¹ Une ne Pabuli, ne indi mujela pachifukwa cha kilisitu uYesu, sona na mubuyo bwa Timoti umukamu witu. Ngumusimbila uFilimoni yo mumanyani witu, sona mubombi umunyitu. ² Ngumusimbila sona umuyemba witu uAfiya nu Alikipo umusikali umunyitu, sona nichipanga cho chikukomana munyumba yako. ³ Ichisa nu mutende ifyakufuma kwa Chala uTata witu, Malafyale uYesu kilisitu fibe numwe. ⁴ Mukamu witu Filimoni, ngumupalisya uChala wangu akabalilo kosi, po ngukukumbuka uwe munyiputo syangu. ⁵ Pakuti ngwifwa isya lwitiko lwako mwa Malafyale uYesu, sona nukuti ukubaghana ngani abandu bosi abaswepu abaChala. ⁶ Ngwiputa ukuti ubupamupene bo tukubeghana numwe butupelile ukuti tupulikisye ngani ulusayo losi, lo lwitu pakulematilana pamupene nu kilisitu. ⁷ Mukamu witu, ulughano lwako lwamba ubuhobofu ngani nulukasyo, pakuti wayisangalusya imyoyo ya bandu abaswepu aba Chala. ⁸ Ulu napo ne mukifu ngani mwa kilisitu ukukulaghila ukuti ubombe syo ubaghile pakusibomba, ⁹ mubuyo bwake, pachifukwa cha lughan, ngwisa pakukulambilisyabu. Une ne Pabuli umundu umughome, sona pakabalilo aka, indi mujela pachifukwa cha kilisitu uYesu. ¹⁰ Ngukulambilisya pachifukwa cha mwana wangu uOnesimo, yo ngaba ne wise pakabalilo ko bo indi mujela. ¹¹ Kale umwene atakaba nimbombo kwako, lolu ulu anganyafwa une nuwebu. ¹² Ngumutuma sona kwako kokuti ngutumila umoyo uwangu nulwangu. ¹³ Une nalondagha ukuti imbe nawe kuno, umwakuti anganyafwa mubuyo bwako, pakabalilo ko bo indi mujela pachifukwa chakulumbilila amasyu amisa. ¹⁴ Loli ndakalonga pakufyengabu pakubomba chichi, loli ukuti uchibombebu mubwighane bwako nu bwako. ¹⁵ Lumo ichifukwa cho uOnesimo akatilako kukwako pakabalilo akapimbabu, chikaba chakuti abenge nuwe bwile. ¹⁶ Ulu tamusya sona, loli akilapo pa pabuzya, nganingani mukamu wangu umughaniwa. Mughanite ngani, loli uwe ubaghile umughane ukongelapo, pakuti mukamu mwa kilisitu. ¹⁷ Pala ukunyegha pakuba ne mumanyani wako naloliloli, umupokele ukuyana namo ungapokelela. ¹⁸ Pala akunangile chimo, pamu pala ali ningongole nuwe, ingongole iyo yibe yangu. ¹⁹ Une ne Pabuli ngusimba isi ninyobe iyangu nulwangu. ngwisa palipila ingongole yilayila. Chitakulondiwa pakukukumbusya ukuti uwe uli ni ngongole nune, bo bumi bwako. ²⁰ Ee mukamu wangu, nalamba unyafweko pachifukwa cha Malafyale. Usangalusye ngati ne mukamu mwa kilisitu. ²¹ Bo ngukusimbila ukalata uyu, ngusubila ukuti naloli tise ubombe syo nakusuma. Simenye ukuti kwisa pakubomba ukukilapo pa syo nakusuma. ²² Ehee, akancu akangi ko aka: Unjanikisye ichipinda, pakuti ngusubila ukuti uChala akuya pakwamula inyiputo syinu mwebosi, nukundu sona kukwinu. ²³ U Epafula, yo Ali pamupene nune mujela pachifukwa cha kilisitu uYesu, akukulamula. ²⁴ Ababombi abanyitu, uMaliko, nu Alisitalika, nu Demo, sona nuLuka bobe bakukulamuka. ²⁵ Ichisa cha Malafyale uYesu kilisitu chibe numwe mwebosi.