¹ Anga ingi niikule yesasha kupumya unyinhi nua ugundu, uu uuu uupungu nuunino wihume uupolo nikulyo. ² Inkolo amuntu muupolo ihonga kulila, kuite inkolo amupungu ihonga nkigi. ³ Imatungu umupungu nukugenda mubalabala, imasigo akwe apee, ikupikiilya kukela umuntu kena mupungu. ⁴ Anga ikuo la mukulu angalekumbuke kenyuma nuewe, lekakuleka umulema wako. Uupolo uhumile kupolya ulogoha nulukulu. ⁵ Ukole ubi nenuuine pihe alyoa, ipelu ligazo neleza a kupuma kumukulu. ⁶ Iapungu inkeeligwa ilyoma la ukulu, imatungo iantu neahumile akinkeligwa mioma apike. ⁷ Neihengile atugwa akunankila falasi, neantu neahumile akugenda anga atugwa migulya pihe. ⁸ Wehi nukukimba ikembo uhumile kugwilya nakwe, hangi pehi umuntu nukubunanga ukunja, inzoka ahuma kumubulaga. ⁹ Wehi nukusesa igwe, wahuma kulemaaligwa nimenso. Nu muntu nukusesa imbao, wahuma kitwala muubi kunanso. ¹⁰ Ange ishuma neketu kegila anga ulaki, numuntu singa ukunola hangi kusinja watumile ingulu yedu kuite uupolo wepumya nsailo kudula. ¹¹ Anga inzuka angelume kabla shanga ilowa, kuite kutile insailo kumiloeli. ¹² Inkani yamulomo nua muntu nukete uupolo ikete uaisiilyo. Kuite imelomo amupungu imumila ung'wenso. ¹³ Ange inkani nianziilya kuhuula mumalomo wamupungu, uupungu wepuma, nempelo amulomo wakwe wehuula upungu nuubi. ¹⁴ Umupungu wiligilya inkani, kuite kulile nulengile nekepembilye. Nyenyu nulengile kukila nuanso? ¹⁵ Ulitutu nulamupungu letugalwa neenso, kuite singaa ine ata ibalabala nakendela mukisale. ¹⁶ Itunu lako ihe anga umutemi ako muhumba muniino, hangi anga alongeeli ako anza wiloeli kedaudau. ¹⁷ Kuite wasagilwa ihe ang'wi umutemi ako ng'wana nuaza, hangi ang'wi iatongeeli ako eliza matungo nanonee, kungulu, hange singa kugala. ¹⁸ Kunsoko aukate paa wigwize. Nukunsoko nesinga witumea umulemo inyumba elija ng'wegege. ¹⁹ Iantu inoneelya indya huulowa, imagai ilete ulowa mulikalo, nempia epikiilya uula kukela ikentu. ²⁰ Leka kumuzuma umutemi, ateze imahala, hangi leka kuazuma neakete insailo kumbele nako nakulale. Kunsoko inyonyi niamigulya ehumile kuhola inkani yako. Kehi nekikete manana kekumile kusapatilya inkani.