¹ Ulughano ulwa pa bakamu lubukilile. ² Manye mwibwe ukubangasha abalendo, pakuti mu ichi bandumi pasita kumwanya. ³ Mubakumbuke abapinyiwa ngati abapinyiwa baka babombela abanine ifibibi ngati umwe bakabomba nu mwe mu mubili. ⁴ Inyegha yichindikiwe na bandu boshi, napakughona manye panyalaghe, pakuti abomalaya uchala takabalonge. ⁵ Umoyo winyu manye ghushighane indalama 'chuma' fyo muli nafyo fibayane, pakuti umwene akati tangabaleke lumo, nalinga kubatagha, tanga bataghe lumo. ⁶ Chobene tukuyugha nubujimvu umutuli wangu wise tango ghope, umundu angabombaki. ⁷ Mubakumbuke abalongoshi binyu bo bakayugha numwe amashu gha chala, po muteshe ubumalilo akendele kabo mukonge ulwitiko lwabo. ⁸ Uyesu kilisito we yula yula mumasuba nu musughu na bwila bwila. ⁹ Mutakapulike ifimanyisho ifya luko nu luko nifya chilendo, pakuti chisa ukuti umoyo wikalane ni chisa ni fya kulya hagha, fyo abene ba kafikonga bataka chagha na chimo. ¹⁰ Tuli ni chighemo cho ababombi aba chitembe bata nu lulaghilo ulwa kulyako. ¹¹ Pakuti imibili ya finyamana fila ibanda lyake babombi bakeghagha ukwingila pa chighemo, chifukwa cha mbibi bakabochanga kuse ku chitembe. ¹² Pa ichi Uyesu wepe ukuti elufye abandu bala mwi banda ilyake yuyo akapulika ukubaba kuse ku mulyango. ¹³ Chobene tukindilile ku kwake kuse ku msasa lyo lipimbite indyamyo shitu. ¹⁴ Pakuti panu tute nubwaya lole tukulonda kala ko kakwisa. ¹⁵ Po mumwake tubike chibikile ikemo ilya kumpalisha uchala lyo mbeyu ya milomo lyakwitika ilyita lyake. ¹⁶ Lole mutakibwe ukubomba inyisa nukuyabila abangi pakuti uchala akuhoboka nifya bupe ifi. ¹⁷ Pulikilagha abalongoshi binu mubachindike pakuti bakulindilila umoyo winyu, angati bakubelenga ukuti babombe nukuhoboka manye bilumbushange pakuti ichi tachibafwe umwe. ¹⁸ Mutwiputile utwe pakuti twa pulika ukuti tukunyonywa ifyisa fyoshi pakulonda ukuva mukabele akisa. ¹⁹ Po tukubabula ngani kubomba ichi ukuti ukwisa kwangu kukwinyu kwendeleshe. ²⁰ Lole uchala wa mutende we akisa nawe we afuma kubafwe umuputi usongo wa ng'oshi ni banda ilya chipangano ichabwila weyo wiyesu kilisito. ²¹ Abateshe umwe muta nichilema mu findu fyoshi ifyisa ukuti mu bombe ubwighane bwake nuku muhobosha pamaso pake mwayesu kilisito kukwake kube ubu shisha ku kabalilo koshi. Amen! ²² Lole ngubapangila umwe bakamu, itikisha amashu agha lulu mbusho pakuti sona nabasi mbila umwe mu bupimba. ²³ Mumanye ukuti umukamu witu u Timoteyo asatuliwa pampene nawe linga akwisa lubilo tingabateshe umwe. ²⁴ Yugha na balongoshi binyu boshi na belu mumoyo boshi bakubalamuka aba italiya. ²⁵ Ichisa chibe numwe mweshi Ameni!