¹ Izi nkani yamumanyisi, ngwaa Daudi nu mutemi mu Yerusalemu. ² Umumanyisi ukulunga ite! Anga umuluke wi kuhi, anga ung'wega nuuza mu ng'wega, kela ekendu kehega nu kuleka makolyo duu. ³ Nsailo ke iantu neilija kupuma muimulemo ehi neituma pihe alyoa? ⁴ Wileli ung'wi wenda, nu wileli nuungiza wizaa, kuite ihe isaga ikaliu. ⁵ Ilyoa litoloka ne lyoa lihaila nukulongola kuukayi, nukusuka keanza nelitolokelo hangi. ⁶ Ung'wega wikumka kutakama, ni nkua yehi wipilima munzila yakwe nukusuka hangi ⁷ Myongo ehi ehuma mubahali, kuite ebahali shagizula, keanza imyongo kunelongee, kuko ilongoe hange. ⁸ Kela ekentu ketula kikatae, hangi kutile wehi nuhumile kukeligililya. Iliho shalikula neli nekaliine, sunga ukutye neke nekaligule. ⁹ Kehi nekikole kiko ikalukoli, kehi nekelendekile kiko kikulendeka. Kutile nipya pihe alyoa. ¹⁰ Itee likole ikani lehi neantu ahumile kulunga, "Goza ile ipya? Kehi nekihole aikikoleu malugu edu, imatungo naeakole kunyuma itu. ¹¹ Kutile nuigeela kukembuke naekepumie imatungo akale. Nimakani naigee imahiku nakeile naya nakupumila imahiku akuntongeela nemenso shakukimbukwa" ¹² Unene numumanyisi, hangi natula mumutemi muisilaeli a Yelusalemu. ¹³ Aimbikile imahala ane mumanyi nu kuduma kuupolo kela ekentu nekekitung'wa pihe ilunde. Ile nelyenso mulemo ulito ni Tunda upee ianaantu kulitumila nilanso. ¹⁴ Nihenga intendo yehi niyukutendeka piye alyoa, hangi goza ehi muluke inge kugema kuusunga ung'wega. ¹⁵ Panaibedile shaihumile kugoolwa! Nekikitile shakukualigwa! ¹⁶ Niimie inkolo ane nukulunga, "Goza nalija upolo ukulu kukila awa naeikae ku Yelusalemu kuntongeela ane. Imahala ane ihengaupolo ukulu nuulengi." ¹⁷ Namiika inkolo ane kulenga upolo nuula mahala nuupungu. Nalenga kina ile nelyenso gaa aikugema kuusunga ng'wega. ¹⁸ Kunsoko muudu nuaupolo lukole lwago lidu, nuyu nuongeelya uhugu, wongeelya ukia.