1 Mghothi, kwa mbwie Gayo, nimfurie hena kweri. 2 Mbwie niakulombea uvoneficha hena findo fyoshe na iva na ufuri mcha, thafundu ngoo yapho iyavonaficha. 3 Iluva liya nighenuliriwe mnu nikinaviwe ni venyu valechie na irera kweri fundu fwapho, thafundu kuaghenda hena kweri. 4 Thighire kingi kirwe tha iki, iichwa iku vana vakwa vaaghenda hena kweri. 5 Mbwie, uvware mma na ughende ighevahirira venyu na vaghenyi, 6 vaya vafunyire kirero cha ifura yapho mothia ya nyumba ya Ruva. Kuhirire kicha mothia ya Ruva ivatika hena ndambo yavo. 7 Hena icho fundu fwa Irina, li valeghendie bila iondoa kindo chochoshe cha vandu va Mathanga. 8 Kwa icho, fuashigha ivaghuhia vandu tha ivainetha fuve vaghehira ndima hamwi hena kweri. 9 Nigheliandikirie ibumba kindo ki, mira Diotrofe, aleleghie iiraniana na ifwe kwa liya afurie iva wevoka hena varwee voshe. 10 Hena icho nikicha nafikumbuta findo fyakwe achirera firero fivichwa fundu fweru. Arithikiewe na findo fi, weweka avaghuhirie veru. Kangi vaya vakyashigha ivakaribisha ivo veru na ivatangira vafume hena ubumba. 11 Mbwie, kunaigha findo fivichwa, mira uighe findo ficha. Uya achihira findo ficha ni wa Ruva; na uya achihira findo fivichwa anamvonawe Ruva. 12 Voshe vachimrera iku Demetrio ni mndu achirera keni yoshe. Ifwe nafwe fuvonire, na kuichi iku ivona yeru ni ya kweri. 13 Nighire findo fingi fyekuandikia, mira thiashighanyi ikuandikia kwa kalamu ya wino. 14 Mira mifiri ya aghwihi niashigha ikuvona, nethafugaye mitho kwa mitho na iwe. 15 Mborere ikae hamwi na iwe kuarikirwa ni vambwie vapho. Vairikire vambwie kila umwi kwa irina yakwe.