¹ Kunsoko kela ekentu nimatungo akwe, ne majila kukila utimeeli pihe ilunde. ² Akule matungo akulugwa ne matungo akusha, matungo akutemela ne matungo akipa natemewe, ³ matungo akubulaga ne matungo aponia, matungo akuhambula ne matungo akuzenga. ⁴ Akole matungo akulema nematungo akuheka, matungo akuholangelya ne matungo akiginsa, ⁵ matungo akuguma magwe ne matungo akilingiila imagwe, matungo akukumbasiila antu neangiza matungo akuhita kukumbasiila. ⁶ Akole matungo akuduma maintu nematungo akuhita kuduma, matungoakusunga maintu nematungo akumaguma, ⁷ matungo akutamula ang'wenda ne matungo akuatuma, matungo akukilaja nematungo akuligitya. ⁸ Akole matungo akulowa ne matungo akubipilwa, matungo ambita nematungo aupolo. ⁹ Nsailo ki umitumi nuimilija mumilimo akwe? ¹⁰ Nihega umulimo ni Tunda uminkiiye iantu kutimiilya. ¹¹ Itunda uekile kela ekentu kunonela kumatungo akwe. Hange uekile ukaleu mukati ankolo yao. Kuite umuntu shukumile kulinga intendo ni Tunda witumile, kupuma ung'wandyo sunga impelo. ¹² Nengile kina kutile nekiza kumuntu wehi kukila kulowa nukituma nimaza muladi ukikie. ¹³ nehangi kela ung'wi inonee walye nukunywa hange inonee kulinga ndogoilyo akuloelwa nimaza aya napumile mumilimo akwe ehi. Iki kipegwa kupuma kung'wi Tunda. ¹⁴ Nengile kina kehi nukituma Itunda kekusaga ikale. Kutile nekikongeeligwa ang'wi kuhegigwa kunsoko Itunda ng'wenso ukitendile, nsoko kina iantu amuhumbele kumukulya. ¹⁵ Kehi nekekole aekakonda kutula kukote, nekukatula kikole kakonda kutula kikole. Itunda wiatenda iantu kuduma iintu niipihile. ¹⁶ Hangi nihenga kina pihi alyoa ubi ukoli kuanza nekilagilwe kutula netai, nekuanza katai nkuayedu kikete ubi. ¹⁷ Nikalunga munkolo ane, "Itunda ukulamuula nukete itai numubi kumatungo napikiie kukela ikani nekela intendo. ¹⁸ Nikalunga munkolo ane, "Itunda wiagema iantu kualagiila kina nianso anga ikali." ¹⁹ Kunsoko impelo iana aantu nempelo aikali impyani usha a ung'wi mpyani nensha amuya. Ehi akele mekupo impyani. Kutile insailo kuantu kukila iikali. Kunsoko kutile kela ikintu kulekutula emehupo? ²⁰ Kela ikentu kinzu kianza kinywi. Kela kintu kepumile mulunkunde, hangi kela kintu kekusuka mulunkunde. ²¹ Nyenyu nulengile kina inkolo amuntu inzu migulya nenkolo aikali inzu pihe nihee? ²² Kuite hangi nikalinga kina kutile niza kuwehi kukila kiloeelya imilimo akwe, kunsoko nelanso lilo ilago lakwe. Nyenyu nuhumile kumuleta hangi kihenga nekepumie kuleka nuanso?