1 Mwisho ndugu, tawagea moyo na kuwahembeeza mwe Yesu Kwistu . Kana mwekuhokea maelekezo kuawa kwetu namna ikundwavyo na kuita kumwagizwa Muungu kwa sia hio pia muite nakugosoa zaidi. 2 Kwa kua mwamanya ni maelekezo yada tekuwanng'ayo kwembokea zumbe Yesu. 3 Kwa haya nee ukundiso wa Muungu ung'ao wenu kwamba mwe ukane na kianga. 4 Kwamba kia yumwe amanya namna ya kumiiki mvyee yakwe mwenye mwe utakatifu na heshima. 5 Usekua na mvyee kwa jii ya tamaa za mwii [kana mataifa wasea kummanya Muungu]. 6 Msekuaho mntu yoyose mwendae emboke mihaka na kukimana na nduguye kaajiii ya mbui inu kwakua Tate nee muiha kwaajii ya mbui izi kana teivyo tekuongoa kuwa haza na kushuhudia. 7 Kwamba Tate nkekutitangia kwa uchama, bai kwa utakatifu. 8 Kwahiyo muemea idi khawakunda wantu bai amuemea Muungu. Awenkae Loho Mtakatifu ywake. 9 Kuhusu kukundwa nndugu khakuna haja ya mntu yoyose kukugondea. Kwakuwa mhinywa kae nMuungu kukundana nywinywi kwa nywinywi. 10 Hakika mgosoa haya yose kwa ndugu weuko Makedonia yose. Akini tawahembeeza, ndugu mgosoe hata na zaidi. 11 Tamhembeeza mkunde kwe kaa maisha yekutayo kugosoa ndima zenu na kugosoa ndima kwa mikono yenu ing'a tekuwaamuru. 12 Gosoa idi udahe kuita vitana na kwa heshima kwa hao weaho chongoi ya imani ili msekuhungukiwa na hitaji dodose. 13 Khatikunda nywinywi mve isavyo kutama nywie ndugu uanga ya hao wekugonao. Mwesekweza kusininika inga watuhu wesio na kwei kuhusu uakati wezao. 14 Ati taamini kua Yesu nee kafa na kufufuka vituhu, ivyoivyo Muungu endaawegae hamwe na Yesu hao wekugonao mauti mwe yeye. 15 Kwaajii ya ayo tawamba nywinywi kwa mbui ya Tate kwamba swiswi ndie tiwemeso ukati wa kweza kwa Tate hakika nkatina tiwaongwee we kugona mauti. 16 Kwakuwa Tate mwenye enda asee kulawa mbingu, eza na Bauti nkuu hamwe na malaika mkuu na gunda da Muungu nao wekufao mwe Kwistu wenda wenuke kwanza. 17 Kabisa swiswi temeso tekusigaao, tenda tidugana mwe mazumbe hamwe nao kumhokea Tate hewani, kwa sia hii tenda tiwe na Tate siku zose. 18 Kwa hiyo, mhongezane nywinywi kwa nywinywi kwa mbui izi.