. Mbuya komwe sosoha ko obhonene ubhwa Waryobha na iriso eremwe, kokera hano orabhe na amaiso abhere na oka thabhuthwa ko bhaku. 48 Ahase hano hana ishithukumi seno sethakukukwa, na omoro ghono ghthakothora kurimibhwa. 49 Kobhora kiramotho arigheribhwi no omoro. 50 Omonyo nuumuya, hano omonyo ghora siri obhotharoku ubhwako, niyake orakore ghuringi obhotharoku ubhwako? Mobhe no omonyo kobhenyu abhene, na mobhe no umukumia kokera montho."