¹ Elina niza bahu kukela uunyunkeeli nuansailo, bahu uluhiku lakusha kukela uluhiku lakutugwa. ² Bahu kulongola munyumba auhongeelye kukela munyumba awiloeli, kunsoko uhongeli wiza muantu ehi matungo ampelo aupanga, kuite neikie kusinja aikeile munkolo. ³ Uukia bahu kukila imaheko, kunsoko uuso waukia wiza ulowa munkolo. ⁴ Inkolo amupo ikole munyumba auhongeelya, kuite inkolo amupungu ikole munyumba awiloeli. ⁵ Bahu kulegeelya ulang'wi nuamuntu numupolo kukela kutegeelya uwimbo nua mupungu. ⁶ Kunsoko anga umulilo nua nija pihe kashungu, uuile imaheko amupungu. Uu nuwenzu muluke. ⁷ Tai ulugoha lemulenda umuntu numupolo kutula mupungu, ne lushwa ebipya inkolo. ⁸ Inge bahu empelo ikani kukila ung'wandyo, neantu neigigimeeli bahu kukila neilolya munkolo. ⁹ Leka kukaya munkolo ako, kunsoko ikuo likie munkolo yaapungu. ¹⁰ Lekakulunga, "Kuneki imahiku akali aimaza kukila imahiku aya?" Kunsoko singa kunsoko aupolo kina ukokolya ikolyo eli. ¹¹ Upolo uza anga emaintu ansailo nekusaile kupuma mualeli itu. Yukupumya nsailo kuawa neakulihenga ilyoa. ¹² Kunsoko upolo wepumya usungi anga uu empia nehuma kupumya uusungi, kuite kusija insailo amahala kena uupolo weminkiilya upanga ku wehi nuukete. ¹³ Isege intendo yang'wi Tunda: Nyenyu nuhumile kukondanielya kehi nukebidile? ¹⁴ Itungo lamatungo yukutula iza, ikie kuulowa mukianza kiko, kuite imatungo angatula mabi, sega ile: Itunda ugombilye ayaeke kutula akole, kunsoko eye, kutile muntu wehi nukulinga kehi nekipembilye kuleka nuanso. ¹⁵ Nihega makani edu mumahiku ane muumeli. Akoli iantu itai neakulimila kuleka gwa netai hangi ahole iantu niabi neikie likalo lulepu kuleka gwa kina abi. ¹⁶ Uleke kutula wiatai kumiho ako uewe. Kuneke kibipya uewe? ¹⁷ Leka kutula umubi kukila ang'wi umupungu. Kuneke ushe akele kupikiila imatungo ako? ¹⁸ Inone kina uambe upolo uwu, nekina ulekekuleka etai ilongole yakwe. Kunsoko umuntu nuemukulya Itunda ukukondaneilya imalago akwe ehi. ¹⁹ Uupolo ukete ngulu mukati amupolo, kukila iatemi ikumi neamuisali. ²⁰ Kutile umuntu nukete etai migulya ihe nuituma nemaza nukituma imelandu. ²¹ Lekakutegeelya kela ulukani nulukuligiligwa, kunsoko uhumile kija umitumi nuako ukuusosha. ²² Uu uuu ulengile uewe mukati a nkolo ako waazumile neangiza nkua kazaa. ²³ Aya ehi nemapikiiye kuupolo. Nekalunga , "Kutula nuupolo," kuite kukila naenzetula. ²⁴ Uupolo wekuli nikombo kukila. Nyenyu nuhumile kuulija? ²⁵ Nekapeula inkolo ane kumanya nukuduma upolo nu ubaguli nuatai, nukulenga kena uubi upungu ni kina uula mahala uhali. ²⁶ Nekalija kulenga kina uuai kukila insha uu wele umusungu wehi inkolo akwe nizue imitego, ne nyabu ne hange imikono akwe miza. Wehi mumuloeeye Itunda ukupululigwa kupuma kung'waakwe, kuite umituma milandu ukuholwa nubg'wenso. ²⁷ Sega ike nenekipumiiye," ulungile umumanyisi. Aekongeelya upumili ung'wi sunga nuuya nsoko kina ndije uulengi nuatai. ²⁸ Iye inge nkele kuduma, kuite nkele kupandika singa aindigilye umusungu anga nung'wi nukete etai mumakumi ikumi, kuite singa nekapandika umusungu muawa ehi. ²⁹ Nalengaele: kina Itunda aumuumbile umuntu aimugoloku, kuite ekahega muugoloku ikaduma makaku edu.