1 Vadungu, mbe lwa mlitu wa ndimwa mgati na mav'i, inywe awo mliwa kiroho, yukowiwa kumsuv'ya mdugu mgate na roho ya ukonde. Uku mkwilinga enywe v'enekeri mangu kudumgemelagwe. 2 Mwisombele miligo, ni kwivyo mkakamisha isemzya lya mwa Kristo. 3 Mbe yav'a mntu yoyote akawine uwosoga itungu ikav'ile k'intu, akwikonga msav'a. 4 Kukila yumo agupima mlimo gwakwe. Kumbe akuv'i na kintu chakwe mwinikil'e msav'a cha kufina, bila kwigelanizwa msav'a na mntu yungi. 5 Igano kukila mntu akasole mligo gwakwe msav'a. 6 Umuntu ahembekilwe igambo yuko v'iwa amwegezwe muhembeki masogo gose. 7 Kuduhumwikonge na. Sev'a akagemelagwa. Kwicho ahambile mntu, ndiohicho akimbule. 8 Uyo ahambile mbiyu mgati kusembo mbi yakwe, akimbule mav'i, uyo ahambile mbiyu ku moyo msoga akimbule masoga kufuma kumoyo gwake. 9 Kudukuzov'e kwiv'ezwa mgate na masoga, igano kwitungo lyakwe kulimbule mbe yav'a kuduhu kufwa moyo. 10 Mbe itungo kukav'a nihagalihu kukav'ezwa masoga kukila mntu. Kuv'ezwe masoga kwawo walimkati eimani. 11 Lingi uhanya wa baruv'a iyo mbatonile ku mikono zyane ene msav'a. 12 Awo v'ekukov'a kwita masoga ku mtazamo gwa muv'ele ndio v'akumsosha mtahiriwe. Wakuv'ezya hivi kunguno kuduhu wingile mmav'i ga msalaba gwa mwa Kristo. 13 Igano ninga v'ale v'atahiriwa v'asav'a kwakakudima miko ebadala yakwe wakukov'a inywe mtahiriwe, mangu wav'ezye kufumila miv'ele zyawo. 14 Kuduhu ifumile lifume ila kumsalaba gwa V'av'a winswe Yesu Kristo. Igate nawe welelo yatesekaga nguno yane nane mgate na welelo. 15 Iv'a ikajalisha kutahiriwa ninga kutokutahiriwa kuv'a na kintu. Ebadala yakwe mbyalo mpya ni na chelu. 16 Ku wose v'akwikala msululu gumo, v'av'e na mbola ya nsombe na chelu kiwe higulya nawo vose, na higulya ya Israeli ya mwa Sev'a. 17 Ninga haha mntu kuduhuhatambulishe igano nasombaga ialama zya mwa Yesu mumuv'ili gwane. 18 Chelu ya mwa V'av'a winswe Yesu Kristo iwe na holo zinswe, waudugu. Amina.