¹ Po ngaketa buku munyobe ya ulyelo ya yo akwikala pachisumbe. Buku lilyo likasimbiwa muiasi nu kuse po lyadinibwe ni fidindo ifingonde ni fibili. ² Sona ngaketa uwandumi wamaka yo akitisyagha na masyu makulu wakati, "Ywani yo abaghile pakwiyula ibuku ili nukughaghabula ifidindo fyake?" ³ Lole patakaba na yumo kumwanya pamo pa chisu chapasi pamo kusi kwa chisu yo abaghile kwiyula ibuku lila pamo ukuketa mukasi mwake. ⁴ Po ngalila ngani pakuti patali nayumo mundu yo abaghile kwiyula pamo ukuketa mukati mwake. ⁵ Po yumo wa basongo ba luko lwa ba Yuda, mwisukulu wa Malafyale Davide yo akinda. Yo yo angiyula buku lilyo nukughaghabula ifidindo fingonde ni fibili. ⁶ Sona pakati pa chisumbe ni fyabumi folo na pakasi pa basongo ngaketa mwana wa ng'oshi wimiliye ngati afwile. Akaba nimbondo syingonde ni sibili namaso ghangonde na ghabili, fyo nimbepo shingonde nishibili sya Chala fyo fikatumiwa muchisu chosi. ⁷ Mwana wa ng'oshi akafika po akegha ibuku Lila ukufuma mu nyobe lya bulyelo lya yo akwikala pa chisumbe. ⁸ Pala wakegha ibuku lila, ifyabumi finayi fila pamo na basongo bangonde nababili bala bakaba pandashi pamwana wa ng'oshi nikumufughamila. Yumo yumo wa basongo bala akaba ni bango no bakule wa golidi wakwisula ni fyakunungila, syo nyiputo sya bandu ba Chala. ⁹ Po bakimbagha ukusumu lupya bakati, "Ubaghile wewe ukwegha ibuku ili nukulighaghabula ifidindo fyake, pakuti bakakughogha sona ni banda lyako watutabwile tweshi bandu bingi ukwa Chala. ukufuma ku luko lyoshi, ni njughilo shoshi nabandu boshi sona namafuko ghoshi. ¹⁰ Mutughalwisye ukuya mubunyafyale songo na baputi bakubombela uChala witu, po tukutufye pa chisu chosi ichapasi. ¹¹ Po ngaketa nukupulika amasyu gha batumiwa bingi, bo bali ifikwi kumi kongelesyapo ifikwi kumi ni fikwi ifya fikwi, bo bimiliye ukushungulila ichisumbe chila ni fyabumi finayi fila na basongo bala. ¹² Ni likuku bo batile, "umwana wa ng'oshi yo aghoghibwe yo abaghile ukupokela amaka, ubukabi, amahala, maka nu lughindiko, ubwighani nubulumbililo." ¹³ Po ngapulika amasyu ghafipeliwa fyosi fya kumwanya nichisu chapasi ni fya mukasi muchisu cha panyanja, na fyosi fyo fili mumo. fyoshi poka fikambagha fikati, "Kwa yo akwikala pachisumbe nu kwa mwana wa ng'oshi, kubaghile ubulumbililo, ulwitiko, ulughindiko, namaka bwila bwila ngani ngani." ¹⁴ Sona ifyabumi folo fila fikati, "Ameni". Popapo abasongo bakafughama nukumulambila nukumwiputa.