¹ Nomba pamulandu wanshita ne nshiku, ba munyinane, tamulekabila ukuti ifili fyonse finga lembwa kuli imwe. ² Pantu imwe mwebene mwalishiba mucine ukuti ubushiku bwakwa shikulu buleisa kwati mupupu ubushiku. ³ Ilyo, kuli "umutende kabili cakutina," elo ubonaushi bukesa mukwangufyanya kuli bena, cikaba kwati bukali bwa pakupapa kuli namayo uuli ne fumo tapakabe uukapusuka nakalya. ⁴ Lelo imwe, bamunyinane, tamwaba mumfifi pakuti ubushiku bwimpumikisha kwati mupupu. ⁵ Pantu imwe bonse muli bana baume bamu lubuto na bana baume bamukasuba tatuli bana baume bamu bushiku nangu abamumfimfi. ⁶ Eico kanshi, lekeni twiba abalala ngefyo abashala bacita. mucilingile lekeni tube abalola nokuba abatekanya. ⁷ Pantu abo abalala bacita ico ubushiku, nabo abakolwa bacita ici ubushiku. ⁸ Lelo pantu tuli ba mukasuba, tufwile ukwikala abatekanya nokufwala icicetekelo ne citemwiko nge cakucinga icifuba, elo ne subilo lyepusukilo nge ca kucinga umutwe. ⁹ Pantu Lesa tatusontele ukulola kucipyu lelo ukukwata ipusukilo ukupitila muli shikuluifwe Yesu Kristu ¹⁰ ni ena ewatufwilile pakuti, nelyo twingaba abalola nangu abalala, twingekala capamo na ena. ¹¹ Eico koseleshanyeni umo na umubiye noku kulishanya umo no mubiye ukuya pamulu, nge fyo imwe mucili mulecita. ¹² Tulepapata apakalamba kuli imwe, bamunyinane, ukwishiba abo ababombesha muli imswe nabo ababikwa pali imwe mulu shikulu kabili abo abamisambilisha. ¹³ Kabili tulemwipusha ukuba cindikisha mu citemwiko pamulandu wa milimo yabo. ikaleni mu mutende. ¹⁴ Twamikoselesha, bamunyina: Sokeni abanang'ani, koselesheni aba tomposhiwa, afwen abanaka, kabili mube abatekanya kuli bonse. ¹⁵ Moneni ukuti takuli uulebwesesha ububi pa bubi ku uuli onse. Mucilingile, konkeni ifisuma palwa cila umo na munankwe na pali bonse. ¹⁶ Sekeleleni lyonse. ¹⁷ Pepeni ukwabula ukuleka. ¹⁸ Mu fintu fyonse peleni amatotelo pantu ubu ebufwayo bwa kwa Lesa muli kristu Yesu pali imwe. ¹⁹ Mwishimya umupashi. ²⁰ Mwisusha ubusesemo. ²¹ Esheni ifintu fyonse. Ikatilileni kuli ifyo ifisuma. ²² Talukeniko ku bubi bwamisango yonse. ²³ Lekeni Lesa uwa mutende amishishe umupwilapo. Lekeni umupashi wenu onse, umweo, no mubili fisungulwilwe ifyabula kalema palwa kwisa kwakwa shikulu ifwe Yesu Kristu. ²⁴ Wacishinka uyo uwamwita, uyo umo kabili ukacicita. ²⁵ Bamunyina, mutupepeleko na ifwe. ²⁶ Muposhe bonse bamunyina nokufyommpana ukwa mushilo. ²⁷ Ndemukonkomesha mulu Shikulu ukulenga iikalata ukubelengwa kuli ba munyina bonse. ²⁸ Ukusenamina kwakwa shikulu ifwe Yesy Krist kube na imwe.